നെതന്യാഹുവിന്റെ രാഷ്ട്രീയ ഭാവി തുലാസിൽ? അറബ് വോട്ടുകൾ നിർണ്ണായകം; അധികാരപ്പോരിൽ മറുവശത്ത് മൻസൂർ അബ്ബാസ്; റാം പാർട്ടിയുടെ വേരോട്ടം ശക്തം

ഇസ്രയേൽ: ഇസ്രയേലിൽ വീണ്ടും അധികാരപ്പോരിന് കളമൊരുങ്ങുമ്പോൾ രാഷ്ട്രീയ നിർണായകശക്തിയായി മാറുകയാണ് അറബ് പാർട്ടികളും അവയുടെ വോട്ടുബാങ്കും. പ്രധാനമന്ത്രി ബെഞ്ചമിൻ നെതന്യാഹുവിന്റെ രാഷ്ട്രീയ ഭാവി നിർണയിക്കുന്നതിൽ മൻസൂർ അബ്ബാസിന്റെ നേതൃത്വത്തിലുള്ള റാം പാർട്ടിക്കും ഇസ്രയേലിലെ അറബ് വോട്ടർമാർക്കും നിർണായക പങ്കുണ്ടാകുമെന്നാണ് വിലയിരുത്തൽ. ഗാസ യുദ്ധവും ജൂത–അറബ് ബന്ധങ്ങളിലെ സംഘർഷങ്ങളും തിരഞ്ഞെടുപ്പ് ചർച്ചകളെ സ്വാധീനിക്കുന്നതിനിടെ, അധികാരത്തിന്റെ ഭാഗമാകാനുള്ള അറബ് പാർട്ടികളുടെ നീക്കവും ശ്രദ്ധേയമാകുകയാണ്.

2021 ജൂൺ രണ്ടിന് ടെൽ അവീവിലെ ഒരു ഹോട്ടൽ മുറിയിൽ ഒപ്പുവെച്ച രാഷ്ട്രീയ കരാർ ഇസ്രയേലിന്റെ ചരിത്രത്തിലെ നിർണായക സംഭവങ്ങളിലൊന്നായിരുന്നു. രാഷ്ട്രീയ നിലപാടുകളിൽ വ്യത്യസ്ത ചേരികളിലുള്ള നഫ്താലി ബെന്നറ്റും യായിർ ലാപിഡും റാം പാർട്ടി നേതാവ് മൻസൂർ അബ്ബാസും ഒരുമിച്ചെത്തിയത് നെതന്യാഹുവിന്റെ ദീർഘകാല ഭരണത്തിന് അന്ത്യം കുറിക്കാനുള്ള നീക്കത്തിന്റെ ഭാഗമായിരുന്നു. 2009 മുതൽ തുടർച്ചയായി അധികാരത്തിലിരുന്ന നെതന്യാഹുവിനെ പുറത്താക്കാനുള്ള ഈ കൂട്ടുകെട്ട് ഇസ്രയേൽ രാഷ്ട്രീയത്തിൽ വലിയ ചർച്ചകൾക്കിടയാക്കി.

ഇസ്രയേലിന്റെ ചരിത്രത്തിൽ ആദ്യമായി ഒരു സ്വതന്ത്ര അറബ് പാർട്ടി ജൂത നേതാക്കൾ നയിച്ച ഭരണസഖ്യത്തിന്റെ ഭാഗമായി. അറബ് പാർട്ടികൾക്ക് രാഷ്ട്രീയമായി അകലം പാലിച്ചിരുന്ന സമീപനത്തിൽനിന്നുള്ള ശ്രദ്ധേയമായ മാറ്റമായിരുന്നു ഇത്. എന്നാൽ, അതിന് മുമ്പുതന്നെ നെതന്യാഹു അധികാരം നിലനിർത്തുന്നതിനായി മൻസൂർ അബ്ബാസുമായി ചർച്ചകൾ നടത്തിയിരുന്നു. ഭൂരിപക്ഷം ഉറപ്പാക്കാനുള്ള ശ്രമത്തിന്റെ ഭാഗമായി അബ്ബാസിനെ സഖ്യത്തിലേക്ക് ക്ഷണിച്ച നെതന്യാഹുവിന്റെ നീക്കത്തിന് പകരം, എതിരാളികളുമായി ചേർന്ന് അദ്ദേഹത്തെ അധികാരത്തിൽനിന്ന് പുറത്താക്കാനാണ് അബ്ബാസ് തീരുമാനിച്ചത്.

