തിരുവനന്തപുരം: വീട്ടിൽ നിന്നു വിളിച്ചപ്പോൾ ഇപ്പോൾ എത്തുമെന്ന് ഫോണിൽ വിളിച്ചു പറഞ്ഞ മകൻ പിന്നീട് പാങ്ങാപ്പാറയിലെ വീട്ടുമുറ്റത്തേക്ക് എത്തിയത് ചേതനയറ്റ ശരീരമായി. മകനെ വിളിച്ച് വാവിട്ടു കരഞ്ഞ പിതാവ് മധുവിനെയും മാതാവ് ധർമജയെയും ആശ്വസിപ്പിക്കാനാകാതെ ഒരു നാടൊന്നാകെ വിറങ്ങലിച്ചുനിന്നു.
‘‘അച്ചുവേ, നീ എഴുന്നേറ്റ് വാടാ… ഞാൻ പറഞ്ഞാൻ നീ എഴുന്നേറ്റ് വരില്ലേ’’ – എന്ന് നെഞ്ചുപൊട്ടി പിതാവ് മധു ചോദിച്ചപ്പോൾ കൂടിനിന്നവരുടെ എല്ലാം കണ്ണുനിറഞ്ഞു. ഒന്നുമറിയാത്ത തങ്ങളുടെ കുഞ്ഞിനെ എന്തിനു കൊന്നുവെന്ന ചോദ്യമാണു കുടുംബാംഗങ്ങൾ കണ്ണീരോടെ ആവർത്തിച്ചു ചോദിച്ചുകൊണ്ടിരുന്നത്. പ്രണയപ്പകയിൽ ജീവൻ നഷ്ടപ്പെട്ട പതിനേഴുകാരൻ എ.ഡി. അഭിരാമിനെ അവസാനമായി കാണാൻ സഹപാഠികളും സുഹൃത്തുക്കളും ഉൾപ്പെടെ നൂറുകണക്കിനാളുകളാണു വീട്ടിലേക്ക് ഒഴുകിയെത്തിയത്.
അതേസമയം സ്വകാര്യ ആശുപത്രിയിൽ സൂക്ഷിച്ചിരുന്ന മൃതദേഹം ഇന്നു രാവിലെ പത്തേകാലോടെയാണ് പാങ്ങാപ്പാറയിലെ വാടകവീട്ടിലേക്കു കൊണ്ടുവന്നത്. രാഷ്ട്രീയ നേതാക്കൾ ഉൾപ്പെടെ വീട്ടിലെത്തിയിരുന്നു. കഴക്കൂട്ടം ശാന്തിതീരത്താണ് സംസ്‌കാരം നടക്കുന്നത്.
