ബെംഗളൂരു: ശത്രുവിൽ ശ്രദ്ധ കേന്ദ്രീകരിക്കാനും തൽക്കാലം തിരഞ്ഞെടുപ്പ് പ്രചാരണങ്ങളിൽ നിന്ന് വിട്ടുനിൽക്കാനും പ്രധാനമന്ത്രി നരേന്ദ്ര മോദിയോട് കോൺഗ്രസ് അധ്യക്ഷൻ മല്ലികാർജുൻ ഖർഗെ. ഓപ്പറേഷൻ സിന്ദൂറിനുശേഷം പ്രധാനമന്ത്രി നരേന്ദ്ര മോദി നടത്തിയ പൊതു പ്രസംഗങ്ങളെ കുറിച്ച് പരാമർശിച്ചായിരുന്നു കോൺഗ്രസ് അധ്യക്ഷന്റെ വാക്കുകൾ.
‘‘സാഹചര്യം സാധാരണമല്ലാത്തതിനാൽ ഞങ്ങൾ ഒന്നും പറയുന്നില്ല. സൈന്യം ഉള്ളിടത്തോളം കാലം നാമെല്ലാം സുരക്ഷിതരാണ്. അതുകൊണ്ട് ഞങ്ങൾ സൈന്യത്തെ പിന്തുണയ്ക്കുന്നു. അതുപോലം സൈന്യത്തിന് പൂർണ അധികാരം നൽകിയിട്ടുണ്ടെന്ന് പ്രധാനമന്ത്രി മോദി പറഞ്ഞിരുന്നു. പിന്നെ എന്തിനാണ് ഓപ്പറേഷൻ സിന്ദൂറിൽ അദ്ദേഹം അവകാശവാദം ഉന്നയിക്കുന്നത്. സ്വയം പൊങ്ങച്ചം പറയുന്നത് നല്ലതല്ല’’ – ഖർഗെ പറഞ്ഞു.
‘‘പ്രധാനമന്ത്രിയുടെ എല്ലാ പ്രസ്താവനകളോടും പ്രതികരിക്കാൻ ഞാൻ ഇഷ്ടപ്പെടുന്നില്ല. പ്രധാനമന്ത്രി മോദി തിരഞ്ഞെടുപ്പ് പ്രചാരണത്തിൽനിന്ന് താൽക്കാലികമായി പിന്മാറണം. രാജ്യത്ത് എന്താണ് സംഭവിച്ചതെന്ന് മനസിലാക്കി അദ്ദേഹം സംസാരിക്കണം. സ്വയം പുകഴ്ത്തുന്നതിനു പകരം ശത്രുവിൽ ശ്രദ്ധ കേന്ദ്രീകരിക്കണം.’’ – ഖർഗെ പറഞ്ഞു.
