തിരുവനന്തപുരം: മധുരയിലെ പ്രമുഖ തനിഷ്ക് ജ്വല്ലറി ഷോറൂമിൽ നടന്ന വൻ കവർച്ച കേരളത്തിലെ സ്വർണ്ണവ്യാപാര മേഖലയിലും കടുത്ത ആശങ്ക സൃഷ്ടിച്ചിരിക്കുകയാണ്. കോടിക്കണക്കിന് രൂപയുടെ സ്വർണ്ണാഭരണങ്ങൾ കവർന്ന സംഭവം ജ്വല്ലറി സ്ഥാപനങ്ങളുടെ സുരക്ഷയെക്കുറിച്ച് ഗൗരവമായ ചോദ്യങ്ങൾ ഉയർത്തുന്നു.കേരളത്തിലെ എല്ലാ ജില്ലകളിലും സ്വർണ്ണവ്യാപാര സ്ഥാപനങ്ങളുടെ സുരക്ഷ വിലയിരുത്തി ആവശ്യമായ പോലീസ് സംരക്ഷണ നടപടികൾ സ്വീകരിക്കണമെന്ന് KGSMA സംസ്ഥാന കമ്മിറ്റി മുഖ്യമന്ത്രിയോടും സംസ്ഥാന പോലീസ് മേധാവിയോടും ആവശ്യപ്പെട്ടു.
കേരളത്തിലും ആയിരക്കണക്കിന് സ്വർണ്ണവ്യാപാര സ്ഥാപനങ്ങൾ പ്രവർത്തിക്കുന്നുണ്ട്. കോടിക്കണക്കിന് രൂപയുടെ സ്വർണ്ണാഭരണങ്ങൾ സൂക്ഷിക്കുന്ന ഇത്തരം സ്ഥാപനങ്ങൾക്ക് മതിയായ സുരക്ഷ ഉറപ്പാക്കേണ്ടത് അനിവാര്യമാണ്. പ്രത്യേകിച്ച് രാത്രികാലങ്ങളിൽ ജ്വല്ലറികൾ കേന്ദ്രീകരിച്ച് പോലീസ് പട്രോളിങ് ശക്തമാക്കണമെന്ന് കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ (KGSMA) പ്രസിഡന്റ് കെ.സുരേന്ദ്രൻ ആവശ്യപ്പെട്ടു.
ജില്ലകളിലെ പ്രധാന സ്വർണ്ണവ്യാപാര കേന്ദ്രങ്ങളിൽ പ്രത്യേക പോലീസ് നിരീക്ഷണം ഏർപ്പെടുത്തണം. സംശയാസ്പദമായ സാഹചര്യങ്ങൾ ഉടനടി റിപ്പോർട്ട് ചെയ്യുന്നതിനുള്ള സംവിധാനം, അടിയന്തര പോലീസ് സഹായം, രാത്രികാല ബീറ്റ് പട്രോളിങ് എന്നിവ ഉറപ്പാക്കണമെന്ന് KGSMA ജനറൽ സെക്രട്ടറി അഡ്വ.എസ്. അബ്ദുൽ നാസർ പറഞ്ഞു .
മധുരയിലെ സംഭവം കേരളത്തിലെ ജ്വല്ലറി മേഖലയ്ക്കുള്ള ഗൗരവമായ മുന്നറിയിപ്പായി കാണണം. വ്യാപാരികളുടെ ജീവനും സ്വത്തിനും സുരക്ഷ ഉറപ്പാക്കുന്നതിന് സർക്കാർ അടിയന്തരമായി ഇടപെടണമെന്ന് KGSMA ട്രഷറർ കൃഷ്ണദാസ്. സി.വി. പറഞ്ഞു .
