ഗുവാഹത്തി: ഗുവാഹത്തി സർവകലാശാലയിലെ 22കാരിയായ വിദ്യാർഥിനിയെ ഹോംസ്റ്റേ മുറിയിൽ മരിച്ച നിലയിൽ കണ്ടെത്തിയ സംഭവത്തിൽ 26കാരനായ ആൺ സുഹൃത്ത് അറസ്റ്റിൽ. യുവതിയുടെ കാമുകനായ അസിഫ് അലിയാണ് അറസ്റ്റിലായത്. യുവതി തൂങ്ങിമരിക്കുകയായിരുന്നുവെന്നാണ് അസിഫ് പോലീസിനോട് പറഞ്ഞത്. എന്നാൽ ഇയാളുടെ മൊഴി പോലീസ് വിശ്വസിച്ചിട്ടില്ലെന്നും കൊലപാതകമാണെന്ന സംശയത്തിൽ അന്വേഷണം തുടരുകയാണെന്നും ഗുവാഹത്തി വെസ്റ്റ് ഡെപ്യൂട്ടി പോലീസ് കമ്മിഷണർ ബോലിൻ ദേവോരി പറഞ്ഞു.
അതുപോലെ സംഭവത്തിൽ പോസ്റ്റ്മോർട്ടം റിപ്പോർട്ട് ലഭിച്ചിട്ടില്ല. യുവതിയുടെ ശരീരത്തിലോ, നിലത്തോ രക്തത്തിന്റെ പാടുകൾ കണ്ടെത്തിയിട്ടില്ലെന്നും പോലീസ് അറിയിച്ചു. മരണത്തിലേക്ക് നയിച്ച കൃത്യമായ സാഹചര്യം കണ്ടെത്തുന്നതിനായി ഹോംസ്റ്റേ ഉടമ, കെയർടേക്കർമാർ, ജീവനക്കാർ എന്നിവരെയും പോലീസ് ചോദ്യം ചെയ്തുവരികയാണ്.
ഗുവാഹത്തി സർവകലാശാലയിലെ സോഷ്യോളജി വിദ്യാർഥിനിയായ നിമിഷ താക്കൂരിയയെയാണ് നഗരത്തിന്റെ പ്രാന്തപ്രദേശമായ ഗരാളിലെ ഹോംസ്റ്റേ മുറിയിൽ ശനിയാഴ്ച പുലർച്ചെ അബോധാവസ്ഥയിൽ കണ്ടെത്തിയത്. ധരാപൂർ സ്വദേശിനിയായ നിമിഷ അസിഫിനൊപ്പമായിരുന്നു ഹോംസ്റ്റേയിൽ താമസിച്ചിരുന്നത്.
ഹോംസ്റ്റേയിൽ നിന്ന് അബോധാവസ്ഥയിൽ യുവതിയെ ആശുപത്രിയിലെത്തിച്ചതോടെയാണ് സംഭവം പോലീസിന്റെ ശ്രദ്ധയിൽപ്പെട്ടത്. തുടർന്ന് ഗുവാഹത്തി മെഡിക്കൽ കോളജ് ആശുപത്രിയിലേക്ക് (GMCH) മാറ്റിയെങ്കിലും ഡോക്ടർമാർ മരണം സ്ഥിരീകരിച്ചു. പോലീസിന് ലഭിച്ച വിവരങ്ങളിൽ ഏറ്റവും പ്രധാനപ്പെട്ടതെന്ന് കുടുംബസുഹൃത്ത് ചൂണ്ടിക്കാട്ടുന്നത് നിമിഷയുടെ അവസാന ഫോൺകോളാണ്. കുടുംബത്തോട് ഒരു സുഹൃത്തിന്റെ വീട്ടിൽ രാത്രി താമസിക്കുമെന്ന് പറഞ്ഞാണ് നിമിഷ വീട്ടിൽനിന്ന് പോയതെന്നാണ് കുടുംബസുഹൃത്തായ ഗൗതം ദാസ് പറയുന്നത്.
വൈകിട്ട് അഞ്ച് മണിയോടെ വീട്ടിൽനിന്ന് പുറപ്പെട്ട നിമിഷയോട് രാത്രി എട്ടോടെ അമ്മ ഫോണിൽ സംസാരിച്ചിരുന്നു. സുഹൃത്തുക്കൾക്കൊപ്പം ഭക്ഷണം കഴിക്കുകയാണെന്നും വൈകിയാൽ അവിടെ തന്നെ രാത്രി താമസിക്കുമെന്നും നിമിഷ അമ്മയോട് പറഞ്ഞതായാണ് ഗൗതം ദാസ് പറയുന്നത്. രാത്രി പത്ത് മണിയോടെയും അമ്മ വീണ്ടും വിളിച്ചപ്പോൾ അവിടെ തന്നെ താമസിക്കുമെന്ന് യുവതി അറിയിച്ചതായും അദ്ദേഹം പറഞ്ഞു.
