തിരുവനന്തപുരം: സംസ്ഥാനത്തെ 2027ലെ എസ്.എസ്.എൽ.സി, ഹയർ സെക്കൻഡറി, വി.എച്ച്.എസ്.ഇ പൊതുപരീക്ഷാ തീയതികൾ പ്രഖ്യാപിച്ചു. എസ്.എസ്.എൽ.സി പരീക്ഷകൾ മാർച്ച് ഒന്നിന് ആരംഭിക്കും. ഏപ്രിൽ അഞ്ചിന് മൂല്യനിർണയം തുടങ്ങും. മെയ് ആദ്യവാരം ഫലം പ്രസിദ്ധീകരിക്കാനാണ് തീരുമാനം. ഫെബ്രുവരി 16 മുതൽ 20 വരെയാണ് എസ്.എസ്.എൽ.സി മോഡൽ പരീക്ഷ. ഇത്തവണ 4.25 ലക്ഷം വിദ്യാർഥികൾ പരീക്ഷ എഴുതും. വിദ്യാഭ്യാസ മന്ത്രി എൻ. ഷംസുദ്ദീനാണ് വാർത്താസമ്മേളനത്തിൽ പരീക്ഷാ തീയതികൾ പ്രഖ്യാപിച്ചത്.
ഹയർ സെക്കൻഡറി, വി.എച്ച്.എസ്.ഇ ഒന്നും രണ്ടും വർഷ പൊതുപരീക്ഷകൾ മാർച്ച് രണ്ടിന് ആരംഭിച്ച് മാർച്ച് 30ന് അവസാനിക്കും. മാർച്ച് 12, 30 തീയതികളിൽ ഉച്ചയ്ക്ക് രണ്ടിനും മറ്റ് ദിവസങ്ങളിൽ രാവിലെ 9.30നുമാണ് പരീക്ഷകൾ ആരംഭിക്കുക. രണ്ടാം വർഷ ഹയർ സെക്കൻഡറി പ്രാക്ടിക്കൽ പരീക്ഷകൾ ജനുവരി 25ന് തുടങ്ങും. ഫെബ്രുവരി 11 മുതൽ 24 വരെയാണ് മോഡൽ പരീക്ഷ. ഹയർ സെക്കൻഡറി ഫലം മെയ് 15ന് പ്രസിദ്ധീകരിക്കും.
ഒന്നും രണ്ടും വർഷ ഹയർ സെക്കൻഡറി പരീക്ഷകൾക്കായി കേരളം, ഗൾഫ്, ലക്ഷദ്വീപ് എന്നിവിടങ്ങളിലായി ഏകദേശം 2,000 പരീക്ഷാകേന്ദ്രങ്ങൾ സജ്ജീകരിച്ചിട്ടുണ്ട്. ഒമ്പത് ലക്ഷത്തോളം വിദ്യാർഥികളാണ് പരീക്ഷ എഴുതുക. വൊക്കേഷണൽ ഹയർ സെക്കൻഡറി ഒന്നും രണ്ടും വർഷ പരീക്ഷകൾ 389 കേന്ദ്രങ്ങളിലായി ഏകദേശം 53,000 വിദ്യാർഥികൾ എഴുതും.
അതേസമയം, ഈ അധ്യയന വർഷത്തെ സ്കൂൾ ക്രിസ്മസ് പരീക്ഷകൾ ഡിസംബർ എട്ടിന് ആരംഭിച്ച് 17ന് അവസാനിക്കും. എൽ.പി വിഭാഗം ക്ലാസുകളിലെ പരീക്ഷകൾ ഡിസംബർ 11 മുതൽ 17 വരെയാണ്. ഡിസംബർ 18ന് സ്കൂളുകളിൽ ക്രിസ്മസ് ആഘോഷങ്ങൾ നടത്തിയശേഷം അവധിക്കായി അടയ്ക്കും. പത്തുദിവസത്തെ അവധിക്കുശേഷം ഡിസംബർ 28ന് സ്കൂളുകൾ വീണ്ടും തുറക്കും.
