പാലാ: പ്രതിപക്ഷ നേതാവും മുൻ മുഖ്യമന്ത്രിയുമായ പിണറായി വിജയനെതിരെ വിവാദ പരാമർശവുമായി പൂഞ്ഞാർ എം.എൽ.എ എം.ജെ. സെബാസ്റ്റ്യൻ. മുൻ സർക്കാരിന്റെ കാലത്തെ നടപടികൾ ചൂണ്ടിക്കാട്ടിയായിരുന്നു എം.എൽ.എയുടെ രൂക്ഷ വിമർശനം. ‘നിങ്ങൾ ആരെങ്കിലും നിയമസഭയിൽ അംഗമായി ഇരിക്കുകയാണെങ്കിൽ അവിടെ ഇരിക്കുന്ന പിണറായിക്ക് എഴുന്നേറ്റ് അടി വെച്ചുകൊടുത്തേനെ’ എന്നായിരുന്നു പാലായിൽ നടന്ന പൊതുപരിപാടിയിലെ പരാമർശം.
ജലനിധി കുടിവെള്ള പദ്ധതിയിലെ അഴിമതി ആരോപിച്ചുകൊണ്ടായിരുന്നു എം.എൽ.എയുടെ വിമർശനം. 44,000 കോടി രൂപയോളം ബജറ്റുള്ള പദ്ധതിയാണ് ജലനിധിയെന്ന് അദ്ദേഹം പറഞ്ഞു. സംസ്ഥാനത്തെ കുടിവെള്ള പ്രശ്നങ്ങൾ പരിഹരിക്കുന്നതിനായി വിഭാവനം ചെയ്ത പദ്ധതിയിൽ വലിയ അഴിമതി നടന്നതായും ആരോപിച്ചു.
പദ്ധതി കാരണം പ്രായോഗികതലത്തിൽ ജനങ്ങൾ നിരവധി ബുദ്ധിമുട്ടുകൾ നേരിടുന്നുണ്ട്. ഇത്രയും വലിയ പ്രശ്നങ്ങളും അഴിമതി ആരോപണങ്ങളും ഉയർന്നിട്ടും കഴിഞ്ഞ സർക്കാരിന്റെ കാലത്ത് പദ്ധതിക്ക് കൂട്ടുനിൽക്കുന്ന സമീപനമാണ് ഉണ്ടായതെന്നും എം.എൽ.എ കുറ്റപ്പെടുത്തി.
പാലായിൽ പെൻഷനേഴ്സ് ഫോറത്തിന്റെ ഭാഗമായി സംഘടിപ്പിച്ച സമ്മേളനത്തിലായിരുന്നു സംഭവം. സദസ്സിലിരുന്നവരോടു സംസാരിക്കുന്നതിനിടെയാണ് പിണറായി വിജയനെതിരായ വിവാദ പരാമർശം എം.എൽ.എ നടത്തിയത്.