വർഷങ്ങൾക്കിപ്പുറം, പുതിയ തിരഞ്ഞെടുപ്പിലേക്ക് നീങ്ങുന്ന ഇസ്രയേലിൽ അറബ് പാർട്ടികളുടെ പ്രസക്തി വീണ്ടും വർധിക്കുകയാണ്. നെതന്യാഹുവിന്റെ ലിക്കുഡ് പാർട്ടി സ്ഥാപിച്ച പ്രചാരണബോർഡുകളിൽ പ്രതിപക്ഷ നേതാക്കൾക്കൊപ്പം മൻസൂർ അബ്ബാസിന്റെ ചിത്രവും ഇടംപിടിച്ചിട്ടുണ്ട്. അറബ് പാർട്ടികൾക്ക് അധികാരം ലഭിച്ചാൽ ഇസ്രയേൽ അപകടത്തിലാകുമെന്ന സന്ദേശമാണ് നെതന്യാഹു തന്റെ തീവ്ര ജൂത ദേശീയവാദികളായ വോട്ടർമാർക്കിടയിൽ ഉയർത്തുന്നതെന്ന് റിപ്പോർട്ടിൽ പറയുന്നു. പ്രതിപക്ഷ നേതാവായ ഗാഡി ഐസൻകോട്ട് മൻസൂർ അബ്ബാസിനെ ആലിംഗനം ചെയ്യുന്ന വ്യാജ എ.ഐ. ദൃശ്യങ്ങളും നെതന്യാഹുവിന്റെ തിരഞ്ഞെടുപ്പ് പ്രചാരണസംഘം പ്രചരിപ്പിച്ചതായി റിപ്പോർട്ടിലുണ്ട്.

എന്നാൽ, ഇത്തരം പ്രചാരണങ്ങൾക്കിടയിലും അധികാരത്തിൽ പങ്കാളിത്തം ഉറപ്പാക്കാനുള്ള നിലപാടിലാണ് അബ്ബാസ്. പാർലമെന്റിന് പുറത്തുനിന്ന് പ്രതിഷേധിക്കുന്നതിനുപകരം ഭരണത്തിന്റെ ഭാഗമായിക്കൊണ്ട് അറബ് ജനതയുടെ ആവശ്യങ്ങൾ നേടിയെടുക്കുകയാണ് ലക്ഷ്യമെന്ന് അദ്ദേഹം വ്യക്തമാക്കുന്നു. അധികാരത്തിന്റെ ഭാഗമാകാതെ തങ്ങളുടെ അവകാശങ്ങൾ സംരക്ഷിക്കാനാകില്ലെന്ന പ്രായോഗിക രാഷ്ട്രീയമാണ് റാം പാർട്ടി മുന്നോട്ടുവയ്ക്കുന്നത്.

ഇസ്രയേലിലെ ജനസംഖ്യയുടെ ഏകദേശം 21 ശതമാനം അറബ് പൗരന്മാരാണ്. 1948-ലെ യുദ്ധത്തിനും പലായനങ്ങൾക്കും ശേഷവും പ്രദേശത്ത് തുടരുകയും പിന്നീട് ഇസ്രയേൽ പൗരന്മാരായി ജീവിക്കുകയും ചെയ്ത പലസ്തീനികളുടെ പിൻതലമുറക്കാരാണ് ഇവരിൽ വലിയൊരു വിഭാഗം. രാജ്യത്തിന്റെ പാർലമെന്റായ നെസെറ്റിലേക്ക് മത്സരിക്കാനും വോട്ടുചെയ്യാനും ഇവർക്ക് അവകാശമുണ്ട്.

