ചെന്നൈ: തമിഴ് ഗാനമായ ‘വാന്മതി’യിലെ സംഗീതഭാഗങ്ങൾ അനുവാദമില്ലാതെ ഉപയോഗിച്ചെന്ന ആരോപണത്തിൽ ഗായിക ചിന്മയി ശ്രീപദയ്ക്കും സംഗീത സംവിധായകൻ ഷബീർ സുൽത്താനും വക്കീൽ നോട്ടീസ് അയച്ച് പ്രമുഖ ഗായിക കൗശികി ചക്രവർത്തി. 2015ൽ ദർബാർ ഫെസ്റ്റിവലിൽ താൻ ആലപിച്ച സംഗീതഭാഗങ്ങൾ അനുമതിയോ അംഗീകാരമോ നൽകാതെ ഗാനത്തിൽ ഉൾപ്പെടുത്തിയെന്നാണ് കൗശികിയുടെ ആരോപണം. അതേസമയം, ഗാനത്തിൽ പകർപ്പവകാശ ലംഘനമുണ്ടെന്ന കാര്യം തനിക്ക് അറിയില്ലായിരുന്നുവെന്ന് ചിന്മയി പ്രതികരിച്ചു.
2015ൽ ദർബാർ ഫെസ്റ്റിവലിൽ അവതരിപ്പിച്ച സംഗീതഭാഗങ്ങൾ ‘വാന്മതി’യിൽ ഉപയോഗിച്ചുവെന്ന് ആരോപിച്ച് കൗശികി ഇൻസ്റ്റഗ്രാമിൽ വീഡിയോ പങ്കുവെച്ചിരുന്നു. നിയമനടപടികളിലേക്ക് കടക്കുന്നതിന് മുൻപ് വിഷയം ചർച്ചയിലൂടെ പരിഹരിക്കാൻ ശ്രമിച്ചെങ്കിലും ചർച്ചകൾ പരാജയപ്പെട്ടതിനെ തുടർന്നാണ് വക്കീൽ നോട്ടീസ് അയച്ചതെന്ന് അവർ വ്യക്തമാക്കി.
ആരോപണത്തിന് പിന്നാലെ സംഗീത സംവിധായകൻ ഷബീർ സുൽത്താൻ തന്റെ സമൂഹമാധ്യമ പേജുകളിൽനിന്ന് ഗാനം പിൻവലിച്ചിട്ടുണ്ട്. കൗശികിയുടെ വക്കീൽ നോട്ടീസ് ലഭിച്ചതായി ചിന്മയിയും ഇൻസ്റ്റഗ്രാം സ്റ്റോറിയിലൂടെ സ്ഥിരീകരിച്ചു.
റെക്കോർഡിങ് ആർട്ടിസ്റ്റ് എന്ന നിലയിൽ ഗാനത്തിലെ തന്റെ ഭാഗങ്ങൾ ആലപിക്കുക മാത്രമാണ് ചെയ്തതെന്നും നോട്ടീസും ഇൻസ്റ്റഗ്രാം റീലും പുറത്തുവരുന്നതുവരെ ഗാനത്തിൽ ആരോപിക്കപ്പെടുന്ന പകർപ്പവകാശ ലംഘനത്തെക്കുറിച്ച് അറിയില്ലായിരുന്നുവെന്നും ചിന്മയി വ്യക്തമാക്കി. വിഷയത്തിൽ ഷബീർ സുൽത്താൻ ഇതുവരെ പരസ്യമായി പ്രതികരിച്ചിട്ടില്ല.
