തിരുവനന്തപുരം: മുൻ തിരുവനന്തപുരം മേയർ ആര്യ രാജേന്ദ്രൻ തലസ്ഥാനം വിടുന്നു. കോഴിക്കോട് ജില്ലയിൽ പാർട്ടി പ്രവർത്തനം നടത്താൻ അനുമതി തേടി ആര്യ ജില്ലാ കമ്മിറ്റിക്ക് കത്ത് നൽകി. കത്ത് ജില്ലാ കമ്മിറ്റി സംസ്ഥാന കമ്മിറ്റിക്ക് കൈമാറി. കഴിഞ്ഞ ദിവസം ചേർന്ന ജില്ലാ കമ്മിറ്റി യോഗത്തിലാണ് ആര്യയുടെ അപേക്ഷ പരിഗണിച്ചത്.
വ്യക്തിപരമായ ആവശ്യങ്ങൾ ചൂണ്ടിക്കാട്ടിയാണ് ആര്യ ജില്ലാ കമ്മിറ്റിക്ക് അപേക്ഷ നൽകിയത്. മുൻ എംഎൽഎ സച്ചിൻ ദേവിനെയാണ് ആര്യ വിവാഹം കഴിച്ചത്. സച്ചിന്റെ സ്വദേശം കോഴിക്കോടാണ്. ഇതിന്റെ അടിസ്ഥാനത്തിൽ പ്രവർത്തന മണ്ഡലം കോഴിക്കോട്ടേക്ക് മാറ്റിയേക്കുമെന്ന് ആര്യ നേരത്തെ പാർട്ടി പ്രവർത്തകരെ അറിയിച്ചിരുന്നു.
കോഴിക്കോട് നഗരത്തിൽ ഇരുവരും വീട് വാങ്ങി താമസം മാറിയെന്നാണ് വിവരം. ഇതോടെ ആര്യയുടെ പാർട്ടി പ്രവർത്തനവും കോഴിക്കോട്ടേക്ക് മാറാനാണ് സാധ്യത.
