കാസർകോട്: കൈവശ ഭൂമിയുടെ രേഖകൾ ലഭിക്കാത്തതിൽ പ്രതിഷേധിച്ച് മൊബൈൽ ടവറിൽ കയറി ആത്മഹത്യ ഭീഷണി മുഴക്കിയ 70കാരനെ അഗ്നിരക്ഷാസേന സാഹസികമായി രക്ഷപ്പെടുത്തി. പി.കെ. മോഹൻദാസിനെയാണ് കാസർകോട് അഗ്നിരക്ഷാസേനാംഗങ്ങൾ സുരക്ഷിതമായി താഴെയിറക്കിയത്.
ഒരു കൈയിൽ പെട്രോൾ കുപ്പിയും തലയ്ക്ക് മുകളിൽ തൂങ്ങിമരിക്കാൻ പാകത്തിൽ കുരുക്കുമായാണ് മോഹൻദാസ് മൊബൈൽ ടവറിൽ കയറിയത്. കഴിഞ്ഞ 27 വർഷമായി കൈവശ ഭൂമിയുടെ രേഖകൾ ലഭിക്കുന്നതിനായി വിവിധ സർക്കാർ ഓഫീസുകൾ കയറിയിറങ്ങിയിട്ടും പരിഹാരമുണ്ടായില്ലെന്ന് ആരോപിച്ചായിരുന്നു ആത്മഹത്യ ഭീഷണി.
വിവരമറിഞ്ഞ് സ്റ്റേഷൻ ഓഫീസർ ഡോ. ഹർഷയുടെ നേതൃത്വത്തിൽ അഗ്നിരക്ഷാസേന സ്ഥലത്തെത്തി. മോഹൻദാസിനെ അനുനയിപ്പിച്ച് താഴെയിറക്കാൻ സേനാംഗങ്ങൾ ഏറെ നേരം ശ്രമിച്ചെങ്കിലും അദ്ദേഹം വഴങ്ങിയില്ല. തുടർന്ന് അദ്ദേഹത്തിന്റെ ശ്രദ്ധ തിരിക്കുന്നതിനായി പരാതിയുടെ പകർപ്പിൽ രേഖപ്പെടുത്തിയിരുന്ന മൊബൈൽ നമ്പർ കണ്ടെത്തി മോഹൻദാസുമായി നിരന്തരം ഫോണിൽ ബന്ധപ്പെടുകയായിരുന്നു.
മോഹൻദാസിന്റെ ശ്രദ്ധ മാറിയ നിമിഷം സ്റ്റേഷൻ ഓഫീസറുടെ നിർദേശപ്രകാരം സേനാംഗങ്ങളായ ജിജോ ജെ.ബി, അതുൽ രവി, ഇ. പ്രസീദ്, പ്രണവ് എന്നിവർ എല്ലാ സുരക്ഷാ സംവിധാനങ്ങളും ഉറപ്പാക്കി ടവറിൽ കയറി. തുടർന്ന് മോഹൻദാസിനെ സുരക്ഷിതമായി ബന്ധനസ്ഥനാക്കി.
പിന്നാലെ സീനിയർ ഓഫീസർ എച്ച്. ഉമേശൻ സുരക്ഷാ ഉപകരണങ്ങളുമായി ടവറിന്റെ മുകളിലെത്തി മോഹൻദാസിനെ സുരക്ഷിതമായി താഴെയിറക്കി. ശാരീരികമായി മറ്റ് പ്രശ്നങ്ങളൊന്നുമില്ലെന്ന് ഉറപ്പാക്കിയ ശേഷം മോഹൻദാസിനെ ബദിയടുക്ക പൊലീസിന് കൈമാറി. കേരള അഗ്നിരക്ഷാസേനയുടെ ഔദ്യോഗിക വിവരങ്ങളും രക്ഷാപ്രവർത്തനത്തിലെ സുരക്ഷാ സംവിധാനങ്ങളുടെ പ്രാധാന്യം വ്യക്തമാക്കുന്നു.
