തിരുവനന്തപുരം∙ യൂണിവേഴ്സിറ്റി കോളേജിൽ ഭിന്നശേഷിക്കാരനായ വിദ്യാർഥിയെ എസ്എഫ്‌ഐ യൂണിറ്റ് കമ്മിറ്റി ഓഫിസിൽ ഒരു മണിക്കൂറോളം ബന്ദിയാക്കി ക്രൂരമായി മർദിച്ച സംഭവത്തിൽ നിലപാടുമായി സിപിഎം. സംഭവത്തിൽ കോളേജിലെ എസ്എഫ്‌ഐ യൂണിറ്റ് പിരിച്ചുവിടാൻ സിപിഎം ജില്ലാ സെക്രട്ടേറിയറ്റ് നിർദേശിച്ചു. എസ്എഫ്‌ഐ പ്രവർത്തകനായ വിദ്യാർഥിയെ തന്നെ മർദിച്ച സംഭവം പ്രതിപക്ഷം ഉൾപ്പെടെ ഏറ്റെടുക്കുകയും പാർട്ടിക്കുള്ളിൽനിന്നു തന്നെ വിമർശനം ഉയരുകയും ചെയ്ത പശ്ചാത്തലത്തിലാണ് യൂണിറ്റ് പിരിച്ചുവിടാൻ പാർട്ടി നിർദേശം നൽകിയത്.
സിപിഎം ജില്ലാ സമ്മേളനം ഈയാഴ്ച നടക്കാനിരിക്കെ പാർട്ടി ആസ്ഥാനത്തിന്റെ മൂക്കിൻ തുമ്പിൽ സ്ഥിതി ചെയ്യുന്ന കോളേജിൽ എസ്എഫ്‌ഐ നേതാക്കൾ അഴിഞ്ഞാട്ടം നടത്തുന്നത് സമ്മേളനകാലയളവിൽ പാർട്ടിക്ക് മറുപടി പറയേണ്ടിവരുമെന്നതിനാലാണ് തീരുമാനമെന്നറിയുന്നു. മാത്രമല്ല ഈ സംഭവം പൊതുസമൂഹത്തിൽ അവമതിപ്പുണ്ടാക്കുന്നുവെന്ന വിമർശനമാണ് പാർട്ടിയിലെ ഒരു വിഭാഗം നേതാക്കൾ തന്നെ ഉയർത്തുന്നത്. മർദനമുണ്ടായി രണ്ടാഴ്ച കഴിഞ്ഞിട്ടും പ്രതികളെ പിടികൂടാൻ പൊലീസിനു കഴിയാത്തതും വിമർശനത്തിനിടയാക്കിയിട്ടുണ്ട്.
വിദ്യാർഥിയെ ഉപദ്രവിച്ച സംഭവത്തിൽ യൂണിറ്റ് സെക്രട്ടറിയും പ്രസിഡന്റും അടക്കം 4 എസ്എഫ്‌ഐ നേതാക്കളെ കഴിഞ്ഞ ദിവസം കോളേജിൽ നിന്നു സസ്‌പെൻഡ് ചെയ്തിരുന്നു. യൂണിറ്റ് സെക്രട്ടറിയും പിജി സുവോളജി രണ്ടാം വർഷ വിദ്യാർഥിയുമായ വിധു ഉദയ, പ്രസിഡന്റും ഫിലോസഫി മൂന്നാംവർഷ വിദ്യാർഥിയുമായ അമൽചന്ദ്, ഹിസ്റ്ററി മൂന്നാംവർഷ വിദ്യാർഥി മിഥുൻ, ബോട്ടണി മൂന്നാം വർഷ വിദ്യാർഥി അലൻ ജമാൽ എന്നിവരെയാണ് അന്വേഷണവിധേയമായി സസ്‌പെൻഡ് ചെയ്തത്.
Related Post
കെഎസ്ആർടിസിയെ വിശ്വസിച്ച് വിനോദസഞ്ചാരനിറങ്ങിയ 45 അംഗ സംഘം പെരുവഴിയിലായത് 10 മണിക്കൂർ, വിശന്നുപൊരിഞ്ഞ സഞ്ചാരികൾക്കു നാട്ടുകാരുടെ വക പാതിരാത്രിയിൽ കപ്പയും മുളകു ചമ്മന്തിയും, 15,000 രൂപ തിരിച്ചുകൊടുത്ത് സ്കൂട്ടായി കെഎസ്ആർടിസി
പരാതിക്കാരായ മുഹമ്മദ് അനസിന്റെ മൊഴി പ്രകാരം കോളേജിലെ അച്ചടക്ക സമിതി സമർപ്പിച്ച റിപ്പോർട്ടിന്മേലായിരുന്നു നടപടി. പലതവണ ആവശ്യപ്പെട്ടിട്ടും പ്രതികൾ അച്ചടക്കസമിതിക്ക് മൊഴി നൽകാൻ തയാറായിട്ടില്ല. കോളേജ് വിദ്യാഭ്യാസ ഡയറക്ടർ പി.സുധീർ അന്വേഷണം നടത്തുമെന്നു മന്ത്രി ആർ. ബിന്ദു പ്രഖ്യാപിച്ചെങ്കിലും കോളേജുമായി ബന്ധപ്പെട്ട് യാതൊരുവിധ അന്വേഷണവും ആരംഭിച്ചിട്ടില്ല.
മാത്രമല്ല പ്രതികൾ കോടതിയിൽ മുൻകൂർ ജാമ്യാപേക്ഷ സമർപ്പിച്ചതിനാൽ നടപടികൾ നിർത്തി വച്ചിരിക്കുകയാണെന്നാണു കന്റോൺമെന്റ് പൊലീസ് പറയുന്നത്. അതേസമയം തിരച്ചിൽ നിർത്തിയിട്ടില്ലെന്നും നടപടിക്ക് കർശന നിർദേശം നൽകിയിട്ടുണ്ടെന്നും കമ്മിഷണർ ജി. സ്പർജൻ കുമാർ പറഞ്ഞു. ഡിസംബർ രണ്ടിന് വൈകിട്ട് 5ന് ആയിരുന്നു ആക്രമണം. പെരുങ്കുളം കോന്നിയൂർ ചക്കിപ്പാറ മൂഴിയിൽ വീട്ടിൽ മുഹമ്മദ് അനസ് (19)നെ ആണ് ആക്രമിച്ചത്. തടയാൻ ശ്രമിച്ച സുഹൃത്ത് അഫ്‌സലിനെയും വളഞ്ഞിട്ട് തല്ലി. അനസിന്റെ സ്വാധീന കുറവുള്ള കാലിൽ ചവിട്ടിയും ഇരുമ്പു കമ്പി കൊണ്ട് തലയ്ക്കടിച്ചും ക്രൂരമായി ആക്രമിക്കുകയായിരുന്നു.
