ടെക്സസ്: മകളുടെ കസ്റ്റഡി സംബന്ധിച്ച കോടതി വിധി മുൻ ഭർത്താവിന് അനുകൂലമായി വന്നതിന് മണിക്കൂറുകൾക്കകം നാല് വയസുകാരിയായ മകളെ വെടിവച്ച് കൊലപ്പെടുത്തി അമ്മ ആത്മഹത്യ ചെയ്തു. അമേരിക്കയിലെ ടെക്സസ് സംസ്ഥാനത്തെ ഹ്യൂസ്റ്റണിലാണ് സംഭവം.
35 വയസുകാരിയായ സിബെല്ലെ സവെല്ലയാണ് മകൾ വിവിയനെ വെടിവച്ച് കൊലപ്പെടുത്തിയ ശേഷം സ്വയം വെടിവച്ചത്. മകളെ മുൻ ഭർത്താവ് ആരോൺ സവെല്ലയ്ക്ക് കൈമാറേണ്ടിയിരുന്ന സമയത്താണ് ദാരുണസംഭവമുണ്ടായത്. പ്രാദേശിക സമയം വൈകിട്ട് 5.45ഓടെ വീട്ടിലെ മൂന്നാം നിലയിൽ വെടിവെപ്പ് നടന്നതായി വിവരം ലഭിച്ചതിനെ തുടർന്ന് ഹ്യൂസ്റ്റൺ പോലീസ് സ്ഥലത്തെത്തി. അവിടെ വെടിയേറ്റ നിലയിൽ വിവിയനെ കണ്ടെത്തുകയായിരുന്നു. കുട്ടി സംഭവസ്ഥലത്തുവെച്ചുതന്നെ മരിച്ചതായി പോലീസ് അറിയിച്ചു.
മകളെ വെടിവച്ചതിന് പിന്നാലെ സിബെല്ലെ സ്വയം മുഖത്ത് വെടിവച്ചതായാണ് പോലീസ് പറയുന്നത്. ഗുരുതരമായി പരുക്കേറ്റ നിലയിൽ ആശുപത്രിയിൽ പ്രവേശിപ്പിച്ചെങ്കിലും ബുധനാഴ്ച അവർ മരിച്ചതായി പോലീസ് അറിയിച്ചു.
Related Post
അതേസമയം ബ്രസീലിൽ നിന്നുള്ള സിബെല്ലെയും ആരോണും നാല് വർഷത്തെ വിവാഹജീവിതത്തിന് ശേഷം 2024 നവംബറിൽ വിവാഹമോചനം നേടിയിരുന്നു. തുടർന്ന് മകളുടെ കസ്റ്റഡിയെച്ചൊല്ലി ഇരുവരും തമ്മിൽ കടുത്ത നിയമപോരാട്ടം നടന്നു. സംഭവത്തിന് തൊട്ടുമുമ്പ് നടന്ന കുടുംബകോടതി നടപടിയിൽ വിവിയന്റെ കസ്റ്റഡി ആരോണിന് നൽകാൻ കോടതി ഉത്തരവിട്ടിരുന്നു. ചൊവ്വാഴ്ച വൈകിട്ട് തന്നെ മകളെ പിതാവിന് കൈമാറേണ്ടതായിരുന്നു. ആരോണിന് വേണ്ടി കേസ് വാദിച്ച അഭിഭാഷക ഷാർലറ്റ് റെയിൻവാട്ടർ കുടുംബം ആകെ തകർന്നിരിക്കുകയാണെന്ന് പറഞ്ഞു. 28 വർഷമായി കുടുംബനിയമ മേഖലയിൽ പ്രവർത്തിക്കുന്ന തനിക്ക് ഇതുപോലൊരു സംഭവം മുമ്പ് നേരിടേണ്ടിവന്നിട്ടില്ലെന്നും അവർ വ്യക്തമാക്കി.
“28 വർഷമായി ഞാൻ കുടുംബനിയമ രംഗത്ത് പ്രവർത്തിക്കുന്നു. ഇതുപോലൊരു സംഭവം ഒരിക്കലും കണ്ടിട്ടില്ല. ചൊവ്വാഴ്ച കോടതിയിൽ ഉണ്ടായിരുന്ന ആരും ഇത്തരമൊരു ഫലമാണ് ഉണ്ടാകാൻ പോകുന്നതെന്ന് കരുതിയിരുന്നില്ല,” റെയിൻവാട്ടർ പറഞ്ഞു.
കുട്ടിയെ സംരക്ഷിക്കാൻ ശ്രമിക്കുന്ന പിതാവിനോട് നിയമം ആവശ്യപ്പെടുന്നതെല്ലാം ആരോൺ ചെയ്തിരുന്നുവെന്ന് കുടുംബാംഗങ്ങൾ പറഞ്ഞു. അദ്ദേഹം കോടതിയിൽ വിശ്വാസമർപ്പിക്കുകയും എല്ലാ ഉത്തരവുകളും പാലിക്കുകയും നിയമനടപടികൾ പൂർത്തിയാകുന്നതിനായി കാത്തിരിക്കുകയും ചെയ്തിരുന്നു. ചൊവ്വാഴ്ച കോടതി വിവിയന്റെ പ്രാഥമിക കസ്റ്റഡി അദ്ദേഹത്തിന് നൽകിയതോടെ അന്ന് വൈകിട്ട് മകൾ അച്ഛന്റെ വീട്ടിലേക്ക് മടങ്ങേണ്ടതായിരുന്നു. എന്നാൽ അവൾ ഒരിക്കലും വീട്ടിലെത്തിയില്ല- കുടുംബാംഗം പറഞ്ഞു.