തിരുവനന്തപുരം: ഭൂമി ഏറ്റെടുക്കലും മസാല ബോണ്ട് ഇടപാടും ഉൾപ്പെടെ കിഫ്ബിയുടെ നിർണായക തീരുമാനങ്ങൾ വീണ്ടും വിവാദത്തിൽ. കണ്ണൂരിലും പാലക്കാട്ടുമായി 12,710 കോടി രൂപയുടെ ഭൂമി ഏറ്റെടുക്കാൻ കിൻഫ്രയുടെ നിർദേശത്തിന്റെ അടിസ്ഥാനത്തിൽ അനുമതി നൽകിയെന്ന വിവരങ്ങളാണ് ഇപ്പോൾ ചർച്ചയാകുന്നത്. മസാല ബോണ്ട് ഇറക്കുന്നതിനെ അന്നത്തെ ചീഫ് സെക്രട്ടറിയും ധനകാര്യ സെക്രട്ടറിയും എതിർത്തിരുന്നുവെന്നും പുറത്തുവന്ന രേഖകൾ വ്യക്തമാക്കുന്നതായി റിപ്പോർട്ടുകൾ പറയുന്നു.
ആരോഗ്യ, വ്യവസായ മേഖലകളുടെ വികസനം ലക്ഷ്യമിട്ടാണ് കിൻഫ്രയ്ക്കായി കണ്ണൂരിലും പാലക്കാട്ടുമായി ഭൂമി ഏറ്റെടുക്കാൻ അനുമതി നൽകിയത്. കിൻഫ്ര സമർപ്പിച്ച കൺസെപ്റ്റ് നോട്ടിന്റെ അടിസ്ഥാനത്തിൽ കാര്യമായ ചർച്ചകളില്ലാതെ കിഫ്ബി ബോർഡ് യോഗം പദ്ധതിക്ക് അംഗീകാരം നൽകുകയായിരുന്നുവെന്നാണ് ആരോപണം. കണ്ണൂരിലെ പട്ടാന്നൂർ, കോളാരി വില്ലേജുകളിലുൾപ്പെടുന്ന പണയത്താംപറമ്പ് മേഖലയിൽ 1,000 ഏക്കറും പാലക്കാട്ടെ ഓലപ്പതി, കന്നമ്പ്ര എന്നിവിടങ്ങളിലായി 560 ഏക്കറുമാണ് പദ്ധതിക്കായി ഏറ്റെടുത്തത്.
എന്നാൽ, കണ്ണൂരിൽ വൻ തുക ചെലവഴിച്ച് ഏറ്റെടുത്ത ഭൂമിയിൽ ഇതുവരെ വികസന പ്രവർത്തനങ്ങൾ ആരംഭിച്ചിട്ടില്ലെന്ന വിമർശനവും ഉയരുന്നുണ്ട്. ഭൂമി ഏറ്റെടുക്കലിന്റെ നടപടിക്രമങ്ങളും നഷ്ടപരിഹാരത്തുകയും സംബന്ധിച്ച കാര്യങ്ങൾ ഇതോടെ വീണ്ടും ശ്രദ്ധാകേന്ദ്രമായിരിക്കുകയാണ്.
പട്ടാന്നൂർ, കോളാരി വില്ലേജുകളിലെ ഭൂമി ഏറ്റെടുക്കലുമായി ബന്ധപ്പെട്ട് ക്രമക്കേടുകൾ നടന്നതായി വിജിലൻസ് കണ്ടെത്തിയിരുന്നു. വ്യക്തമായ നിയമപരമായ രേഖകളില്ലാതെ വൻ തുക നഷ്ടപരിഹാരമായി അനുവദിച്ചെന്നും നടപടിക്രമങ്ങൾ പാലിക്കുന്നതിൽ ഉദ്യോഗസ്ഥരുടെ ഭാഗത്തുനിന്ന് ഗുരുതര വീഴ്ചയുണ്ടായെന്നും അന്വേഷണത്തിൽ കണ്ടെത്തിയതായാണ് റിപ്പോർട്ട്. ഔദ്യോഗിക പദവി ദുരുപയോഗം ചെയ്ത് സർക്കാരിന് സാമ്പത്തിക നഷ്ടമുണ്ടാക്കിയെന്ന ആരോപണത്തിൽ മട്ടന്നൂർ സ്പെഷ്യൽ തഹസിൽദാർ ഓഫീസിലെ ഉദ്യോഗസ്ഥർ ഉൾപ്പെടെയുള്ളവർക്കെതിരെ വിജിലൻസ് കേസ് രജിസ്റ്റർ ചെയ്തിരുന്നു.
മസാല ബോണ്ട് ഇറക്കുന്നതുമായി ബന്ധപ്പെട്ട തീരുമാനങ്ങളും വിവാദത്തിന് ആക്കം കൂട്ടുന്നു. ഉയർന്ന പലിശനിരക്കിൽ ബോണ്ട് ഇറക്കുന്നതിനെ അന്നത്തെ ചീഫ് സെക്രട്ടറിയും ധനകാര്യ സെക്രട്ടറിയും എതിർത്തിരുന്നുവെന്നാണ് പുറത്തുവന്ന രേഖകളെക്കുറിച്ചുള്ള റിപ്പോർട്ടുകൾ. എന്നാൽ എതിർപ്പുകൾ മറികടന്ന് പദ്ധതിക്ക് അംഗീകാരം നൽകിയെന്നാണ് ആരോപണം.
കിഫ്ബി ബോർഡ് യോഗങ്ങളുടെ മിനിറ്റ്സിൽ നിർണായക തീരുമാനങ്ങൾ കൈക്കൊണ്ട രീതി സംബന്ധിച്ച വിവരങ്ങളും ഇപ്പോൾ ചർച്ചയാകുന്നുണ്ട്. ആവശ്യമായ പരിശോധനകളും വിശദമായ ചർച്ചകളും കൂടാതെയാണ് ചില തീരുമാനങ്ങൾ പാസാക്കിയതെന്ന വിമർശനമാണ് ഉയരുന്നത്.
സർക്കാർ സംവിധാനങ്ങൾക്ക് മുകളിൽ സ്വതന്ത്ര അധികാരകേന്ദ്രമായി കിഫ്ബി പ്രവർത്തിക്കുന്നുവെന്ന യുഡിഎഫ് ഉൾപ്പെടെയുള്ള പ്രതിപക്ഷത്തിന്റെ ആരോപണങ്ങൾക്ക് പുതിയ വിവരങ്ങൾ ശക്തിപകരുന്നതായാണ് വിലയിരുത്തൽ. അതേസമയം, ഭൂമി ഏറ്റെടുക്കൽ നടപടികളിലെ ആരോപണങ്ങളും കിഫ്ബിയുടെ തീരുമാനങ്ങളുമായി ബന്ധപ്പെട്ട രേഖകളും വിശദമായി പരിശോധിച്ചാലേ വിഷയത്തിലെ ഉത്തരവാദിത്വം സംബന്ധിച്ച് വ്യക്തത വരൂ.