നെസെറ്റിൽ ആകെ 120 സീറ്റുകളാണുള്ളത്. സർക്കാർ രൂപീകരിക്കാൻ കുറഞ്ഞത് 61 സീറ്റുകൾ വേണം. ആനുപാതിക പ്രാതിനിധ്യ സമ്പ്രദായം നിലനിൽക്കുന്നതിനാൽ ഒരു പാർട്ടിക്ക് ഒറ്റയ്ക്ക് കേവലഭൂരിപക്ഷം നേടുക പ്രയാസമാണ്. അതുകൊണ്ടുതന്നെ ചെറുപാർട്ടികളുടെ പിന്തുണ പലപ്പോഴും സർക്കാർ രൂപീകരണത്തിൽ നിർണായകമാകുന്നു.

റിപ്പോർട്ടിൽ പരാമർശിക്കുന്ന സർവേ കണക്കുകൾ പ്രകാരം നെതന്യാഹുവിന്റെ സഖ്യത്തിനും പ്രതിപക്ഷത്തിനും ഒറ്റയ്ക്ക് ഭൂരിപക്ഷത്തിലെത്താൻ കഴിയാത്ത സാഹചര്യമാണ് നിലനിൽക്കുന്നത്. മൻസൂർ അബ്ബാസിന്റെ റാം പാർട്ടിക്ക് അഞ്ച് സീറ്റുകളും അഹമ്മദ് തിബിയുടെ നേതൃത്വത്തിലുള്ള അറബ് പാർട്ടികളുടെ ജോയിന്റ് ലിസ്റ്റിന് എട്ട് സീറ്റുകളും ലഭിക്കുമെന്നാണ് സർവേ പ്രവചനം. ഈ കണക്കുകൾ ശരിയാകുന്നപക്ഷം അറബ് പാർട്ടികളുടെ പിന്തുണയില്ലാതെ സർക്കാർ രൂപീകരിക്കുക പ്രയാസകരമാകും.

നിർബന്ധിത സൈനിക സേവനവുമായി ബന്ധപ്പെട്ട തർക്കങ്ങളെത്തുടർന്ന് നെതന്യാഹുവിന്റെ സഖ്യത്തിലെ ഷാസ്, യുണൈറ്റഡ് തോറ ജൂഡായിസം തുടങ്ങിയ പാർട്ടികൾ അകന്നുനിൽക്കുന്നതും അദ്ദേഹത്തിന് വെല്ലുവിളിയാണ്. അതിനാൽ, തിരഞ്ഞെടുപ്പിന് ശേഷമുള്ള സഖ്യചർച്ചകളിൽ അറബ് പാർട്ടികളുടെ നിലപാട് കൂടുതൽ പ്രാധാന്യമാർജിക്കുമെന്നാണ് വിലയിരുത്തൽ.

2023 ഒക്ടോബർ ഏഴിന് ഹമാസ് നടത്തിയ ആക്രമണത്തിനും തുടർന്ന് ഗാസയിൽ ഇസ്രയേൽ നടത്തിയ യുദ്ധത്തിനും ശേഷം ജൂത–അറബ് ബന്ധങ്ങളിൽ വലിയ വിള്ളലുകളുണ്ടായതായി റിപ്പോർട്ട് ചൂണ്ടിക്കാട്ടുന്നു. അറബ് പൗരന്മാരെ സംശയത്തോടെ കാണുന്ന സമീപനം ജൂതസമൂഹത്തിന്റെ ചില വിഭാഗങ്ങളിൽ ശക്തമായതായും തീവ്ര വലതുപക്ഷ നേതാക്കൾ ഈ സാഹചര്യത്തെ രാഷ്ട്രീയമായി ഉപയോഗിക്കുന്നതായും റിപ്പോർട്ടിൽ പറയുന്നു.

