കോഴിക്കോട്: സംസ്ഥാന സ്കൂൾ കായികമേളയിൽ വിതരണം ചെയ്ത ഭക്ഷണത്തിൽ പുഴുവിനെ കണ്ടെത്തിയെന്ന പേരിൽ സമൂഹമാധ്യമങ്ങളിലൂടെ വ്യാജപ്രചാരണം നടത്തിയെന്ന കേസിൽ അധ്യാപകൻ അറസ്റ്റിൽ. എറണാകുളം പെരുമ്പാവൂർ ക്രാരിയേലി പാറക്കൽ ജിജോ ജെയിംസ് (35) ആണ് കുന്ദമംഗലം പോലീസിന്റെ പിടിയിലായത്. 2020ലെ തദ്ദേശ തിരഞ്ഞെടുപ്പിൽ വേങ്ങൂർ ഗ്രാമപഞ്ചായത്തിലെ രണ്ടാം വാർഡിൽ കോൺഗ്രസ് സ്ഥാനാർഥിയായി ജിജോ മത്സരിച്ചിരുന്നു. സംഭവത്തെ തുടർന്ന് വിദ്യാഭ്യാസ വകുപ്പ് ഇയാളെ സസ്പെൻഡ് ചെയ്തിട്ടുണ്ട്.
കോഴിക്കോട് എൻഐടി മൈതാനത്ത് നടക്കുന്ന സംസ്ഥാന സ്കൂൾ കായികമേളയുടെ ഭക്ഷണവിതരണ കേന്ദ്രവുമായി ബന്ധപ്പെട്ടാണ് വിവാദം ഉടലെടുത്തത്. കായികതാരങ്ങൾക്കായി തയ്യാറാക്കിയ ഭക്ഷണത്തിൽ പുഴുവിനെ കണ്ടെത്തിയെന്ന ആരോപണവുമായി ജിജോ ഫേസ്ബുക്ക് ലൈവിലൂടെ രംഗത്തെത്തിയതോടെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചു. ഇതോടെ ഭക്ഷണത്തിന്റെ ഗുണനിലവാരത്തെക്കുറിച്ച് ആശങ്കകളും പ്രതിഷേധങ്ങളും ഉയർന്നു.
കായികമേളയുടെ പ്രതിച്ഛായ തകർക്കാനും സുഗമമായ നടത്തിപ്പ് തടസ്സപ്പെടുത്താനും ബോധപൂർവമായ നീക്കം നടത്തിയെന്ന പരാതിയിലാണ് പോലീസ് കേസെടുത്തത്. ഭക്ഷണത്തിൽനിന്ന് ലഭിച്ചതെന്ന വ്യാജേന പുഴുവിനെ പ്രദർശിപ്പിച്ച് തെറ്റിദ്ധാരണ പരത്താൻ ശ്രമിച്ചെന്നാണ് എഫ്ഐആറിലെ ആരോപണം. പരാതിയിൽ നടത്തിയ പരിശോധനയിൽ ആരോപണത്തിന് അടിസ്ഥാനമില്ലെന്നാണ് പോലീസിന്റെ വിശദീകരണം. കായികമേളയുടെ കൺവീനർ പി.കെ. അരവിന്ദൻ നൽകിയ പരാതിയുടെ അടിസ്ഥാനത്തിലാണ് കുന്ദമംഗലം പോലീസ് നടപടി സ്വീകരിച്ചത്.
അതേസമയം, ഭക്ഷണത്തിൽ പുഴുവിനെ നേരിട്ട് കണ്ടിട്ടില്ലെന്നും വിദ്യാർഥികൾ പറഞ്ഞ വിവരത്തിന്റെ അടിസ്ഥാനത്തിലാണ് ഫേസ്ബുക്ക് ലൈവിലൂടെ ആരോപണം ഉന്നയിച്ചതെന്നുമാണ് ജിജോ പോലീസിന് നൽകിയ മൊഴിയെന്ന് മാധ്യമങ്ങൾ റിപ്പോർട്ട് ചെയ്തു. ആരോപണത്തിന് പിന്നിൽ ആസൂത്രിത നീക്കമുണ്ടെന്ന നിലപാടാണ് കായികമേളയുടെ സംഘാടകരും പൊതുവിദ്യാഭ്യാസ മന്ത്രിയും സ്വീകരിച്ചത്. കലാപത്തിന് പ്രകോപനം സൃഷ്ടിക്കാൻ ശ്രമിച്ചെന്ന ആരോപണവും കേസിലുണ്ട്.
കായികമേളയിലെ ഭക്ഷണവിതരണത്തിന്റെ ചുമതല വഹിക്കുന്ന പാചകവിദഗ്ധൻ പഴയിടം മോഹനൻ നമ്പൂതിരിയും ആരോപണത്തിനെതിരെ രംഗത്തെത്തി. മണിക്കൂറുകളോളം തിളപ്പിച്ച് തയ്യാറാക്കുന്ന സാമ്പാറിൽ ജീവനുള്ള പുഴുവിനെ കണ്ടെത്തിയെന്ന വാദം വിശ്വസനീയമല്ലെന്നാണ് അദ്ദേഹത്തിന്റെ പ്രതികരണം. വർഷങ്ങളായി സംസ്ഥാനതല കലോത്സവങ്ങളിലും കായികമേളകളിലും ഭക്ഷണവിതരണത്തിന്റെ ചുമതല നിർവഹിക്കുന്ന തനിക്ക് ഇത്തരമൊരു അനുഭവം ആദ്യമാണെന്നും അദ്ദേഹം പറഞ്ഞു. ഭക്ഷണത്തിന്റെ ഗുണനിലവാരത്തെക്കുറിച്ച് തെറ്റായ ധാരണ സൃഷ്ടിച്ച് സംഘാടകരെയും പാചകസംഘത്തെയും അപകീർത്തിപ്പെടുത്താനുള്ള ശ്രമമാണ് നടന്നതെന്നും പഴയിടം ആരോപിച്ചു.
സംഭവത്തിൽ കൂടുതൽ ആളുകൾക്ക് പങ്കുണ്ടോയെന്നും ഗൂഢാലോചന നടന്നിട്ടുണ്ടോയെന്നും അന്വേഷിക്കണമെന്നാണ് സംഘാടകരുടെ ആവശ്യം. കായികമേളയെ രാഷ്ട്രീയ ലക്ഷ്യങ്ങൾക്കായി വിവാദത്തിലാക്കാൻ ശ്രമിക്കുന്നുവെന്നായിരുന്നു വിദ്യാഭ്യാസ മന്ത്രിയുടെ ആരോപണം. അതേസമയം, ഭക്ഷണവിതരണത്തിലെ അപാകതകൾ പരിഹരിക്കണമെന്ന് ആവശ്യപ്പെട്ട് എസ്‌എഫ്‌ഐ പ്രവർത്തകർ പ്രതിഷേധിക്കുകയും ചെയ്തിരുന്നു. ആയിരക്കണക്കിന് വിദ്യാർഥികളും അധ്യാപകരും പരിശീലകരും പങ്കെടുക്കുന്ന കായികമേളയിലെ ഭക്ഷണവിതരണവുമായി ബന്ധപ്പെട്ട വിവാദം വലിയ ചർച്ചയ്ക്കാണ് വഴിവെച്ചത്.
