ദുബായ്: യാത്രക്കിടെ കാറിന്റെ ടയർ പഞ്ചറായതോടെ വാഹനത്തിൽ നിന്നിറങ്ങിയ മലയാളി വിദ്യാർഥിനി ദുബായിൽ വാഹനാപകടത്തിൽ മരിച്ചു. തൊടുപുഴ സ്വദേശി നാഇഫ ബൽക്കീസ് (21) ആണ് മരിച്ചത്. ദുബായിയിൽ ബിസിനസ് നടത്തുന്ന ബിനു ഹമീദിന്റെയും സീനയുടെയും മകളാണ്.
കഴിഞ്ഞദിവസം ഉച്ചയ്ക്ക് ശേഷം 3ന് ദുബായ് റാഷിദിയയിലായിരുന്നു അപകടമുണ്ടായ്. ദുബായ് കനേഡിയൻ യൂണിവേഴ്സിറ്റിയിൽ അവസാന വർഷ ആർകിടെക്ട് വിദ്യാർഥിയായ നാഇഫ സഞ്ചരിച്ച കാറിന്റെ ടയർ പഞ്ചറായപ്പോൾ റോഡരികിൽ നിർത്തുകയും നാട്ടിൽ പോയിരുന്ന മാതാപിതാക്കളോട് കാര്യം ഫോൺ വിളിച്ച് പറയുകയും ചെയ്യുകയായിരുന്നു.
തുടർന്ന് സഹായത്തിനായി റിക്കവറി ടോൾ ഫ്രീ നമ്പറിൽ വിളിച്ചാൽ സഹായത്തിന് ആളെത്തുമെന്ന് പിതാവ് ബിനു പറഞ്ഞതനുസരിച്ച് കാറിൽ നിന്നിറങ്ങി ഫോൺ വിളിക്കുന്നതിടെ മറ്റൊരു വാഹനം ഇടിച്ചാണ് അപകടമെന്ന് ബന്ധുക്കൾ പറഞ്ഞു. അൽപ നിമിഷത്തിന് ശേഷം പിതാവ് ബിനു ഫോൺ വിളിച്ചപ്പോൾ നാഇഫ എടുത്തിരുന്നില്ല. വൈകാതെ ദുബായ് പോലീസിൽ നിന്ന് ഫോൺ വിളിയെത്തിയപ്പോഴാണ് അപകട വിവരം അറിയുന്നത്.
തുടർന്ന് മാതാപിതാക്കൾ ദുബായിലെത്തി. ദുബായ് പോലീസ് ഫോറൻസിക് വിഭാഗത്തിൽ സൂക്ഷിച്ചിട്ടുള്ള മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടികൾ പുരോഗമിക്കുന്നു. നിഹാൽ ഹമീദാണ് നാഇഫയുടെ സഹോദരൻ.
