ന്യൂഡൽഹി: പോലീസുകാരാണെന്ന് അവകാശപ്പെട്ടെത്തിയ മൂന്നംഗ സംഘം പതിനേഴുകാരിയെ കൂട്ടബലാത്സംഗത്തിനിരയാക്കിയതായി പരാതി. സൗത്ത് ഡൽഹിയിലെ കൽകാജി ക്ഷേത്രത്തിന് സമീപത്തെ പാർക്കിൽ തിങ്കളാഴ്ച വൈകീട്ടാണ് സംഭവം. സംഭവത്തിൽ ഒരാളെ പൊലീസ് കസ്റ്റഡിയിലെടുത്തതായി റിപ്പോർട്ടുകൾ.
പതിനേഴുകാരനായ ആൺസുഹൃത്തിനൊപ്പമാണ് പെൺകുട്ടി കൽകാജി ക്ഷേത്രത്തിലെത്തിയത്. പ്രാർഥനയ്ക്കുശേഷം വൈകീട്ട് ഏഴരയോടെ ഇരുവരും സമീപത്തെ പാർക്കിലെത്തി. ഇതിനിടെയാണ് 25നും 30നും ഇടയിൽ പ്രായമുള്ള മൂന്ന് പേർ ഇവരുടെ അടുത്തെത്തിയത്.
തങ്ങൾ പൊലീസുകാരാണെന്ന് പരിചയപ്പെടുത്തിയ സംഘം പെൺകുട്ടിയെയും സുഹൃത്തിനെയും ഭീഷണിപ്പെടുത്തുകയായിരുന്നു. തുടർന്ന് പെൺകുട്ടിയെ കൂട്ടബലാത്സംഗത്തിനിരയാക്കിയെന്നാണ് പരാതി. സംഘത്തിലൊരാൾ കത്തിയും തോക്കും കാണിച്ച് ഭീഷണിപ്പെടുത്തിയതായും പെൺകുട്ടി പൊലീസിന് നൽകിയ മൊഴിയിൽ പറയുന്നു.
Related Post
രാത്രി എട്ടേമുക്കാലോടെയാണ് സംഭവത്തെക്കുറിച്ച് പൊലീസിന് വിവരം ലഭിച്ചത്. തുടർന്ന് പൊലീസ് സ്ഥലത്തെത്തി അന്വേഷണം ആരംഭിച്ചു. ഡൽഹി സ്വദേശിയായ പെൺകുട്ടിയെ വൈദ്യപരിശോധനയ്ക്ക് വിധേയയാക്കി.
പെൺകുട്ടിയുടെ മൊഴിയുടെ അടിസ്ഥാനത്തിൽ പൊലീസ് തുടർനടപടികൾ സ്വീകരിച്ചുവരികയാണ്. സംഭവത്തിൽ ഉൾപ്പെട്ട മറ്റുള്ളവർക്കായുള്ള തിരച്ചിലും അന്വേഷണം തുടരുകയാണ്.