ഇന്ന് സംസ്ഥാനത്ത് 2655 പേര്‍ക്കാണ് കോവിഡ് ബാധ സ്ഥിരീകരിച്ചത്. അതില്‍ 2433 പേര്‍ക്കും സമ്പര്‍ക്കംമൂലമാണ് രോഗബാധയുണ്ടായത്. രോഗബാധ സ്ഥിരീകരിച്ചവരില്‍ 61 പേര്‍ ആരോഗ്യപ്രവര്‍ത്തകരാണ്. 2111 പേര്‍ രോഗവിമുക്തരായി. ഇന്ന് സംസ്ഥാനത്ത് കോവിഡ്മൂലം 11 പേര്‍ മരണമടഞ്ഞു.
കഴിഞ്ഞ 24 മണിക്കൂറില്‍ 40,162 സാമ്പിളികള്‍ പരിശോധിച്ചു. ഇപ്പോള്‍ സംസ്ഥാനത്ത് ആകെ 21,800 കോവിഡ് ആക്ടീവ് കേസുകളാണുള്ളത്.
പരിശോധനകള്‍ വര്‍ധിപ്പിക്കുന്നതിന്‍റെ ഭാഗമായി കോഴിക്കോട് റീജിയണല്‍ പബ്ലിക് ഹെല്‍ത്ത് ലാബിനോടനുബന്ധിച്ച് ലാബിന്‍റെ ഉദ്ഘാടനം നാളെ നടക്കും. കോവിഡ് 19 മലാപ്പറമ്പിലെ ആരോഗ്യവകുപ്പിന്‍റെ പരിശീലന കേന്ദ്രത്തിലെ കെട്ടിടത്തിലാണ് റീജിയണല്‍ പബ്ലിക്ക് ഹെല്‍ത്ത് ലാബോറട്ടറിയുടെ ആര്‍ടി പിസിആര്‍ വിഭാഗം പ്രവര്‍ത്തനമാരംഭിക്കുന്നത്. ഇതോടെ ഇപ്പോള്‍ 23 സര്‍ക്കാര്‍ ലാബുകളിലും 10 സ്വകാര്യ ലാബുകളിലുമുള്‍പ്പെടെ 33 സ്ഥലങ്ങളില്‍ കോവിഡ് 19 ആര്‍ടി പിസിആര്‍ പരിശോധിക്കാനുള്ള സംവിധാനങ്ങളുണ്ട്.
ഇതുകൂടാതെ 800ഓളം സര്‍ക്കാര്‍ ലാബുകളിലും 300ഓളം സ്വകാര്യ ലാബുകളിലും ആന്‍റിജന്‍, എക്സ്പെര്‍ട്ട്/സിബിനാറ്റ്, ട്രൂനാറ്റ് പരിശോധനകള്‍ നടത്തുന്നുണ്ട്. ലാബ് സൗകര്യം കൂട്ടിയതോടെ പരിശോധനകള്‍ വലിയ തോതില്‍ വര്‍ധിപ്പിക്കാനായിട്ടുണ്ട്.
