ന്യൂഡൽഹി: അറബിക്കടലിൽ സൊമാലിയൻ കടൽക്കൊള്ളക്കാർ തട്ടിയെടുത്ത് ബന്ദികളാക്കിയ ഇറാനിയൻ മത്സ്യബന്ധന കപ്പലായ ‘അസിനി’യിലെ 20 ജീവനക്കാരെ മോചിപ്പിച്ച് ഇന്ത്യൻ നാവികസേന. 48 മണിക്കൂർ നീണ്ട ഏകോപിത രക്ഷാദൗത്യത്തിലൂടെയാണ് ജീവനക്കാരെ മോചിപ്പിച്ചത്. സൊമാലിയയുടെ വടക്കുകിഴക്കൻ തീരത്ത് ബന്ദർ ബെയ്‌ലക്കും ഹാഫൂണിനും ഇടയിൽവെച്ച് ഒക്ടോബർ 29നാണ് ആയുധധാരികളായ കടൽക്കൊള്ളക്കാർ കപ്പൽ പിടിച്ചെടുത്തത്.
നാവികസേനയുടെ യുദ്ധക്കപ്പലായ ഐഎൻഎസ് കൊൽക്കത്തയുടെ നേതൃത്വത്തിലായിരുന്നു ദൗത്യം. പിന്തുണയ്ക്കായി പി-8ഐ സമുദ്ര നിരീക്ഷണ വിമാനം, എംക്യു-9 പ്ലാറ്റ്‌ഫോമുകൾ എന്നിവയും വിന്യസിച്ചു. ഇന്ത്യൻ വ്യോമസേനയുടെ സി-17 വിമാനത്തിൽനിന്ന് എയർഡ്രോപ്പ് വഴിയാണ് മറൈൻ കമാൻഡോകളെ ദൗത്യസ്ഥലത്ത് എത്തിച്ചത്.
രക്ഷാദൗത്യത്തിൽ പങ്കെടുത്ത സൈനികരെ കേന്ദ്ര പ്രതിരോധ മന്ത്രി രാജ്‌നാഥ് സിങ് അഭിനന്ദിച്ചു. നാവികസേനയുടെ പ്രവർത്തനക്ഷമതയും സമുദ്രത്തിലെ ഭീഷണികളോട് ഉടനടി പ്രതികരിക്കാനുള്ള രാജ്യത്തിന്റെ ശേഷിയുമാണ് ദൗത്യം വ്യക്തമാക്കുന്നതെന്ന് അദ്ദേഹം എക്സിൽ കുറിച്ചു.
ജീവനക്കാരുടെ ജീവൻ സംരക്ഷിക്കുന്നതിലും സമുദ്രസുരക്ഷ ഉറപ്പാക്കുന്നതിലുമുള്ള ഇന്ത്യയുടെ പ്രതിബദ്ധതയും ശേഷിയും സൈനികർ തെളിയിച്ചുവെന്നും ഇന്ത്യൻ മഹാസമുദ്ര മേഖലയുടെ സുരക്ഷയ്ക്കായി രാജ്യം തുടർന്നും നിലകൊള്ളുമെന്നും രാജ്‌നാഥ് സിങ് കൂട്ടിച്ചേർത്തു.
