ടെഹ്റാൻ: ഇറാന്റെ പുതിയ സുപ്രീം ലീഡർ ആയത്തുല്ല സയ്യിദ് മൊജ്താബ ഖാമനേയിയുടെ ആരോഗ്യനിലയെക്കുറിച്ചുള്ള അനിശ്ചിതത്വങ്ങളും അഭ്യൂഹങ്ങളും ശക്തമാകുന്നതിനിടെ, അദ്ദേഹത്തിന്റെ വീഡിയോ പുറത്തുവിട്ട് ഇറാൻ സർക്കാരിന്റെ നിയന്ത്രണത്തിലുള്ള മെഹർ വാർത്താ ഏജൻസി. ഫെബ്രുവരി 28-ന് നടന്ന യു.എസ്–ഇസ്രായേൽ സംയുക്ത വ്യോമാക്രമണത്തിൽ പിതാവും മുൻ സുപ്രീം ലീഡറുമായ ആയത്തുല്ല അലി ഖാമനേയി കൊല്ലപ്പെട്ടതിന് ശേഷം പുതിയ സുപ്രിം ലീഡറായി തെരഞ്ഞെടുക്കപ്പെട്ട് മൊജ്താബ പൊതുവേദികളിൽ കാണാതായതാണ് ഈ സംശയങ്ങൾക്ക് ഇടയാക്കിയത്.
“വിപ്ലവത്തിന്റെ നേതാവായ ആയത്തുല്ല സയ്യിദ് മൊജ്താബ ഖാമനേയിയുടെ വീഡിയോ ആദ്യമായി പുറത്തുവിട്ടു” എന്ന കുറിപ്പോടെയാണ് ശനിയാഴ്ച മെഹർ വാർത്താ ഏജൻസി ഈ വീഡിയോ പ്രസിദ്ധീകരിച്ചത്. വെറും 12 സെക്കൻഡ് ദൈർഘ്യമുള്ള വീഡിയോയിൽ, മൊജ്താബ ഖാമനേയി ഒരു അടച്ച മുറിയിൽ പായയിൽ ഇരിക്കുന്ന നിലയിൽ കാണാം. കറുത്ത തുർബാനും ഇളം ചാരനിറത്തിലുള്ള വസ്ത്രവും ധരിച്ച അദ്ദേഹം ചുറ്റുമിരുന്ന ആളുകളുമായി സംസാരിക്കുന്നതും ഇടപഴകുന്നതുമാണ് ദൃശ്യങ്ങളിൽ കാണുന്നത്. എന്നാൽ വീഡിയോ എപ്പോൾ എവിടെ ചിത്രീകരിച്ചതാണെന്ന കാര്യത്തിൽ വ്യക്തതയില്ല.
ഫെബ്രുവരിയിൽ നടന്ന ആക്രമണത്തിൽ മൊജ്താബയ്ക്ക് ഗുരുതരമായി പരുക്കേറ്റതായും പ്രത്യേകിച്ച് മുഖത്തും കാലുകളിലും വലിയ പരുക്കുകൾ സംഭവിച്ചതായി റിപ്പോർട്ടുകൾ പുറത്തുവന്നിരുന്നു. എന്നാൽ പുതിയ വീഡിയോയിൽ അദ്ദേഹത്തെ ആരോഗ്യവാനായി കാണിക്കുന്നതിലൂടെ ഈ റിപ്പോർട്ടുകൾക്ക് മറുപടി നൽകാനുള്ള ശ്രമമാണെന്ന് വിലയിരുത്തപ്പെടുന്നു.
Related Post
ഇതിനുമുമ്പ് മാർച്ച് 20-ന് ഇറാൻ സർക്കാരിന്റെ ഔദ്യോഗിക പ്രക്ഷേപണ സ്ഥാപനമായ ഐആർഐബി (IRIB) യും മൊജ്താബയുടെ സമാനമായ ഒരു വീഡിയോ പങ്കുവെച്ചിരുന്നു. “ആദ്യമായി പ്രസിദ്ധീകരിക്കുന്നു. ആയത്തുല്ല മൊജ്താബ ഖാമനേയിയുടെ മതപാഠത്തിന്റെ വീഡിയോ” എന്ന കുറിപ്പോടെയായിരുന്നു അത് സോഷ്യൽ മീഡിയ പ്ലാറ്റ്ഫോം X-ൽ പങ്കുവെച്ചത്. എന്നാൽ അതിലും തീയതിയോ സ്ഥലമോ വ്യക്തമാക്കിയിരുന്നില്ല.