ധനമന്ത്രി ബെസാലെൽ സ്‌മോട്രിച്ചും ദേശീയ സുരക്ഷാ മന്ത്രി ഇതാമർ ബെൻ-ഗ്വിറും ഉൾപ്പെടെയുള്ള തീവ്ര വലതുപക്ഷ നേതാക്കൾ അറബ് പ്രദേശങ്ങളിൽ ജൂതവത്കരണം വ്യാപിപ്പിക്കുമെന്ന് പ്രഖ്യാപിച്ചതായും റിപ്പോർട്ടിലുണ്ട്. അറബ് പാർട്ടികളെയും സ്ഥാനാർഥികളെയും തിരഞ്ഞെടുപ്പിൽനിന്ന് വിലക്കാനുള്ള നീക്കങ്ങൾ സുപ്രീം കോടതിയുടെ ഇടപെടലിനെത്തുടർന്ന് തടയപ്പെട്ടതായും വാർത്ത വിശദീകരിക്കുന്നു.

ഈ സാഹചര്യത്തിൽ മൻസൂർ അബ്ബാസ് സ്വീകരിച്ച നിലപാട് സ്വന്തം സമൂഹത്തിനുള്ളിലും വിമർശനങ്ങൾക്കിടയാക്കി. ഒക്ടോബർ ഏഴിലെ ഹമാസ് ആക്രമണത്തെ അദ്ദേഹം ശക്തമായി അപലപിക്കുകയും യുദ്ധത്തിൽനിന്ന് പലായനം ചെയ്ത ജൂതകുടുംബങ്ങൾക്ക് സുരക്ഷിത താവളങ്ങൾ ഒരുക്കുന്നതിന് പിന്തുണ നൽകുകയും ചെയ്തു. അക്രമവും രക്തച്ചൊരിച്ചിലും പലസ്തീൻ ജനതയ്ക്ക് കൂടുതൽ ദുരിതമേ ഉണ്ടാക്കൂവെന്നാണ് അദ്ദേഹത്തിന്റെ നിലപാട്.

എന്നാൽ, ഗാസയിൽ നിരപരാധികളായ പലസ്തീനികൾ കൊല്ലപ്പെടുമ്പോൾ അബ്ബാസ് മൃദുസമീപനം സ്വീകരിക്കുന്നുവെന്നും സയണിസ്റ്റ് പാർട്ടികളുടെ പിന്തുണ നേടാനായി സ്വന്തം നിലപാടുകളിൽ വിട്ടുവീഴ്ച ചെയ്യുന്നുവെന്നും മറ്റ് അറബ് കക്ഷികൾ വിമർശിച്ചു. വൈകാരിക പ്രതികരണങ്ങൾക്കപ്പുറം രാഷ്ട്രീയ പങ്കാളിത്തത്തിലൂടെ ജനങ്ങളുടെ അവകാശങ്ങൾ നേടിയെടുക്കുകയാണ് വേണ്ടതെന്ന വാദത്തിലാണ് അബ്ബാസ് ഉറച്ചുനിൽക്കുന്നത്.

ഇസ്രയേലിലെ അറബ് പൗരന്മാർ നേരിടുന്ന പ്രധാന പ്രശ്നങ്ങളിൽ ഒന്നാണ് സംഘടിത കുറ്റകൃത്യങ്ങളും ഗുണ്ടാസംഘങ്ങളുടെ അക്രമങ്ങളും. അറബ് നഗരങ്ങളിലെ കൊലപാതകങ്ങൾ തടയുന്നതിൽ പൊലീസ് വേണ്ടത്ര ഇടപെടുന്നില്ലെന്ന ആരോപണവും ഉയരുന്നുണ്ട്. കഴിഞ്ഞ ഒരു വർഷത്തിനിടെ 252 അറബ് പൗരന്മാർ വെടിയേറ്റ് മരിച്ചതായി റിപ്പോർട്ട് വ്യക്തമാക്കുന്നു.

സ്വന്തം ഭൂമിയിൽ വീടുകൾ നിർമിക്കുന്നതിനുള്ള അനുമതി നിഷേധിക്കുന്നതും വീടുകൾ പൊളിച്ചുനീക്കുന്നതും അറബ് കുടുംബങ്ങളുടെ ജീവിതത്തെ ബാധിക്കുന്ന പ്രശ്നങ്ങളായി റിപ്പോർട്ട് ചൂണ്ടിക്കാട്ടുന്നു. ഈ വിഷയങ്ങളിൽ മാറ്റമുണ്ടാക്കുന്നതിനായി ജൂത–അറബ് രാഷ്ട്രീയ സഹകരണം ശക്തിപ്പെടുത്താനാണ് അബ്ബാസിന്റെ ശ്രമം.

