പാലക്കാട്: പാലക്കാട് പതിനാറുകാരന്റെ കുത്തേറ്റ് ചികിത്സയിലായിരുന്ന മുത്തശ്ശൻ മരിച്ചു. കാവശ്ശേരി വാഴക്കച്ചിറ സ്വദേശി സുലൈമാൻ (65) ആണ് മരിച്ചത്. ഈ മാസം 19ന് വൈകിട്ട് ഏഴുമണിയോടെ കാവശ്ശേരിയിലെ വീട്ടിലായിരുന്നു സംഭവം.
സുലൈമാന്റെ മകളുടെ മകനായ പതിനാറുകാരൻ പത്തുവയസ്സുകാരിയായ സഹോദരിയുമായുള്ള തർക്കത്തിനിടെ കത്തികൊണ്ട് ആക്രമിക്കാൻ ശ്രമിക്കുകയായിരുന്നു. ഇതിനിടെ കൊച്ചുമകളെ രക്ഷിക്കാൻ ശ്രമിച്ച സുലൈമാന് കുത്തേൽക്കുകയായിരുന്നു. നെഞ്ചിലും കഴുത്തിലും വയറിലുമാണ് കുത്തേറ്റത്.
ആലത്തൂരിലെ സ്വകാര്യ ആശുപത്രിയിൽ പ്രവേശിപ്പിച്ച സുലൈമാന്റെ നില ഗുരുതരമായതിനെത്തുടർന്ന് തൃശ്ശൂർ മെഡിക്കൽ കോളേജ് ആശുപത്രിയിലേക്ക് മാറ്റി. ചികിത്സ തുടരുന്നതിനിടെ ഇന്നലെ രാത്രിയായിരുന്നു മരണം.
സംഭവശേഷം ഒളിവിൽ പോയ പതിനാറുകാരനെ പിന്നീട് പോലീസ് പിടികൂടിയിരുന്നു. പ്രതിയുടെ മറ്റു പശ്ചാത്തലങ്ങളെക്കുറിച്ച് പോലീസ് അന്വേഷണം തുടരുകയാണ്.
