തിരുവനന്തപുരം: പത്തനംതിട്ട കോൺഗ്രസിൽ രാഹുൽ മാങ്കൂട്ടത്തിലിനെ ചൊല്ലി തർക്കം മുറുകുന്നു. അടൂരിലെ പാർട്ടിക്ക് രാഹുലിന്റെ സംരക്ഷണം ആവശ്യമില്ലെന്ന് ബ്ലോക്ക് പ്രസിഡന്റ് ആബിത് ഷഹിൽ പറഞ്ഞു. രാഹുൽ മാങ്കൂട്ടത്തിലിനെ നേരത്തെ കെപിസിസി പ്രസിഡന്റ് പുറത്താക്കിയതാണ്. പാർട്ടിയുടെ കാര്യം നോക്കാൻ പാർട്ടിയുണ്ടെന്നും ആബിത് ഷഹിൽ പറഞ്ഞു. ഡിസിസി പ്രസിഡന്റ് സതീഷ് കൊച്ചുപറമ്പിൽ രാഹുലിനെ പിന്തുണച്ചതിന് പിന്നാലെയാണ് ബ്ലോക്ക് പ്രസിഡന്റിന്റെ പ്രതികരണമെത്തിയത്.
അതുപോലെ പാർട്ടിയുടെ ഔദ്യോഗിക നിലപാടിന് വിരുദ്ധമായി രാഹുൽ മാങ്കൂട്ടത്തിൽ അടൂരിലെ പ്രവർത്തനങ്ങളിൽ ഇടപെടുന്നത് അച്ചടക്ക ലംഘനമാണെന്നാണ് ഒരു വിഭാഗം വാദിക്കുന്നത്. എന്നാൽ തന്റെ സഹപ്രവർത്തകർക്ക് പ്രശ്നങ്ങളുണ്ടാകുമ്പോൾ ഇടപെടുന്നത് സ്വാഭാവികമാണെന്നാണ് രാഹുലിന്റെ വാദം. അതേസമയം പത്തനംതിട്ടയിലെ കോൺഗ്രസിൽ ഈ തർക്കം വരും ദിവസങ്ങളിൽ കൂടുതൽ പ്രതികരണങ്ങൾക്ക് വഴിവെക്കുമെന്നാണ് കരുതപ്പെടുന്നത്.
കഴിഞ്ഞ ദിവസം അടൂരിൽ ഡിവൈഎഫ്ഐ- യൂത്ത് കോൺഗ്രസ് പ്രവർത്തകർ തമ്മിലുണ്ടായ സംഘർഷത്തിൽ രാഹുൽ മാങ്കൂട്ടത്തിൽ ഒന്നാം പ്രതിയാക്കി കേസ് രജിസ്റ്റർ ചെയ്തിട്ടുണ്ട്. സിപിഎം നേതാവിന്റെ വാഹനം അടിച്ചുതകർത്തു എന്നതാണ് പ്രധാന ആരോപണം .അടൂർ ഏഴംകുളത്താണ് സംഘർഷമുണ്ടായത്. പ്രാദേശികമായി തുടങ്ങിയ തർക്കം പിന്നീട് എസ്എഫ്ഐ-യൂത്ത് കോൺഗ്രസ് പ്രവർത്തകർ തമ്മിലുള്ള വലിയ ഏറ്റുമുട്ടലിലേക്ക് മാറുകയായിരുന്നു.
സംഭവുമായി ബന്ധപ്പെട്ട് മൂന്ന് കേസുകളാണ് അടൂർ പെോലീസ് രജിസ്റ്റർ ചെയ്തിട്ടുള്ളത്. എസ്എഫ്ഐ പ്രവർത്തകരുടെ പരാതിയിലാണ് രാഹുൽ മാങ്കൂട്ടത്തിനെതിരെ കേസെടുത്തത്. തിരിച്ച് രാഹുൽ മാങ്കൂട്ടവും സംഘവും എസ്എഫ്ഐ പ്രവർത്തകർക്കെതിരെയും പരാതി നൽകിയിട്ടുണ്ട്. സിപിഎം നേതാവിന്റെ കാർ തകർത്തതിലും കേസെടുത്തിട്ടുണ്ട്.