മുൻ പൊലീസ് കമാൻഡറും ആഭ്യന്തര സുരക്ഷാ വകുപ്പിൽ ഉപമന്ത്രിയായിരുന്നയാളുമായ യോവ് സെഗലോവിറ്റ്സിനെ റാം പാർട്ടിയുടെ തിരഞ്ഞെടുപ്പ് പട്ടികയിൽ ഉൾപ്പെടുത്തിയത് ഈ നീക്കത്തിന്റെ ഭാഗമായാണ് അവതരിപ്പിക്കപ്പെടുന്നത്. ഇസ്ലാമിസ്റ്റ് പശ്ചാത്തലമുള്ള അറബ് പാർട്ടിയിൽ ഒരു ജൂത മുൻ സുരക്ഷാ ഉദ്യോഗസ്ഥൻ ഇടംപിടിക്കുന്നത് ഇസ്രയേൽ രാഷ്ട്രീയത്തിൽ ശ്രദ്ധേയമായ നീക്കമാണ്. സംഘടിത കുറ്റകൃത്യങ്ങൾ തടയാനും പൗരാവകാശങ്ങൾ ഉറപ്പാക്കാനും ഇരുവിഭാഗങ്ങളും ഒരുമിച്ച് പ്രവർത്തിക്കണമെന്ന സന്ദേശമാണ് ഇതിലൂടെ നൽകുന്നതെന്ന് അബ്ബാസ് വ്യക്തമാക്കുന്നു.

അതേസമയം, തീവ്ര ജൂത വോട്ടർമാരുടെ എതിർപ്പ് ഭയന്ന് അറബ് പാർട്ടികളുമായി നേരിട്ട് സഖ്യമുണ്ടാക്കില്ലെന്ന് പ്രതിപക്ഷ നേതാവ് ഗാഡി ഐസൻകോട്ട് പ്രഖ്യാപിച്ചതായും റിപ്പോർട്ടിലുണ്ട്. എന്നാൽ, തിരഞ്ഞെടുപ്പിന് ശേഷം ഭൂരിപക്ഷം ഉറപ്പാക്കാൻ അറബ് പാർട്ടികളുടെ പിന്തുണ തേടേണ്ട സാഹചര്യം ഇരുചേരികൾക്കും ഉണ്ടായേക്കാമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.

അറബ് വോട്ടർമാരുടെ പോളിങ് ശതമാനം ഉയരുമെന്ന പ്രവചനവും തിരഞ്ഞെടുപ്പിൽ നിർണായകമാണ്. കഴിഞ്ഞ തിരഞ്ഞെടുപ്പിലെ 56 ശതമാനത്തിൽനിന്ന് ഇത്തവണ പോളിങ് 63 ശതമാനത്തിലേക്ക് ഉയർന്നേക്കുമെന്നാണ് റിപ്പോർട്ടിൽ പറയുന്നത്. തീവ്ര വലതുപക്ഷത്തിന്റെ രാഷ്ട്രീയ മുന്നേറ്റത്തെ ചെറുക്കാൻ വോട്ടവകാശം ഉപയോഗിക്കണമെന്ന ചിന്ത അറബ് സമൂഹത്തിൽ ശക്തമാകുന്നതായും റിപ്പോർട്ട് വ്യക്തമാക്കുന്നു.

ഗാസയിലെയും വെസ്റ്റ് ബാങ്കിലെയും സംഘർഷങ്ങൾക്കൊപ്പം ഇസ്രയേലിന്റെ ആഭ്യന്തര രാഷ്ട്രീയവും നിർണായക ഘട്ടത്തിലേക്ക് നീങ്ങുകയാണ്. വംശീയ ധ്രുവീകരണവും സുരക്ഷാ