“സിപിഎം തേഞ്ഞുതേഞ്ഞ് ഇല്ലാതാവുകയാണ്. മണ്ണാർക്കാട്ട് എന്റെ സ്വാധീനം ഓരോ മണൽത്തരിയിലുമുണ്ട്. അത് ഇല്ലാതാക്കാൻ സിപിഎമ്മിലെ പുതിയ വേതാളങ്ങൾക്കാവില്ല” – പി.കെ. ശശി പറഞ്ഞു.
സിപിഎം ഓഫീസിന് സമീപത്തെ പുറമ്പോക്ക് സ്ഥലത്ത് സ്ഥാപിച്ചിരുന്ന സിഎംപിയുടെ ഫ്ലെക്സ് നശിപ്പിക്കപ്പെട്ടത് പരിശോധിക്കാനാണ് പ്രവർത്തകർക്കൊപ്പം പോയതെന്നും പാർട്ടി ഓഫീസിലേക്ക് കടന്നുകയറാനല്ലെന്നും അദ്ദേഹം വ്യക്തമാക്കി. തനിക്കുനേരെ ആക്രമണമുണ്ടായെന്ന പ്രചാരണം വ്യാജമാണെന്നും ശരീരത്തിൽ ഒരു പോറൽപോലും ഏറ്റിട്ടില്ലെന്നും ശശി പറഞ്ഞു. എന്നാൽ, ആരോ മനഃപൂർവം കല്ലെറിഞ്ഞതിനെത്തുടർന്ന് രണ്ട് പ്രവർത്തകർക്ക് പരിക്കേറ്റതായും അദ്ദേഹം ആരോപിച്ചു.
“ദൂരെനിന്ന് കല്ലെടുത്തെറിയാൻ ഏത് ഭീരുവിനും കഴിയും. രാഷ്ട്രീയമായാണ് നേരിടേണ്ടത്. അതിൽ പരാജയപ്പെട്ട സിപിഎമ്മിന്റെ അവസാനത്തെ അടവാണ് ഫ്ലെക്സ് നശിപ്പിക്കൽ” – ശശി പറഞ്ഞു.
സിഎംപി ശക്തമായ രാഷ്ട്രീയ നിലപാടുമായി മുന്നോട്ടുപോകുമെന്നും നാട്ടിലെ സമാധാനാന്തരീക്ഷം നിലനിർത്താൻ എല്ലാ പിന്തുണയും നൽകുമെന്നും അദ്ദേഹം കൂട്ടിച്ചേർത്തു. കള്ളുഷാപ്പിലെ തൊഴിൽപ്രശ്നം ചർച്ചയിലൂടെ പരിഹരിക്കണമെന്നാണ് പാർട്ടിയുടെ നിലപാടെന്നും ശശി വ്യക്തമാക്കി.
പിരിഞ്ഞുപോയ തൊഴിലാളിക്കു പകരം മറ്റൊരാളെ നിയമിക്കുന്നതാണ് നിലവിലുള്ള കീഴ്‌വഴക്കമെന്ന് അദ്ദേഹം പറഞ്ഞു. ഇതുമായി ബന്ധപ്പെട്ട് കരാറുകാരനുമായി ചർച്ച നടത്തി പിരിഞ്ഞശേഷം നിയമത്തിന്റെ പേരുപറഞ്ഞ് പുതിയ നിയമനം തടയുകയാണെന്നാണ് ശശിയുടെ ആരോപണം. വരുമാനം വർധിപ്പിക്കണമെന്ന ആവശ്യത്തെച്ചൊല്ലിയാണ് തൊഴിലാളികൾ സമരം നടത്തിയതെന്നും ഇക്കാര്യത്തിൽ സിപിഎമ്മുകാർ അസഹിഷ്ണുത കാണിക്കുന്നത് എന്തിനാണെന്നും അദ്ദേഹം ചോദിച്ചു.
ആളൊഴിഞ്ഞ പാർട്ടി ഓഫീസിലേക്ക് പുതിയ ആളുകളെ എത്തിക്കാനുള്ള സാഹചര്യമൊരുക്കുകയാണ് ഇതിനു പിന്നിലെ തന്ത്രമെന്നും ശശി ആരോപിച്ചു. പാർട്ടി ഓഫീസ് മരണവീടുപോലെയായിരുന്നുവെന്നും ശരിയുടെയും സത്യത്തിന്റെയും ഭാഗത്താണ് സിഎംപി ഇതുവരെ നിലകൊണ്ടിട്ടുള്ളതെന്നും അദ്ദേഹം പറഞ്ഞു.
കെ. ഷാനിഫ്, എ. അഷറഫ്, കലാധരൻ, അരവിന്ദാക്ഷൻ തുടങ്ങിയവരും വാർത്താസമ്മേളനത്തിൽ പങ്കെടുത്തു.
