ജമ്മു: ഇന്ത്യയിൽ നിരവധി ഭീകരാക്രമണങ്ങൾക്ക് ഉത്തരവാദികളായ ലഷ്കർ-ഇ-തൊയ്ബ തലവൻ ഹാഫിസ് സയീദിനെയും ജെയ്ഷെ മുഹമ്മദ് തലവൻ മസൂദ് അസ്ഹറിനെയും പാക്കിസ്ഥാൻ രഹസ്യാന്വേഷണ ഏജൻസിയായ ഐഎസ്ഐ കഴിഞ്ഞ ഒരാഴ്ചയ്ക്കിടെ രഹസ്യകേന്ദ്രങ്ങളിലേക്ക് മാറ്റിയതായി രഹസ്യാന്വേഷണ വൃത്തങ്ങൾ. കനത്ത സുരക്ഷയുള്ള സുരക്ഷിത കേന്ദ്രങ്ങളിലാണ് ഇരുവരെയും പാർപ്പിച്ചിരിക്കുന്നതെന്നാണ് വിവരം.
ഹാഫിസ് സയീദിനെ ലാഹോറിലെ ജോഹർ ടൗണിൽനിന്ന് റാവൽപിണ്ടിയിലെ ഗാരിസൺ ഗ്രൗണ്ട് മേഖലയിലേക്കാണ് മാറ്റിയതെന്നാണ് റിപ്പോർട്ട്. പാക് സൈനിക ആസ്ഥാനത്തിന് സമീപമാണ് ഈ പ്രദേശം. മസൂദ് അസ്ഹറിനെ സിന്ധ് പ്രവിശ്യയിലെ നവാബ്ഷായിലുള്ള രഹസ്യകേന്ദ്രത്തിലേക്കും മാറ്റിയിട്ടുണ്ട്.
ഇന്ത്യയുടെ ഭാഗത്തുനിന്നുള്ള പുതിയ ആക്രമണങ്ങളെക്കുറിച്ചുള്ള ഭയമാണ് ഇരുവരെയും മാറ്റാൻ കാരണമെന്നാണ് രഹസ്യാന്വേഷണ വൃത്തങ്ങൾ പറയുന്നത്. ഓപ്പറേഷൻ സിന്ദൂറിലൂടെ ഭീകരവാദ അടിസ്ഥാനസൗകര്യങ്ങൾക്ക് ഇന്ത്യ വലിയ നാശം വരുത്തിയിരുന്നു. ഇതിന് പിന്നാലെ വീണ്ടും ഇന്ത്യൻ ആക്രമണമുണ്ടാകുമെന്ന ആശങ്ക പാക് ചാരസംഘടനയ്ക്കുണ്ടെന്നാണ് സൂചന. പാക്കിസ്ഥാനിൽ കഴിഞ്ഞ മാസങ്ങളിൽ ഇന്ത്യാവിരുദ്ധ ഭീകരർ ദുരൂഹ സാഹചര്യത്തിൽ കൊല്ലപ്പെട്ട സംഭവങ്ങളും ഐഎസ്ഐയെ ആശങ്കയിലാക്കിയിട്ടുണ്ടെന്നാണ് റിപ്പോർട്ട്. അജ്ഞാതരായ അക്രമികളാണ് ഇത്തരം കൊലപാതകങ്ങൾക്ക് പിന്നിലെന്നാണ് പുറത്തുവന്നിട്ടുള്ള വിവരങ്ങൾ.
സുരക്ഷാ ഭീഷണി കണക്കിലെടുത്ത് ഹാഫിസ് സയീദ് ലഷ്കർ പ്രവർത്തകരുമായി നേരിട്ട് കൂടിക്കാഴ്ച നടത്തുന്നത് അവസാനിപ്പിച്ചതായും റിപ്പോർട്ടുണ്ട്. പകരം ശബ്ദസന്ദേശങ്ങളിലൂടെയാണ് ഇയാൾ സംഘടനാ പ്രവർത്തകരുമായി ആശയവിനിമയം നടത്തുന്നത്. സുരക്ഷ ശക്തമാക്കിയതോടെ സയീദിന്റെ സഞ്ചാരത്തിനും കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്.
