കോതമംഗലം: ഭാര്യയ്ക്ക് മറ്റൊരാളുമായി അടുപ്പമുണ്ടെന്ന സംശയത്തെ തുടർന്ന് എറണാകുളം കോതമംഗലത്ത് 61കാരിയെ ഭർത്താവ് കുത്തിക്കൊലപ്പെടുത്തിയതായി എഫ്ഐആർ. കുത്തുകുഴി മാരമംഗലം ഹാപ്പി നഗറിൽ കുഞ്ഞമ്മയാണ് കൊല്ലപ്പെട്ടത്. സംഭവത്തിൽ ഭർത്താവ് പി.വി. കുര്യാക്കോസ് (65) പൊലീസ് കസ്റ്റഡിയിലാണ്.
പുലർച്ചെ രണ്ടുമണിയോടെയായിരുന്നു സംഭവം. അടുക്കളയിൽ ഉപയോഗിക്കുന്ന സ്റ്റീൽ കത്തി ഉപയോഗിച്ച് കുര്യാക്കോസ് കുഞ്ഞമ്മയെ പത്തോളം തവണ കുത്തിയെന്നാണ് പൊലീസിന്റെ പ്രാഥമിക വിവരം. ഭാര്യയെ കൊലപ്പെടുത്തിയ വിവരം കുര്യാക്കോസ് തന്നെയാണ് വിദേശത്തുള്ള മകനെ ഫോണിൽ വിളിച്ച് അറിയിച്ചത്. മകൻ അയൽവാസിയെ വിവരമറിയിച്ചതിനെ തുടർന്ന് അയൽവാസി വീട്ടിലെത്തി പൊലീസിനെ അറിയിക്കുകയായിരുന്നു. തുടർന്ന് പൊലീസ് സ്ഥലത്തെത്തി കുര്യാക്കോസിനെ കസ്റ്റഡിയിലെടുത്തു.
മറ്റൊരാളുമായി ഭാര്യയ്ക്ക് അടുപ്പമുണ്ടെന്ന സംശയമാണ് കൊലപാതകത്തിന് കാരണമെന്നാണ് മകളുടെ ഭർത്താവിന്റെ മൊഴിയുടെ അടിസ്ഥാനത്തിൽ രജിസ്റ്റർ ചെയ്ത എഫ്ഐആറിൽ പറയുന്നത്. കുര്യാക്കോസിന്റെ മൊഴിയിലും ഇക്കാര്യം പരാമർശിക്കുന്നുണ്ട്. എന്നാൽ കൊലപാതകത്തിലേക്ക് നയിച്ച സാഹചര്യം സംബന്ധിച്ച് കൂടുതൽ വ്യക്തത ലഭിക്കേണ്ടതുണ്ടെന്നാണ് പൊലീസ് പറയുന്നത്.
Related Post
മൂന്നാഴ്ച മുൻപാണ് കുര്യാക്കോസിന് ബൈപാസ് ശസ്ത്രക്രിയ നടത്തിയത്. ശസ്ത്രക്രിയയ്ക്ക് ശേഷം സംസാരിക്കാൻ ബുദ്ധിമുട്ടുണ്ടായിരുന്നതായും കാലിന് പരിക്കുണ്ടായിരുന്നതായും പറയുന്നു. ശസ്ത്രക്രിയയ്ക്ക് ശേഷം വിഷാദാവസ്ഥയിലായിരുന്നുവെന്നും വിവരമുണ്ട്. ഇതിനിടെയാണ് ഭാര്യയെ കൊലപ്പെടുത്തിയ സംഭവം.
വിശദമായ ചോദ്യം ചെയ്യലിന് ശേഷമേ കൊലപാതകത്തിലേക്ക് നയിച്ച യഥാർഥ കാരണങ്ങൾ വ്യക്തമാകൂവെന്ന് പൊലീസ് അറിയിച്ചു. കുഞ്ഞമ്മയുടെ പോസ്റ്റുമോർട്ടം നടപടികൾ പൂർത്തിയായി. വിദേശത്തുള്ള മകൻ നാട്ടിലെത്തിയ ശേഷമായിരിക്കും സംസ്കാരം.