ആലപ്പുഴ: കളർകോട് അഞ്ച് മെഡിക്കൽ വിദ്യാർഥികളുടെ മരണത്തിനിടയാക്കിയ അപകടത്തിന് കാരണമായത് ആ സമയത്ത് റോഡിലേക്ക് വീണ മരച്ചില്ലയെന്ന് ദൃക്സാക്ഷി. അപകടം നടന്ന സ്ഥലത്തിന് തൊട്ടടുത്ത് താമസിക്കുന്ന മഞ്ജുവെന്ന വീട്ടമ്മയാണ് ഇക്കാര്യം വെളിപ്പെടുത്തിയത്. സംഭവത്തിന് മുമ്പേ റോഡിൽ മരച്ചില്ല വീണുകിടക്കുന്നുണ്ടായിരുന്നു.
അപകടത്തിൽപ്പെട്ട കാർ വരുമ്പോഴും ഒരു മരച്ചില്ല വീണതായി കണ്ടിരുന്നു. അതുകണ്ട് കാർ ഓടിച്ച പയ്യൻ വാഹനം വെട്ടിച്ചതാണ് അപകടമുണ്ടാക്കിയതെന്നാണ് മഞ്ജു പറയുന്നത്. അതേ സമയത്ത് എതിർ ദിശയിൽ നിന്നു വന്ന കെഎസ്ആർടിസി ബസ് ബ്രേക്കിട്ടെങ്കിലും തൊട്ടടുത്ത് ഒരു ഇലക്ട്രിക് പോസ്റ്റുണ്ടായിരുന്നതിനാൽ കൂടുതൽ വെട്ടിക്കാൻ പറ്റിയില്ല. അപ്പോഴേക്കും കാർ ബസിലേക്ക് ഇടിച്ചുകയറിയെന്നും മഞ്ജു പറഞ്ഞു. സംഭവത്തിൽ പോലീസ് ഇവരുടെ മൊഴി രേഖപ്പെടുത്തിയിട്ടുണ്ട്.
അതേ സമയം, നേരത്തേ മുന്നിൽ എന്തോ വീഴുന്നതു കണ്ടാണ് കാർ വെട്ടിച്ചതെന്ന് വാഹനം ഓടിച്ചിരുന്ന വിദ്യാർഥിയും പറഞ്ഞിരുന്നു.
Related Post
അപകടത്തിൽ മരിച്ച മെഡിക്കൽ വിദ്യാർഥികളുടെ സംസ്കാര ചടങ്ങുകൾ ഇന്നും നാളെയുമായി പൂർത്തിയാകും. ലക്ഷദ്വീപ് സ്വദേശിയായ മുഹമ്മദ് ഇബ്രാഹിമിന്റെ മൃതദേഹം കൊച്ചി ടൗൺ ജുമാ മസ്ജിദിൽ കബറടക്കി. ശ്രീദീപ് വത്സന്റെ മൃതദേഹം പാലക്കാട്ടെ വീട്ടിലെത്തിച്ചു. ഇവിടെ സംസ്കാരച്ചടങ്ങു പുരോഗമിക്കുകയാണ്. കണ്ണൂർ മാട്ടൂലിൽ എത്തിച്ച മുഹമ്മദ് അബ്ദുൽ ജബ്ബാറിന്റെ മൃതദേഹം രാത്രിയോടെ കബറടക്കും. കാവാലത്തെ വീട്ടിലെത്തിച്ച ആയുഷ് ഷാജിയുടെ സംസ്കാരവും കോട്ടയം മറ്റക്കരയിലെ കുടുംബവീട്ടിലെത്തിച്ച ദേവനന്ദന്റെ സംസ്കാരവും നാളെ നടക്കും.
