ഇസ്ലാമാബാദ്: ചൈന-പാകിസ്ഥാൻ സാമ്പത്തിക ഇടനാഴി (സിപിഇസി ) കാബൂളിലേക്ക് നീട്ടുന്നത് ഉൾപ്പെടെ ഒന്നിലധികം മേഖലകളിൽ സഹകരണം വിപുലീകരിക്കാൻ അഫ്ഗാനിസ്ഥാൻ, ചൈന, പാകിസ്ഥാൻ വിദേശകാര്യ മന്ത്രിമാരുടെ കൂടിക്കാഴ്ചയിൽ തീരുമാനം. കാബൂളിൽ നടന്ന ആറാമത് ത്രിരാഷ്ട്ര വിദേശകാര്യ മന്ത്രിമാരുടെ സംഭാഷണത്തിൽ പാകിസ്ഥാൻ വിദേശകാര്യ മന്ത്രി ഇഷാഖ് ദാർ, ചൈനീസ് വിദേശകാര്യ മന്ത്രി വാങ് യി, അഫ്ഗാനിസ്ഥാൻ ആക്ടിംഗ് വിദേശകാര്യ മന്ത്രി അമീർ ഖാൻ മുത്താക്കി എന്നിവർ പങ്കെടുത്തു. രാഷ്ട്രീയ, സാമ്പത്തിക, സുരക്ഷാ മേഖലകളിൽ സഹകരണം വർധിപ്പിക്കുന്നതിനായിരുന്നു കൂടിക്കാഴ്ച.
ഇന്ത്യയിലെ സന്ദർശനത്തിന് ശേഷമാണ് ചൈനീസ് വിദേശകാര്യമന്ത്രി വാങ് യി പാകിസ്ഥാനിൽ എത്തിയത്. ഷാങ്ഹായ് സഹകരണ സംഘടന (എസ്‌സി‌ഒ) ഉച്ചകോടിയിൽ പങ്കെടുക്കാൻ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫിന്റെ ചൈന സന്ദർശന വേളയിൽ പാകിസ്ഥാനും ചൈനയും ഈ മാസം അവസാനം പദ്ധതിയുടെ രണ്ടാം ഘട്ടം ആരംഭിക്കുമെന്ന് പ്രതീക്ഷിക്കുന്ന സാഹചര്യത്തിലാണ് സിപിഇസി വിപുലീകരിക്കുന്നതിനുള്ള കരാറിലെത്തിയത്. ഭീകരതയ്‌ക്കെതിരായ സംയുക്ത ശ്രമങ്ങൾ ശക്തിപ്പെടുത്താൻ മൂന്ന് രാജ്യങ്ങളും പ്രതിജ്ഞാബദ്ധമാണെന്ന് പാകിസ്ഥാൻ വിദേശകാര്യ ഓഫീസ് എക്‌സിൽ പ്രസ്താവനയിൽ പറഞ്ഞു.
വ്യാപാരം, ഗതാഗതം, പ്രാദേശിക വികസനം, ആരോഗ്യം, വിദ്യാഭ്യാസം, മയക്കുമരുന്ന് കടത്ത് ചെറുക്കൽ, അഫ്ഗാനിസ്ഥാനിലേക്ക് സിപിഇസി വ്യാപിപ്പിക്കൽ എന്നിവയിൽ സഹകരണം ശക്തിപ്പെടുത്തുന്നതിനുള്ള പ്രതിബദ്ധതയും മൂന്ന് രാജ്യങ്ങളും ഊട്ടിയുറപ്പിച്ചു. 2021-ൽ താലിബാൻ അധികാരത്തിൽ വന്നതിനുശേഷം ചൈനീസ് വിദേശകാര്യ മന്ത്രി അഫ്ഗാനിസ്ഥാനിലേക്ക് നടത്തുന്ന ആദ്യ സന്ദർശനമാണിത്.
Related Post
പാകിസ്ഥാനും അഫ്ഗാനിസ്ഥാനും തമ്മിലുള്ള സംഘർഷങ്ങൾ ലഘൂകരിക്കുന്നതിൽ ചൈന ഇടപെടുന്നുവെന്ന് റിപ്പോർട്ട് വന്നു. അഫ്ഗാനിസ്ഥാനിൽ പ്രവർത്തിക്കുന്ന തീവ്രവാദ സംഘടനകൾ പാകിസ്ഥാനിൽ ഭീകരാക്രമണം നടത്തുന്നുവെന്ന് പാകിസ്ഥാൻ വിദേശകാര്യ മന്ത്രി ചൈനീസ് വിദേശകാര്യമന്ത്രിയെ ധരിപ്പിച്ചു. മെയ് മാസത്തിൽ ബീജിംഗിൽ നടന്ന അവസാന ത്രിരാഷ്ട്ര യോഗത്തിൽ, ത്രികക്ഷി സഹകരണം വർദ്ധിപ്പിക്കുന്നതിനായി സിപിഇസി അഫ്ഗാനിസ്ഥാനിലേക്ക് വ്യാപിപ്പിക്കാൻ മൂന്ന് രാജ്യങ്ങളിലെയും വിദേശകാര്യ മന്ത്രിമാർ സമ്മതിച്ചിരുന്നു.
പാക് അധിനിവേശ കശ്മീരിലൂടെ കടന്നുപോകുന്ന സിപിഇസിയെ ഇന്ത്യ ശക്തമായി എതിർത്തിരുന്നു. ചൈനയുടെ ബെൽറ്റ് ആൻഡ് റോഡ് സംരംഭത്തെയും ഇന്ത്യ എതിർത്തു.
