പാലക്കാട്: മരിച്ച രണ്ടുപേരുടെ പെൻഷൻ തുക വ്യാജ ഒപ്പിട്ട് കൈപ്പറ്റി സിപിഎം ബ്രാഞ്ച് സെക്രട്ടറി. പാലക്കാട് ശ്രീകൃഷ്ണപുരം പഞ്ചായത്തിലെ പതിനൊന്നാം വാർഡിലാണ് സംഭവം. മണ്ണമ്പറ്റ ബ്രാഞ്ച് സെക്രട്ടറി സത്യനാരായണനെതിരെയാണ് ആരോപണം ഉയർന്നത്. സംഭവത്തിനു പിന്നാലെ ഇയാളെ ബ്രാഞ്ച് സെക്രട്ടറി സ്ഥാനത്തുനിന്ന് നീക്കി.
കൃഷ്ണൻകുട്ടി പണിക്കർ, നാരായണ ഗുപ്തൻ എന്നിവരുടെ പെൻഷൻ തുകയാണ് തട്ടിയെടുത്തതെന്നാണ് ആരോപണം. കൃഷ്ണൻകുട്ടി പണിക്കർ ജൂലൈ ആദ്യവാരത്തിലും നാരായണ ഗുപ്തൻ ഓഗസ്റ്റിലുമാണ് മരിച്ചത്. ഇരുവരുടെയും മരണശേഷവും സെപ്റ്റംബർ മാസം വരെയുള്ള പെൻഷൻ തുക കൈപ്പറ്റിയെന്നാണ് ആരോപണം.
ഇരുവരുടെയും പേരിൽ വ്യാജ ഒപ്പിട്ട് പെൻഷൻ തുക കൈപ്പറ്റിയതായി രേഖപ്പെടുത്തിയായിരുന്നു തട്ടിപ്പെന്നാണ് വിവരം. സംഭവം പുറത്തുവന്നതിനു പിന്നാലെ സത്യനാരായണനെ ബ്രാഞ്ച് സെക്രട്ടറി സ്ഥാനത്തുനിന്ന് നീക്കി.
സംഭവത്തിൽ സത്യനാരായണനെതിരെ കേസെടുക്കണമെന്ന് പ്രതിപക്ഷം ആവശ്യപ്പെട്ടു.
