കൊല്ലം: കുളത്തൂപ്പുഴയിൽ നിയന്ത്രണം വിട്ട ബൈക്ക് വൈദ്യുതിത്തൂണിലും വീടിന്റെ മതിലിലും ഇടിച്ചുണ്ടായ അപകടത്തിൽ പ്ലസ് ടു വിദ്യാർഥി മരിച്ചു. കല്ലുവെട്ടാൻകുഴി ചരുവിള പുത്തൻവീട്ടിൽ ആകാശ് (17) ആണ് മരിച്ചത്. ഇന്നലെ രാത്രി 11 മണിയോടെയായിരുന്നു അപകടം.
ചായ കുടിക്കാനായി ബൈക്കിൽ പോകുകയായിരുന്ന ആകാശ് കുളത്തൂപ്പുഴ സാംനഗർ റോഡിൽനിന്ന് അഞ്ചൽ റോഡിലേക്ക് വരുന്നതിനിടെയാണ് അപകടമുണ്ടായത്. പച്ചക്കടയ്ക്ക് സമീപം ബൈക്ക് നിയന്ത്രണം വിട്ട് വൈദ്യുതിത്തൂണിൽ ഇടിക്കുകയായിരുന്നു. തുടർന്ന് തൊട്ടടുത്ത വീടിന്റെ മതിലിലും ഇടിച്ച് ബൈക്ക് മറിഞ്ഞു.
ഗുരുതരമായി പരിക്കേറ്റ ആകാശിനെ ഉടൻ തിരുവനന്തപുരം മെഡിക്കൽ കോളജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
കല്ലുവെട്ടാംകുഴി ഹയർ സെക്കൻഡറി സ്കൂളിലെ പ്ലസ് ടു വിദ്യാർഥിയാണ് ആകാശ്. തിരുവനന്തപുരം സ്വദേശിയായ ആകാശ് കുളത്തൂപ്പുഴ കല്ലുവെട്ടാംകുഴിയിലെ ബന്ധുവീട്ടിൽ താമസിച്ചാണ് പഠിച്ചിരുന്നത്.
