കൊച്ചി: ബാഗേജില്‍ എന്താണെന്ന് ചോദിച്ചപ്പോള്‍ ബോംബാണെന്ന് മറുപടി നല്‍കിയ യുവാവിനെ അറസ്റ്റു ചെയ്തു. ഇയാള്‍ക്കെതിരെ നെടുമ്പാശ്ശേരി പോലീസ് കേസെടുത്തു. ഇന്നലെ (ഫെബ്രുവരി 19, ബുധനാഴ്ച) നെടുമ്പാശ്ശേരി വിമാനത്താവളത്തിലാണ് സംഭവം. കോഴിക്കോട് സ്വദേശി റഷീദാണ് അറസ്റ്റിലായത്.
‘ബാഗേജിന് കനം കൂടുതലാണല്ലോ, എന്താണിതിലെന്ന്’ ചോദിച്ചപ്പോഴായിരുന്നു യാത്രക്കാരന്‍ ബോംബാണെന്ന് മറുപടി നല്‍കിയത്. ചോദ്യം ഇഷ്ടപ്പെടാതെ ബഗേജില്‍ ബോംബാണെന്ന് മറുപടി പറഞ്ഞ യാത്രക്കാരന്‍റെ യാത്രയും ഇതോടെ മുടങ്ങി. ബുധനാഴ്ച രാത്രി 11.30ന് ക്വാലാലംപൂരിലേക്ക് പുറപ്പെട്ട തായ് എയര്‍ വിമാനത്തില്‍ യാത്ര ചെയ്യാനെത്തിയതായിരുന്നു റഷീദ്.
വിമാനയാത്രയ്ക്ക് വരുന്നവരുടെ കൈവശമുള്ള ബാഗേജില്‍ നിശ്ചിത തൂക്കത്തിലേറെ സാധനങ്ങളുണ്ടെങ്കില്‍ ചില സാധനങ്ങള്‍ ഒഴിവാക്കാന്‍ അധികൃതര്‍ നിര്‍ദേശിക്കുന്നതിനാണ് ലഗേജില്‍ എന്തൊക്കെയാണെന്ന് ചോദിക്കുന്നത്. ബോംബ് ഭീഷണിയുണ്ടായാല്‍ ഉടന്‍ റിപ്പോര്‍ട്ട് ചെയ്ത് അടിയന്തര സുരക്ഷായോഗം ചേരണമെന്നാണ് വ്യോമയാന നിയമം.