മാർച്ച് 8-ന് ഇറാന്റെ മൂന്നാമത്തെ സുപ്രീം ലീഡറായി ചുമതലയേറ്റ ശേഷം മൊജ്താബ നിരവധി എഴുത്തുപരമായ പ്രസ്താവനകൾ സർക്കാർ മാധ്യമങ്ങൾ വഴി പുറത്തുവിട്ടിട്ടുണ്ടെങ്കിലും, അദ്ദേഹത്തിന്റെ ശബ്ദമോ പുതിയ ചിത്രങ്ങളോ ഇതുവരെ പുറത്തുവന്നിട്ടില്ല. കൂടാതെ, കഴിഞ്ഞ മാസം നടന്ന പിതാവിന്റെ സംസ്കാര ചടങ്ങുകളിലും അദ്ദേഹം പങ്കെടുത്തതായി സ്ഥിരീകരണമില്ല.
ഇതിനിടെ, ഇറാൻ പ്രസിഡന്റ് മാസൂദ് പെസെഷ്കിയാൻ അടുത്തിടെ പറഞ്ഞത്, മൊജ്താബ ഖാമനേയിയുമായി ആശയവിനിമയം നടത്തുന്നത് ഇപ്പോൾ ഏറെ ബുദ്ധിമുട്ടുള്ള കാര്യമാണെന്നാണ്. “ഇപ്പോഴത്തെ സാഹചര്യത്തിൽ അദ്ദേഹവുമായി നേരിട്ട് ബന്ധപ്പെടുന്നത് വളരെ ബുദ്ധിമുട്ടാണ്. എങ്കിലും, അദ്ദേഹത്തിന്റെ സാന്നിധ്യം ഞങ്ങൾക്ക് വലിയ ശക്തിയാണ്,” എന്നാണ് അദ്ദേഹം വ്യക്തമാക്കിയത്. അതേസമയം, മൊജ്താബയുമായി നടത്തിയ കൂടിക്കാഴ്ചകൾ ഫലപ്രദമായിരുന്നുവെന്നും, അദ്ദേഹത്തിൽ നിന്ന് സൗമ്യതയും ശക്തമായ തർക്കശേഷിയും കണ്ടുവെന്നും പെസെഷ്കിയാൻ കൂട്ടിച്ചേർത്തു.
നിലവിലെ സാഹചര്യം ചിലർക്ക് അദ്ദേഹത്തെ വ്യത്യസ്തമായി ചിത്രീകരിക്കാനുള്ള അവസരം നൽകുകയാണ്, എന്നും അദ്ദേഹം ആരോപിച്ചു. മറുവശത്ത്, യുഎസ് പ്രസിഡന്റ് ഡോണാൾഡ് ട്രംപ് കഴിഞ്ഞ മാസം മൊജ്താബ ഖാമനേയി 90 ശതമാനം മരിച്ച അവസ്ഥയിൽ ആണെന്ന് പരാമർശിച്ചിരുന്നു. ഇസ്രായേൽ ചാനൽ 14-ഉം അടുത്തിടെ അദ്ദേഹത്തിന്റെ ആരോഗ്യനില മോശമാണെന്ന് റിപ്പോർട്ട് ചെയ്തിരുന്നു.
ഇത്തരത്തിലുള്ള പരസ്പരവിരുദ്ധമായ വിവരങ്ങൾക്കിടയിൽ, മൊജ്താബ ഖാമനേയിയുടെ പുതിയ വീഡിയോ പുറത്തുവന്നത് അദ്ദേഹത്തിന്റെ ആരോഗ്യസ്ഥിതി സംബന്ധിച്ച വിവാദങ്ങൾക്കും ചർച്ചകൾക്കും വീണ്ടും തീവ്രത കൂട്ടിയിരിക്കുകയാണ്
Iran’s Mehr RELEASES VIDEO of Supreme Leader Mojtaba Khamenei for ‘FIRST TIME’ pic.twitter.com/v3Rp81VfLH
— RT (@RT_com) August 8, 2026
