കാഞ്ഞിരപ്പള്ളി (കോട്ടയം): ദേശീയപാത 183-ൽ ചോറ്റിയിൽ നിരവധി വാഹനങ്ങളിലേക്ക് കാർ ഇടിച്ചുകയറ്റിയുണ്ടായ അപകടം ആത്മഹത്യാശ്രമമായിരുന്നുവെന്ന് ഡ്രൈവർ പൊലീസിനോട് മൊഴി നൽകി. സംഭവത്തിൽ പത്തുപേർക്ക് പരിക്കേറ്റിരുന്നു. അപകടത്തിനിടയാക്കിയ കാർ ഓടിച്ച കുട്ടിക്കൽ പുത്തൂർ ശാരോൺ ഫിലിപ്പ് (27) അറസ്റ്റിലായി. മനഃപൂർവമുള്ള നരഹത്യാശ്രമത്തിനാണ് ഇയാൾക്കെതിരേ പൊലീസ് കേസെടുത്തത്. അപകടത്തിൽ പരിക്കേറ്റ ഇയാൾ കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്.
ഞായറാഴ്ച രാവിലെ 8.15-ഓടെയായിരുന്നു ചോറ്റി ജങ്ഷനിൽ അപകടം. കൂട്ടിക്കൽ മഠത്തിൽ അൻസാരി (65), മഠത്തിൽ സഹിൽ (31), മടുക്ക മരുതുംവയലിൽ ശ്യാംജിത്ത് (35), ഭാര്യ ശാലിനി (30), മക്കളായ അദ്വൈത് (ഒൻപത്), ആവണി (നാല്), ചോറ്റി ഇല്ലക്കുളത്ത് പി.വി. രാജൻ (65), കൊച്ചുമക്കളായ രേവന്ത് (12), ശ്രേവന്ദ് (11), ചോറ്റി പ്ലാമുട് രാജു (71) എന്നിവർക്കാണ് പരിക്കേറ്റത്. പരിക്കേറ്റവർ വിവിധ ആശുപത്രികളിൽ ചികിത്സ തേടി. മൂന്നുപേർ പ്രാഥമിക ചികിത്സയ്ക്കുശേഷം മടങ്ങി.
അഞ്ച് കാറുകൾ, ഒരു ഓട്ടോറിക്ഷ, ഒരു സ്കൂട്ടർ എന്നിവ അപകടത്തിൽപ്പെട്ടു. ഒരു മണിക്കൂറോളം ദേശീയപാതയിൽ ഗതാഗതം തടസ്സപ്പെട്ടു.
മുണ്ടക്കയം ഭാഗത്തുനിന്ന് അമിതവേഗത്തിലെത്തിയ കാർ ആദ്യം മുന്നിൽ പോയ മറ്റൊരു കാറിൽ ഇടിച്ചു. തുടർന്ന് മുന്നോട്ടുപോയ കാർ അതേ ദിശയിൽ സഞ്ചരിച്ചിരുന്ന ഓട്ടോറിക്ഷയിലും മറ്റൊരു കാറിന്റെ പിന്നിലും ഇടിക്കുകയായിരുന്നു. നിയന്ത്രണം നഷ്ടപ്പെട്ട കാർ എതിർദിശയിൽ പാതയോരത്ത് നിർത്തിയിട്ടിരുന്ന സ്കൂട്ടറിലും ദേശീയപാതയിലേക്ക് പ്രവേശിക്കാൻ കാത്തുനിന്ന കാറിലും ഇടിച്ചു.
അപകടത്തിനുശേഷം കാർ നിർത്തിയെങ്കിലും ലോക്കായതോടെ ഡ്രൈവറെ പുറത്തെടുക്കാൻ നാട്ടുകാരും അഗ്നിരക്ഷാസേനയും ഇടപെടേണ്ടിവന്നു. ഡ്രൈവർക്കും പരിക്കേറ്റിരുന്നു.
കൂട്ടിക്കൽ സ്വദേശികളായ അൻസാരിയും സഹിലും ഓട്ടോറിക്ഷയിൽ യാത്രചെയ്യുകയായിരുന്നു. മടുക്ക സ്വദേശി ശ്യാംജിത്തും കുടുംബവും കാഞ്ഞിരപ്പള്ളി ഭാഗത്തേക്ക് പോകുന്നതിനിടെയാണ് അപകടമുണ്ടായത്. കാർ പിന്നിൽ ഇടിച്ചതുമാത്രമാണ് ഓർമയിലുള്ളതെന്ന് ശ്യാംജിത്ത് പറഞ്ഞു. ഇടിയുടെ ആഘാതത്തിൽ ഓട്ടോറിക്ഷ തലകീഴായി മറിഞ്ഞു. നാലുവയസ്സുകാരിയായ മകൾ ഉൾപ്പെടെ കുടുംബാംഗങ്ങൾക്കും പരിക്കേറ്റു.
