ന്യൂഡൽഹി: ഡൽഹിയിൽ 17കാരിയെ കൂട്ടബലാത്സംഗം ചെയ്ത കേസിൽ ഒളിവിലായിരുന്ന രണ്ട് സഹോദരങ്ങൾ അറസ്റ്റിലായി. ഹരിയാനയിലെ ഫരീദാബാദിലെ വീട്ടിൽ നിന്ന് ചൊവ്വാഴ്ച പുലർച്ചെയാണ് ഇരുവരേയും പോലീസ് അറസ്റ്റ് ചെയ്തത്. ഇതോടെ കേസിൽ പ്രതികളായ മൂന്ന് പേരും പിടിയിലായി.
തിങ്കളാഴ്ച ദക്ഷിണ ഡൽഹിയിലെ കൽക്കാജി മന്ദിറിന് സമീപമുള്ള പാർക്കിൽ 17കാരിയെ മൂന്ന് പേർ പൊലീസ് ഉദ്യോഗസ്ഥരാണെന്ന് തെറ്റിദ്ധരിപ്പിച്ച് കൂട്ടബലാത്സംഗം ചെയ്തതെന്നാണ് കേസ്. സംഭവത്തിൽ കുട്ടികൾക്കെതിരായ ലൈംഗിക അതിക്രമങ്ങളിൽ നിന്ന് സംരക്ഷിക്കുന്ന പോക്സോ നിയമം ഉൾപ്പെടെയുള്ള വകുപ്പുകൾ ചുമത്തി പോലീസ് കേസെടുത്തു. സംഭവത്തിന് പിന്നാലെ നടത്തിയ പ്രാഥമിക അന്വേഷണത്തിൽ അസിഫ് എന്ന പ്രതിയെ പോലീസ് അറസ്റ്റ് ചെയ്തിരുന്നു. ഇയാളെ പിടികൂടുന്നതിനിടെ പോലീസുമായി ചെറിയ തോതിൽ വെടിവയ്പുണ്ടായതായും റിപ്പോർട്ടുണ്ട്.
ഇതിനിടെയാണ് സഹോദരങ്ങളായ ഹേമന്തിനെയും മുകേഷിനെയും ഫരീദാബാദിലെ വീട്ടിൽ നിന്ന് പോലീസ് പിടികൂടിയത്. ഇവരുടെ അറസ്റ്റോടെ കേസിലെ മൂന്ന് പ്രതികളും പോലീസ് കസ്റ്റഡിയിലായി. പ്രതികളിലൊരാളായ ഹേമന്ത് അഭിഭാഷകനാണ്. സാകേത് കോടതിയിൽ പ്രാക്ടീസ് ചെയ്യുന്ന ഇയാൾ നിയമവുമായി ബന്ധപ്പെട്ട പദപ്രയോഗങ്ങൾ ഉപയോഗിച്ച് പെൺകുട്ടിയെ ഭീഷണിപ്പെടുത്തുകയും ഉപദ്രവിക്കുകയും ചെയ്തശേഷമാണ് മറ്റ് രണ്ട് പേരുമായി ചേർന്ന് ലൈംഗിക അതിക്രമം നടത്തിയതെന്നാണ് പോലീസ് പറയുന്നത്.
Related Post
ഹേമന്തിന്റെ സഹോദരനായ മുകേഷ് ബി.എസ്.സി അവസാന വർഷ വിദ്യാർഥിയാണെന്നും പോലീസ് അറിയിച്ചു. ഇരുവരുടെയും പിതാവും ഫരീദാബാദ് കോടതിയിൽ അഭിഭാഷകനായി പ്രാക്ടീസ് ചെയ്യുന്നതായി പോലീസ് വ്യക്തമാക്കി. അതേസമയം പ്രായപൂർത്തിയാകാത്ത പെൺകുട്ടിയെ ലക്ഷ്യമിട്ട് പോലീസ് ഉദ്യോഗസ്ഥരെന്ന വ്യാജേന നടത്തിയ അതിക്രമം സംബന്ധിച്ചാണ് അന്വേഷണം തുടരുന്നത്.