തിരുവനന്തപുരം: മലപ്പുറം മഴക്കെടുതി ബാധിത പ്രദേശങ്ങൾ സന്ദർശിക്കാൻ ചാർട്ടേഡ് വിമാനത്തിൽ നടത്തിയ യാത്രയുടെ ചെലവ് വഹിച്ചത് ആരാണെന്ന് വെളിപ്പെടുത്താതെ മുഖ്യമന്ത്രി വി.ഡി. സതീശൻ. യാത്ര സർക്കാർ ചെലവിലല്ലെന്നും, വിമാനത്തിനായി പണം മുടക്കിയത് ആരാണെന്ന് പറയേണ്ട കാര്യമില്ലെന്നുമാണ് സതീശൻ പ്രതികരിച്ചത്.
മലപ്പുറത്ത് വലിയ ദുരന്തമുണ്ടായ സാഹചര്യത്തിലാണ് അവിടേക്ക് പോയതെന്ന് സതീശൻ പറഞ്ഞു. ആറ് പേർ മരിച്ചിട്ടും മുഖ്യമന്ത്രി അവിടേക്ക് പോയില്ലെന്ന വിമർശനം ഉയർന്നേക്കാമായിരുന്നുവെന്നും അദ്ദേഹം വ്യക്തമാക്കി. കരിപ്പൂരിലേക്ക് സാധാരണ വിമാനസർവീസ് ലഭ്യമല്ലാത്ത സാഹചര്യത്തിൽ ഒരു മലയാളിയായ പരിചയക്കാരനാണ് യാത്രയ്ക്കായി വിമാനം ഏർപ്പാട് ചെയ്തതെന്നും സതീശൻ പറഞ്ഞു.
വിമാനം ഏർപ്പാട് ചെയ്ത വ്യക്തിയുടെ പേര് വെളിപ്പെടുത്താൻ ഉദ്ദേശിക്കുന്നില്ലെന്നും സതീശൻ വ്യക്തമാക്കി. ഇത്തരം യാത്രകൾ ഇനിയും നടത്തുമെന്നും അദ്ദേഹം പറഞ്ഞു. വിമാനം ഏർപ്പാട് ചെയ്തതിന്റെ പേരിൽ ബന്ധപ്പെട്ടവർ പിന്നീട് എന്തെങ്കിലും ഔദാര്യം ആവശ്യപ്പെടുന്നവരല്ലെന്നും മുഖ്യമന്ത്രി പ്രതികരിച്ചു.
മുൻ മുഖ്യമന്ത്രിമാരായ പിണറായി വിജയനും ഉമ്മൻ ചാണ്ടിയും സ്വകാര്യ വ്യക്തികൾ ഏർപ്പാട് ചെയ്ത വിമാനങ്ങളിലോ ഹെലികോപ്റ്ററുകളിലോ യാത്ര ചെയ്തിട്ടുണ്ടെന്നും സതീശൻ ചൂണ്ടിക്കാട്ടി. താൻ പ്രതിപക്ഷത്തായിരുന്നപ്പോൾ പിണറായി വിജയന്റെ ഇത്തരം യാത്രകൾക്ക് ആരാണ് പണം നൽകിയതെന്ന് ചോദിച്ചിരുന്നില്ലെന്നും അദ്ദേഹം പറഞ്ഞു.
മലപ്പുറം യാത്രയ്ക്ക് സംസ്ഥാന സർക്കാരിന് അധിക സാമ്പത്തിക ബാധ്യതയുണ്ടായിട്ടില്ലെന്നായിരുന്നു നേരത്തെയുള്ള സർക്കാർ വിശദീകരണം. അടിയന്തര സാഹചര്യം കണക്കിലെടുത്ത് സർക്കാരിന്റെ അഭ്യർഥന പ്രകാരം സ്വകാര്യ വിമാനം സൗജന്യമായി ലഭിച്ചതാണെന്നായിരുന്നു സർക്കാർ വൃത്തങ്ങൾ വ്യക്തമാക്കിയിരുന്നത്.
