കൽപ്പറ്റ: ഉരുൾപൊട്ടലിൽ തകർന്ന വയനാട്ടിലെ ചൂരൽമല പാലത്തിന് പകരം ഹൈടെക് പാലം ഒരുങ്ങുന്നു. 34 കോടി രൂപ ചെലവിൽ നിർമിക്കുന്ന പാലത്തിന്റെ നിർമാണപ്രവർത്തനങ്ങൾ ആരംഭിച്ചു. ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് നിർമാണച്ചുമതല.
ചൂരൽമലയിൽ സൈന്യം നിർമിച്ച ബെയ്‌ലി പാലത്തിന് സമാന്തരമായാണ് പുതിയ പാലം നിർമിക്കുന്നത്. ഗർഡറുകൾ പരസ്പരം ബന്ധിപ്പിക്കുന്ന ബോസ്ട്രിങ് മാതൃകയിലാണ് രൂപകൽപ്പന. പുഴയ്ക്ക് കുറുകെ 107 മീറ്ററും ഇരുകരകളിലുമായി 80 മീറ്ററും നീളമുണ്ടാകും. പാലത്തിന്റെ ഉയരം വർധിപ്പിച്ചാണ് നിർമാണം നടത്തുന്നത്. പുഴയിൽ തൂണുകൾ സ്ഥാപിക്കാത്ത രീതിയിലാണ് രൂപകൽപ്പന. ദുരന്തസമയത്ത് പുന്നപ്പുഴയിലുണ്ടായ പരമാവധി ജലനിരപ്പ് കണക്കിലെടുത്ത് അതിനേക്കാൾ ഉയരത്തിലാണ് പാലം നിർമിക്കുന്നത്. ഭാവിയിൽ സമാനമായ ദുരന്തങ്ങളുണ്ടായാലും അതിജീവിക്കാൻ കഴിയുന്ന തരത്തിലാണ് രൂപകൽപ്പന.
ചൂരൽമല ടൗണിൽ പാലത്തിന്റെ പൈലിങ് ജോലികൾ ആരംഭിച്ചു. ടൗണിൽനിന്ന് തുടങ്ങി മറുകരയിൽ അട്ടമല, മുണ്ടക്കൈ റോഡുകൾ സംഗമിക്കുന്ന സ്ഥലത്താണ് പാലം അവസാനിക്കുക. നാലുവർഷത്തിനുള്ളിൽ നിർമാണം പൂർത്തിയാക്കാനാണ് ലക്ഷ്യമിടുന്നത്.