അതേസമയം, ഭീകരവാദത്തിന് സാമ്പത്തിക സഹായം നൽകിയ കേസുകളിൽ ഹാഫിസ് സയീദ് ലാഹോറിലെ കോട്ട് ലഖ്പത് ജയിലിൽ ശിക്ഷ അനുഭവിക്കുകയാണെന്നാണ് പാക്കിസ്ഥാന്റെ ഔദ്യോഗിക വിശദീകരണം. എന്നാൽ ഇത് വെറും നാടകമാണെന്നാണ് ഇന്ത്യൻ രഹസ്യാന്വേഷണ ഏജൻസികളുടെ വിലയിരുത്തൽ. ജയിലിലല്ല, സുരക്ഷിതമായ രഹസ്യകേന്ദ്രത്തിലാണ് ഇയാൾ കഴിയുന്നതെന്നാണ് ഇവർ പറയുന്നത്.
ഓപ്പറേഷൻ സിന്ദൂറിൽ ജെയ്ഷെ മുഹമ്മദിനും വലിയ തിരിച്ചടിയേറ്റിരുന്നു. ബഹാവൽപൂരിലെ സംഘടനയുടെ പ്രധാന ആസ്ഥാനമായ മർകസിന് വ്യാപകമായ നാശനഷ്ടങ്ങളുണ്ടായി. ഇതിന് പിന്നാലെ സംഘടനയ്ക്ക് പ്രവർത്തനങ്ങൾ പുനഃസംഘടിപ്പിക്കാൻ കഴിയാതെ ബുദ്ധിമുട്ടുകയാണെന്നാണ് റിപ്പോർട്ട്. മസൂദ് അസ്ഹറും സംഘടനാ പ്രവർത്തകരുമായി നേരിട്ടുള്ള ബന്ധം ഒഴിവാക്കിയിരിക്കുകയാണ്. ഉന്നത കമാൻഡർമാരുൾപ്പെടെ തിരഞ്ഞെടുത്ത ഏതാനും നേതാക്കളുമായി മാത്രമാണ് ഇപ്പോൾ ഇയാൾ ബന്ധപ്പെടുന്നതെന്നാണ് വിവരം.
അതേസമയം ഐക്യരാഷ്ട്രസഭ ആഗോള ഭീകരരായി പ്രഖ്യാപിച്ചവരാണ് ഹാഫിസ് സയീദും മസൂദ് അസ്ഹറും. 2008-ലെ മുംബൈ ഭീകരാക്രമണം ഉൾപ്പെടെ ഇന്ത്യയിൽ നടന്ന നിരവധി ആക്രമണങ്ങളുമായി ബന്ധപ്പെട്ട് ഹാഫിസ് സയീദിനെ ഇന്ത്യ തിരയുന്നുണ്ട്. പുൽവാമ, പത്താൻകോട്ട്, പാർലമെന്റ് ആക്രമണങ്ങളുടെ ആസൂത്രകരിലൊരാളായാണ് മസൂദ് അസ്ഹർ അറിയപ്പെടുന്നത്. ഇരുവരും നിലവിൽ ജയിലിലല്ലെന്നും പാക് രഹസ്യാന്വേഷണ ഏജൻസിയുടെ സംരക്ഷണയിലാണ് കഴിയുന്നതെന്നുമാണ് രഹസ്യാന്വേഷണ വൃത്തങ്ങൾ നൽകുന്ന വിവരം. എന്നാൽ ഇവരുടെ പുതിയ താമസസ്ഥലങ്ങളെക്കുറിച്ചുള്ള വിവരങ്ങൾ സ്വതന്ത്രമായി സ്ഥിരീകരിക്കപ്പെട്ടിട്ടില്ല.
