പഞ്ചാബ്: ലഹരിക്കടത്ത് തടയാൻ ചുമതലയുള്ള കൗണ്ടർ ഇന്റലിജൻസ് യൂണിറ്റിലെ ഇൻസ്പെക്ടർ ഹെറോയിനും അനധികൃത തോക്കുകളുമായി അറസ്റ്റിൽ. ഫിറോസ്പുർ കൗണ്ടർ ഇന്റലിജൻസ് യൂണിറ്റ് ഇൻചാർജായ ഇൻസ്പെക്ടർ ബൽദേവ് സിങ്ങിനെയാണ് പോലീസ് അറസ്റ്റ് ചെയ്തത്. ഇയാളുടെ കൈവശത്തുനിന്ന് 3.35 കിലോ ഹെറോയിൻ, ആറ് പിസ്റ്റളുകൾ, ആറ് മൊബൈൽ ഫോണുകൾ എന്നിവ പിടിച്ചെടുത്തതായി പോലീസ് അറിയിച്ചു.
ലഹരിക്കടത്ത് ഉൾപ്പെടെയുള്ള കുറ്റകൃത്യങ്ങൾ തടയുന്നതിനായി പ്രവർത്തിക്കുന്ന യൂണിറ്റിലെ ഉദ്യോഗസ്ഥൻ തന്നെ വൻതോതിൽ ഹെറോയിനും അനധികൃത ആയുധങ്ങളും കൈവശം വച്ചെന്ന ആരോപണം ഉയർന്നത് സംഭവത്തിൽ ഗൗരവമായ ചോദ്യങ്ങൾ ഉയർത്തിയിട്ടുണ്ട്.
ഫിറോസ്പുർ സീനിയർ സൂപ്രണ്ട് ഓഫ് പോലീസ് ഭൂപീന്ദർ സിങ് സിദ്ദുവിന്റെ നേതൃത്വത്തിലുള്ള ഉദ്യോഗസ്ഥരുടെ വിവരമനുസരിച്ച് വെള്ളിയാഴ്ചയും ശനിയാഴ്ചയും ഇടയിലുള്ള രാത്രിയിലാണ് ബൽദേവ് സിങ്ങിനെ അറസ്റ്റ് ചെയ്തത്. പ്രത്യേക രഹസ്യവിവരത്തിന്റെ അടിസ്ഥാനത്തിലായിരുന്നു നടപടി.
Related Post
ഫിറോസ്പുർ- മോഗ റോഡിലെ ഫിറോസേഷാ ടോൾ പ്ലാസയ്ക്ക് സമീപം വച്ചാണ് ഇൻസ്പെക്ടറെ പോലീസ് തടഞ്ഞത്. സ്വകാര്യ ഹ്യുണ്ടായി i20 കാറിൽ യാത്ര ചെയ്യുകയായിരുന്ന ഇയാൾ സാധാരണ വേഷത്തിലായിരുന്നു. വാഹനം പരിശോധിച്ചതോടെയാണ് ലഹരിമരുന്നും ആയുധങ്ങളും കണ്ടെത്തിയതെന്നാണ് പോലീസ് നൽകുന്ന വിവരം.
സംഭവത്തിൽ ഘൽ ഖുർദ് പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. നാർക്കോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് (NDPS) നിയമത്തിലെയും ആയുധ നിയമത്തിലെയും പ്രസക്തമായ വകുപ്പുകൾ പ്രകാരമാണ് കേസെടുത്തിരിക്കുന്നത്.
ലഹരിക്കേസുകളും അനധികൃത ആയുധക്കേസും ചുമത്തപ്പെട്ടിരിക്കുന്നത് നിലവിൽ സർവീസിലുള്ള ഒരു പോലീസ് ഇൻസ്പെക്ടർക്കെതിരെയായതിനാൽ, സംഘടിത ലഹരി ശൃംഖലകളിൽ നിയമപാലകരിലെ ചിലരുടെ പങ്കാളിത്തമുണ്ടോ എന്നതിലേക്കും അന്വേഷണം നീളുകയാണ്. എന്നാൽ പിടിച്ചെടുത്ത ഹെറോയിൻ എവിടെ നിന്നാണ് ലഭിച്ചതെന്നും ആരിലേക്കാണ് എത്തിക്കാനിരുന്നതെന്നും കേസിൽ മറ്റാർക്കെങ്കിലും ബന്ധമുണ്ടോയെന്നും ഇപ്പോൾ വ്യക്തമായിട്ടില്ല. ഈ കാര്യങ്ങൾ അന്വേഷണത്തിലൂടെ മാത്രമേ സ്ഥിരീകരിക്കാനാകൂവെന്ന് പോലീസ് അറിയിച്ചു.