ന്യൂഡൽഹി: രാഹുൽ ഗാന്ധിയും ഇന്ത്യാ സഖ്യ നേതാക്കളും ചേർന്ന് സുപ്രീം കോടതിയിൽ സമർപ്പിച്ച ഹർജിയിൽ 14 പിഴവുകൾ കണ്ടെത്തി. കോർട്ട് ഫീസ് അടച്ചതിലെ കുറവ് ഉൾപ്പെടെയുള്ള പിഴവുകളാണ് കോടതി രജിസ്ട്രി ചൂണ്ടിക്കാട്ടിയത്. പിഴവുകൾ തിരുത്തി ഹർജി വീണ്ടും സമർപ്പിക്കാൻ നിർദേശം നൽകി. ഇന്ന് പരിഗണിക്കുന്ന കേസുകളുടെ പട്ടികയിൽ ഹർജി ഉൾപ്പെടുത്തിയിട്ടില്ല. മാധ്യമപ്രവർത്തകർക്കെതിരായ പൊലീസ് നടപടിയുമായി ബന്ധപ്പെട്ട ഹർജികൾ ഉൾപ്പെടെയുള്ള വിഷയങ്ങൾ ഇന്ന് സുപ്രീം കോടതി പരിഗണിച്ചേക്കും.
അതേസമയം, ചീഫ് ജസ്റ്റിസ് സൂര്യകാന്ത് രാജിവയ്ക്കണമെന്ന കോൺഗ്രസ് കേരള ഘടകത്തിന്റെ ട്വീറ്റിനെതിരെ കൂടുതൽ അഭിഭാഷക സംഘടനകൾ രംഗത്തെത്തി. സുപ്രീം കോടതി അഡ്വക്കേറ്റ്സ് ഓൺ റെക്കോർഡ് അസോസിയേഷനും ട്വീറ്റിനെ വിമർശിച്ച് പ്രസ്താവന പുറത്തിറക്കി. ട്വീറ്റ് പാർട്ടിയുടെ അറിവോടെയല്ലെന്നായിരുന്നു കെപിസിസി അധ്യക്ഷൻ സണ്ണി ജോസഫിന്റെ വിശദീകരണം.
സുപ്രീം ജുഡീഷ്യറിയെ തകർക്കാനും രാജ്യത്ത് അരാജകത്വം സൃഷ്ടിക്കാനുമാണ് ഇത്തരം നീക്കങ്ങളെന്ന് കേന്ദ്രമന്ത്രി കിരൺ റിജിജു വിമർശിച്ചു.
അതിനിടെ, ജന്തർ മന്തർ സമരവേദിയല്ലെന്ന ഡൽഹി പൊലീസിന്റെ വിജ്ഞാപനത്തിനെതിരെയും ഡൽഹി ഹൈക്കോടതിയിൽ ഹർജി സമർപ്പിച്ചിട്ടുണ്ട്. അതേസമയം, രാംലീല മൈതാനത്ത് സമരങ്ങൾ അനുവദിക്കുന്നതിനെതിരെ സമീപത്തെ വ്യാപാരികളും രംഗത്തെത്തി. സമരങ്ങൾ അനുവദിച്ചാൽ 2,000 കോടി രൂപയുടെ സാമ്പത്തിക നഷ്ടമുണ്ടാകുമെന്നാണ് വ്യാപാരി സംഘടനകളുടെ വാദം.
