മുംബൈ: പന്ത് ചുരണ്ടല്‍ വിവാദത്തില്‍പ്പെട്ട ആസ്ത്രേലിയന്‍ നായകന്‍ സ്റ്റീവ് സ്മിത്ത് ടീം നായകസ്ഥാനത്തിന് പുറമേ ഐ.പി.എല്‍ നായക സ്ഥാനത്ത് നിന്നും സ്മിത്ത് രാജിവച്ചു. ഐ.പി.എല്‍ ടീമായ രാജസ്ഥാന്‍ റോയല്‍സിന്റെ നായക സ്ഥാനത്ത് നിന്നാണ് സ്റ്റീവ് സ്മിത്ത് രാജിവച്ചത്. പകരം ഇന്ത്യന്‍ താരം അജിങ്ക്യ രഹാനെ ടീം നായകനാവും.
ദക്ഷിണാഫ്രിക്കക്കെതിരായ മൂന്നാം ക്രിക്കറ്റ് ടെസ്റ്റിന്റെ മൂന്നാം ദിനത്തിലാണ് ക്രിക്കറ്റ് ലോകത്തെ നാണംകെടുത്തിയ സംഭവം അരങ്ങേറിയത്. വിഷയം വന്‍ വിവാദമായതോടെ ആസ്ത്രേലിയന്‍ സര്‍ക്കാര്‍ സ്മിത്തിന്റെ രാജി ആവശ്യപ്പെടുകയായിരുന്നു. പിന്നാലെ ഐ.സി.സിയുടെ ശിക്ഷാനടപടിക്കും സ്മിത്തും പന്ത് ചുരണ്ടിയ ഓസീസ് ഓപണര്‍ കാമറോണ്‍ ബെന്‍ക്രോഫ്റ്റും വിധേയരായി. സ്മിത്തിന് ഒരു കളിയില്‍ വിലക്കും മാച്ച് ഫീസിന്റെ 100 ശതമാനം പിഴയുമാണ് ശിക്ഷ. ബെന്‍ക്രോഫ്റ്റിന് മാച്ച് ഫീസിന്റെ 75 ശതമാനം പിഴയും മൂന്ന് ഡീമെറിറ്റ് പോയിന്റുമാണ് നേരിട്ടത്.
