ടെഹ്റാൻ: ജോർദാനിലെ അമേരിക്കൻ സൈനിക താവളത്തിന് നേരെയുണ്ടായ ആക്രമണത്തിന് ശക്തമായ സൈനിക തിരിച്ചടി നൽകി യുഎസ്. ഇറാനിൽ നിർമാണം പുരോഗമിക്കുന്ന ഡാർകോവിൻ ആണവനിലയം ഉൾപ്പെടെ നിരവധി സൈനിക കേന്ദ്രങ്ങൾ ലക്ഷ്യമിട്ട് വ്യാപക മിസൈൽ, വ്യോമാക്രമണം നടത്തിയതായി അമേരിക്ക അറിയിച്ചു.
തീരനിരീക്ഷണ സംവിധാനങ്ങൾ, റഡാറുകൾ, നാവിക താവളങ്ങൾ, മിസൈൽ, ഡ്രോൺ കേന്ദ്രങ്ങൾ എന്നിവ ആക്രമണത്തിൽ തകർത്തതായി അമേരിക്ക അവകാശപ്പെട്ടു. ഇതിന്റെ ദൃശ്യങ്ങളും യുഎസ് പുറത്തുവിട്ടിട്ടുണ്ട്. ജോർദാനിലെ അമേരിക്കൻ സൈനിക താവളത്തിന് നേരെയുണ്ടായ ആക്രമണത്തിൽ രണ്ട് അമേരിക്കൻ സൈനികർ കൊല്ലപ്പെടുകയും ഒരാളെ കാണാതാവുകയും ചെയ്ത സംഭവത്തിന് പിന്നാലെയാണ് ഈ തിരിച്ചടി.
ആണവനിലയത്തിന് നേരെയുണ്ടായ ആക്രമണത്തെ തുടർന്ന് വിഷയത്തിൽ അന്താരാഷ്ട്ര ആണവോർജ ഏജൻസി (IAEA) മൗനം പാലിക്കരുതെന്ന് ഇറാൻ ആവശ്യപ്പെട്ടു. അതേസമയം, യുഎസ് ആക്രമണത്തിന് പിന്നാലെ ഹോർമുസ് കടലിടുക്കിൽ നാല് കപ്പലുകൾ തടഞ്ഞതായും രണ്ട് കപ്പലുകൾ ആക്രമിച്ചതായും റിപ്പോർട്ടുകളുണ്ട്.
മേഖലയിൽ അമേരിക്കയ്ക്ക് സമാധാനത്തോടെ തുടരാൻ കഴിയില്ലെന്ന് ഇറാന്റെ പരമോന്നത നേതാവ് മുന്നറിയിപ്പ് നൽകിയതോടെ പശ്ചിമേഷ്യയിൽ വീണ്ടും സംഘർഷം രൂക്ഷമാകുകയാണ്. ഇറാന്റെ മുന്നറിയിപ്പ് ഗൗരവമായി കാണണമെന്ന് മേഖലയിലെ രാജ്യങ്ങളോടും ഗൾഫ് രാഷ്ട്രങ്ങളോടും ഇറാൻ സൈന്യം ആവശ്യപ്പെട്ടിട്ടുണ്ട്.
ജോർദാനിലെ അമേരിക്കൻ താവളത്തിന് നേരെയുണ്ടായ ആക്രമണത്തിൽ രണ്ട് അമേരിക്കൻ സൈനികർ കൊല്ലപ്പെടുകയും ഒരാളെ കാണാതാവുകയും നാല് സൈനികർക്ക് പരിക്കേൽക്കുകയും ചെയ്തിരുന്നു. സമാധാന ധാരണയ്ക്ക് ശേഷവും അമേരിക്കയ്ക്ക് നേരിട്ട ഏറ്റവും വലിയ തിരിച്ചടികളിലൊന്നായാണ് ഈ സംഭവത്തെ വിലയിരുത്തുന്നത്.
സമാധാന ധാരണ ഇനി ബാധകമല്ലെന്ന നിലപാടാണ് ഇറാൻ സ്വീകരിച്ചിരിക്കുന്നത്. അതിർത്തികൾ കടന്നുള്ള ആക്രമണങ്ങൾക്കും സാധ്യതയുണ്ടെന്ന മുന്നറിയിപ്പ് ഇറാൻ ആവർത്തിച്ചതോടെ മേഖലയിൽ ആശങ്ക വർധിച്ചു. കുവൈത്ത് ഉൾപ്പെടെയുള്ള മേഖലകളിൽ സംഘർഷാവസ്ഥ തുടരുന്നുണ്ടെങ്കിലും മുൻ ദിവസങ്ങളെ അപേക്ഷിച്ച് ഇറാന്റെ ആക്രമണങ്ങളുടെ തീവ്രതയിൽ നേരിയ കുറവുണ്ടായതായി വിലയിരുത്തപ്പെടുന്നു.
