തിരുവനന്തപുരം: ”ഇപ്പോൾത്തന്നെ ചെയ്യണമെന്ന് പറഞ്ഞ് ഫയൽ അയച്ചാൽ അതിന് താഴെ ഒപ്പിടാൻ ഇരിക്കുന്ന ആളല്ല ഞാൻ”. വൈദ്യുതി വാങ്ങുന്നതിനുള്ള കരാറിൽ ഒപ്പിടാൻ തനിക്കുമേൽ സമ്മർദമുണ്ടായെന്ന ആരോപണവുമായി മുഖ്യമന്ത്രി വി.ഡി. സതീശൻ ഇന്ന് നടത്തിയ പ്രതികരണമാണിത്. ആരാണ് മുഖ്യമന്ത്രിക്കുമേൽ സമ്മർദം ചെലുത്തിയത്? ഇതിന് പിന്നിലെ താൽപ്പര്യം എന്തായിരുന്നു? മുഖ്യമന്ത്രിയുടെ പരാമർശത്തോടെ ഉയരുന്ന ചോദ്യങ്ങളാണിവ.
വൈദ്യുതി വാങ്ങുന്നതിന് രണ്ട് ഓപ്ഷനുകളാണ് ഉണ്ടായിരുന്നതെന്ന് മുഖ്യമന്ത്രി പറയുന്നു. ഹിമാചലിൽനിന്നുള്ള വൈദ്യുതിക്ക് യൂണിറ്റിന് 14.50 രൂപയും ജിഎൻഎയുടേതിന് 8.63 രൂപ മുതൽ 8.93 രൂപ വരെയുമായിരുന്നു നിരക്ക്. ഇതിനിടെ ഹിമാചലിൽനിന്നുള്ള വൈദ്യുതി രാജസ്ഥാൻ കൊണ്ടുപോയതോടെ ജിഎൻഎ മാത്രമായി മുന്നിലുള്ള ഓപ്ഷൻ. ഈ ഫയലിൽ തീരുമാനമെടുത്തില്ലെങ്കിൽ നവംബർ ഒന്നു മുതൽ സംസ്ഥാനത്ത് ദീർഘകാല പവർകട്ട് വേണ്ടിവരുമെന്ന റിപ്പോർട്ടാണ് കെഎസ്ഇബി മുഖ്യമന്ത്രിക്ക് നൽകിയത്. അന്ന് എം.ജി. രാജമാണിക്യമായിരുന്നു വൈദ്യുതി ബോർഡ് ചെയർമാൻ.
റിപ്പോർട്ട് ലഭിച്ചിട്ടും 22 ദിവസമായി മുഖ്യമന്ത്രി ഫയലിൽ തീരുമാനമെടുക്കാതെ പിടിച്ചുവച്ചിരിക്കുകയാണെന്നും നവംബർ ഒന്നുമുതൽ സംസ്ഥാനത്ത് വലിയ തോതിൽ പവർകട്ട് ഉണ്ടാകുമെന്നും ചില മാധ്യമങ്ങളിൽ വാർത്തകൾ വന്നിരുന്നു. ഇത്തരത്തിൽ സമ്മർദം സൃഷ്ടിച്ച് ഫയലിൽ ഒപ്പിടുവിക്കാനാണ് ശ്രമം നടന്നതെന്നാണ് മുഖ്യമന്ത്രിയുടെ ആരോപണം. എന്നാൽ, സംസ്ഥാനത്ത് നിലവിൽ വൈദ്യുതി പ്രതിസന്ധിയില്ലെന്ന് പിന്നീട് ചുമതലയേറ്റ കെഎസ്ഇബി ചെയർമാൻ എൻ. പ്രശാന്തിന്റെ നേതൃത്വത്തിലുള്ള സംഘം റിപ്പോർട്ട് നൽകിയെന്നും മുഖ്യമന്ത്രി വ്യക്തമാക്കി.
ജിഎൻഎ കരാറുമായി ബന്ധപ്പെട്ട നിരക്കുകൾ താരതമ്യം ചെയ്യുന്ന ഫയൽ കെഎസ്ഇബിയിൽനിന്ന് വൈദ്യുതി മന്ത്രി വഴിയാണ് തന്റെ മുന്നിലെത്തിയതെന്നും മുഖ്യമന്ത്രി പറഞ്ഞു. അതിനാൽ ഇക്കാര്യങ്ങൾ മന്ത്രി അറിഞ്ഞില്ലെന്ന വാദം ശരിയല്ലെന്നും അദ്ദേഹം ചൂണ്ടിക്കാട്ടി. ഫയൽ ആദ്യം ബോർഡിൽനിന്ന് മന്ത്രിയുടെ മുന്നിലേക്കും അവിടെനിന്ന് മുഖ്യമന്ത്രിയുടെ പരിഗണനയ്ക്കുമാണ് എത്തുന്നത്. മുഖ്യമന്ത്രി പരിശോധിച്ച് കുറിപ്പുകൾ സഹിതം തിരിച്ചയക്കുന്നതും മന്ത്രിക്കുതന്നെയാണെന്ന് അദ്ദേഹം വിശദീകരിച്ചു.
വൈദ്യുതി വാങ്ങുന്നതുമായി ബന്ധപ്പെട്ട് മുഖ്യമന്ത്രിയും വൈദ്യുതി മന്ത്രി സണ്ണി ജോസഫും തമ്മിൽ അഭിപ്രായഭിന്നതയുണ്ടെന്ന റിപ്പോർട്ടുകൾ നേരത്തേ പുറത്തുവന്നിരുന്നു. ഹിമാചലിൽനിന്ന് വൈദ്യുതി വാങ്ങുന്നതാണ് സംസ്ഥാനത്തിന് ഗുണകരമെന്നായിരുന്നു അന്നത്തെ കെഎസ്ഇബി ചെയർമാൻ എം.ജി. രാജമാണിക്യത്തിന്റെ നിലപാട്. തുടക്കംമുതൽ ഈ നിലപാടിനൊപ്പമായിരുന്നു മന്ത്രിയും. എന്നാൽ, ഇതുസംബന്ധിച്ച തീരുമാനത്തിനായി ഫയൽ മുഖ്യമന്ത്രിക്ക് കൈമാറിയപ്പോൾ ബോർഡിന്റെ നിർദേശം മറികടന്ന് ജിഎൻഎയിൽനിന്ന് വൈദ്യുതി വാങ്ങാനുള്ള തീരുമാനമാണ് ഉണ്ടായത്. ഇതിന് മുൻകൈയെടുത്ത പുനീത് കുമാറിനെ ഊർജ സെക്രട്ടറിയായും നിയമിച്ചു. ഇതോടെ മുഖ്യമന്ത്രിയും വൈദ്യുതി മന്ത്രിയും വ്യത്യസ്ത നിലപാടുകളിലായി.
സംസ്ഥാനത്ത് വൈദ്യുതി പ്രതിസന്ധിയില്ലെന്ന പുതിയ കെഎസ്ഇബി ചെയർമാന്റെ റിപ്പോർട്ടും വൈദ്യുതി മന്ത്രി തള്ളിയിരുന്നു. ഇതോടെ വൈദ്യുതി വാങ്ങൽ കരാറുമായി ബന്ധപ്പെട്ട തർക്കം സർക്കാരിനുള്ളിലെ അഭിപ്രായഭിന്നതകൾ കൂടി പുറത്തുകൊണ്ടുവരുന്നതായി.
