നാഗ്പൂര്‍: പരമ്പരാഗത ദീപാവലി ആചാരങ്ങൾക്ക് ശാസ്ത്രീയ അടിത്തറയുണ്ടെന്ന് ആര്‍എസ്എസ് മേധാവി മോഹൻ ഭഗവത്. മുൻകാലങ്ങളിൽ ഉപയോഗിച്ചിരുന്ന പടക്കങ്ങൾ രാസവസ്തുക്കൾ കൊണ്ടല്ല നിർമിച്ചിരുന്നതെന്നും പ്രാണികളെ കൊല്ലാനും അന്തരീക്ഷം ശുദ്ധീകരിക്കാനും സഹായിച്ചിരുന്നുവെന്നും അദ്ദേഹം പറഞ്ഞു. ചൊവ്വാഴ്ച നാഗ്പൂരിൽ മഹേശ്വരി പഞ്ചായത്ത് സംഘടിപ്പിച്ച ദീപാവലി പരിപാടിയിൽ സംസാരിക്കുകയായിരുന്നു ഭഗവത്. നെയ്യും എണ്ണയും ഒഴിച്ച് വിളക്കുകൾ കത്തിക്കുന്നത് പരിസ്ഥിതിയിൽ ഒരു പ്രത്യേക തരം വായു സൃഷ്ടിക്കുമെന്ന് ഭഗവത് പറഞ്ഞു.
“ഇത്തരം ആചാരങ്ങൾ അവയുടെ പിന്നിലെ ശാസ്ത്രം മനസ്സിലാക്കി പിന്തുടരണം. ഇത് അന്തരീക്ഷത്തെ ശുദ്ധമായി നിലനിർത്തുകയും നമ്മുടെ ജീവിതത്തിന് സന്തോഷം നൽകുകയും ചെയ്യും” അദ്ദേഹം കൂട്ടിച്ചേര്‍ത്തു. ഉത്സവങ്ങൾ ഇന്ത്യൻ സമൂഹത്തിന്റെ അവിഭാജ്യ ഘടകമാണെന്ന് ഊന്നിപ്പറഞ്ഞ ആർ‌എസ്‌എസ് മേധാവി, പുരാതന കാലം മുതൽ അവ ആഘോഷിക്കപ്പെടുന്നുണ്ടെന്നും അത് തുടരുമെന്നും കൂട്ടിച്ചേര്‍ത്തു. ഉത്സവങ്ങൾ സമൂഹത്തിന്റെ ജീവനാണെന്നും അതൊഴിവാക്കാൻ ചിലര്‍ ശ്രമിച്ചാലും നടക്കില്ലെന്നും അദ്ദേഹം വ്യക്തമാക്കി. ഉത്സവങ്ങൾ അവയുടെ ശുദ്ധമായ രൂപത്തിൽ ആഘോഷിക്കണമെന്ന് ഭഗവത് പറഞ്ഞു, അതുവഴി ആളുകൾക്ക് അവയുടെ ഗുണങ്ങൾ തുടർന്നും ലഭിക്കും.
പരമ്പരാഗത ആചാരങ്ങൾ പിന്തുടരുന്നത് വ്യക്തികളുടെയും സമൂഹത്തിന്റെയും മാനവികതയുടെയും ക്ഷേമത്തിന് കാരണമാകുമെന്നും പരിസ്ഥിതിയെ സംരക്ഷിക്കുമെന്നും അദ്ദേഹം കൂട്ടിച്ചേർത്തു. ലോകമെമ്പാടും ദീപാവലിക്ക് അംഗീകാരം ലഭിക്കുന്നുണ്ടെന്നും ഇന്ത്യയ്ക്ക് പുറത്ത് കൂടുതൽ പ്രാധാന്യം ലഭിക്കുന്നുണ്ടെന്നും ഭഗവത് പറഞ്ഞു. “ദീപാവലി മുമ്പ് ഇന്ത്യയിൽ മാത്രമേ ആഘോഷിച്ചിരുന്നുള്ളൂ, എന്നാൽ ഇപ്പോൾ യുഎസ്, യുകെ പാർലമെന്‍റുകളിലും ആഘോഷിക്കപ്പെടുന്നു”. ലോകമെമ്പാടുമുള്ള ആളുകൾ ഈ ഉത്സവത്തിന്‍റെ പ്രാധാന്യം തിരിച്ചറിയുന്നുണ്ടെന്നും ഇന്ത്യക്കാർക്ക് ഈ അവസരത്തിൽ ആശംസകൾ നേരുന്നുണ്ടെന്നും അദ്ദേഹം കൂട്ടിച്ചേർത്തു
