ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യാ സഖ്യത്തിന്റെ നേതൃത്വത്തിൽ ഇന്ന് മഹാറാലി. കൊണാട്ട് പ്ലേസിൽനിന്ന് ഉച്ചയ്ക്ക് 12 മണിക്ക് ആരംഭിക്കുന്ന റാലി രാംലീല മൈതാനിയിലെ പൊതുസമ്മേളനത്തോടെ സമാപിക്കും. രാജ്യത്തിന്റെ വിവിധ ഭാഗങ്ങളിൽനിന്നായി പത്തുലക്ഷത്തോളം പേർ റാലിയിൽ പങ്കെടുക്കുമെന്നാണ് പ്രതിപക്ഷത്തിന്റെ പ്രതീക്ഷ.
കേരളത്തിൽനിന്നടക്കം ആയിരക്കണക്കിന് നേതാക്കളും പ്രവർത്തകരും റാലിയിൽ പങ്കെടുക്കാൻ ഡൽഹിയിലെത്തിയിട്ടുണ്ട്. റാലിക്ക് അനുമതി നൽകിയിട്ടില്ലെന്ന് ഡൽഹി പോലീസ് അറിയിച്ചതായാണ് റിപ്പോർട്ട്. ഇതിന്റെ പശ്ചാത്തലത്തിൽ നഗരത്തിലുടനീളം കനത്ത സുരക്ഷയാണ് ഒരുക്കിയിരിക്കുന്നത്. ആയിരത്തോളം പോലീസുകാരെയും അർധസൈനിക വിഭാഗങ്ങളെയും വിവിധയിടങ്ങളിൽ വിന്യസിച്ചിട്ടുണ്ട്.
സെൻട്രൽ ഡൽഹിയിൽ രാവിലെ മുതൽ ഗതാഗത നിയന്ത്രണം ഏർപ്പെടുത്തി. രാവിലെ 10 മുതൽ വൈകിട്ട് അഞ്ചുവരെയാണ് നിയന്ത്രണം. സാഹചര്യങ്ങൾക്കനുസരിച്ച് ചില റോഡുകളിൽ വാഹനങ്ങൾക്ക് യാത്രാനുമതി നൽകും. യാത്രക്കാർ യാത്ര മുൻകൂട്ടി ആസൂത്രണം ചെയ്യണമെന്ന് ഡൽഹി ട്രാഫിക് പോലീസ് നിർദേശിച്ചു.
അതേസമയം, മഹാറാലിയിൽ സിജെപി പങ്കെടുക്കില്ല. റാലിക്ക് പൂർണ പിന്തുണയുണ്ടെങ്കിലും സ്വതന്ത്ര നിലനിൽപ്പ് കാത്തുസൂക്ഷിക്കേണ്ടതിനാലാണ് പങ്കെടുക്കാത്തതെന്ന് അഭിജിത് ദീപ്കെ പറഞ്ഞു. സിജെപി സ്വതന്ത്രവും നിഷ്പക്ഷവുമായ വേദിയാണെന്നും നിലവിലെ പോരാട്ടത്തിന്റെ ലക്ഷ്യം വലുതാണെന്നും അദ്ദേഹം വ്യക്തമാക്കി. വോട്ട് കൊള്ളയ്‌ക്കെതിരെ പോരാടുന്ന എല്ലാ സംഘടനകൾക്കും പിന്തുണ നൽകുമെന്നും അഭിജിത് ദീപ്കെ കൂട്ടിച്ചേർത്തു.