എന്നാൽ പുലർച്ചെ രണ്ട് മണിയോടെ നിമിഷ അമ്മയെ വീണ്ടും വിളിച്ചെന്നും കരഞ്ഞുകൊണ്ട് “അവർ എന്നെ കൊല്ലും, അമ്മേ” എന്ന് പറഞ്ഞതായുമാണ് ഗൗതം ദാസിന്റെ വെളിപ്പെടുത്തൽ. ഇത് ആവർത്തിച്ച് പറഞ്ഞതിന് പിന്നാലെ ഫോൺ മറ്റാരെങ്കിലും പിടിച്ചെടുത്തിരിക്കാമെന്നാണ് കുടുംബം സംശയിക്കുന്നതെന്നും അദ്ദേഹം പറഞ്ഞു. ഈ ഫോൺവിളിയെക്കുറിച്ചുള്ള അവകാശവാദം പോലീസ് അന്വേഷണത്തിലൂടെ സ്ഥിരീകരിക്കേണ്ടതുണ്ട്.
നിമിഷയുടെ മാതാപിതാക്കൾ തുടർന്ന് സമീപത്തെ അസാര പോലീസ് സ്റ്റേഷനിലെത്തി വിവരം അറിയിച്ചതായും ഗൗതം ദാസ് പറഞ്ഞു. അതേസമയം, അന്ന് രാത്രി ഡ്യൂട്ടിയിലുണ്ടായിരുന്ന സബ് ഇൻസ്പെക്ടർ പട്രോളിങ്ങിലായിരുന്നുവെന്നും അദ്ദേഹം വ്യക്തമാക്കി. ഇതിനിടെ ഒരു പെൺകുട്ടിയെ ആരോഗ്യകേന്ദ്രത്തിൽ പ്രവേശിപ്പിച്ചെന്ന വിവരം പോലീസിന് ലഭിച്ചു. യുവതിയെ GMCH-ലേക്ക് മാറ്റിയതായി അറിഞ്ഞതിനെ തുടർന്ന് കുടുംബവും അവിടേക്ക് എത്തുകയായിരുന്നു. പുലർച്ചെ അഞ്ച് മണിയോടെ ആശുപത്രിയിലെത്തിയപ്പോൾ നിമിഷ മരിച്ചതായി ഡോക്ടർമാർ അറിയിച്ചു.
സംഭവത്തിൽ മറ്റൊരു നിർണായക മൊഴിയും ഹോംസ്റ്റേ ജീവനക്കാരനിൽനിന്ന് പോലീസിന് ലഭിച്ചിട്ടുണ്ട്. ഹോംസ്റ്റേയിലെ പാചകക്കാരനും കെയർടേക്കറുമായ ബിപുൽ ബെയ്ലുങ്ങിന്റെ മൊഴിപ്രകാരം, രാത്രിയിൽ ഒരു പുരുഷന്റെ ശബ്ദത്തിൽ ആരെയോ എഴുന്നേൽപ്പിക്കാൻ ആവശ്യപ്പെടുന്ന നിലവിളി കേട്ടിരുന്നു.
“ദാദാ, എഴുന്നേൽക്കൂ, എഴുന്നേൽക്കൂ” എന്ന രീതിയിൽ ഒരു പുരുഷൻ വിളിച്ചുപറയുന്നത് കേട്ടതായാണ് ബിപുൽ പറയുന്നത്. തുടർന്ന് രണ്ട് സഹപ്രവർത്തകരെ വിളിച്ച് പുറത്തേക്ക് പോയെങ്കിലും ആരെയും കണ്ടെത്താനായില്ല. പ്രധാന റോഡിന്റെ ഭാഗത്ത് പോലീസ് ടോർച്ച് തെളിച്ച് നിൽക്കുന്നത് കണ്ടതായും അദ്ദേഹം പറഞ്ഞു.
പിന്നീട് ഹോംസ്റ്റേയിലേക്ക് തിരിച്ചെത്തിയപ്പോൾ കരച്ചിൽ കേട്ടതായും ബിപുൽ പറയുന്നു. ശബ്ദം കേട്ട മുറിയിലേക്ക് പോയപ്പോൾ നിലത്ത് കിടക്കുന്ന യുവതിയെ ഒരു യുവാവ് പിടിച്ചുനിൽക്കുന്നതാണ് കണ്ടതെന്നും അദ്ദേഹം പറഞ്ഞു. തുടർന്ന് ഹോംസ്റ്റേ ഉടമകളെ വിളിക്കുകയും അവർ ആംബുലൻസ് വിളിക്കുകയും ചെയ്തതായി ബിപുൽ വ്യക്തമാക്കി.
നിമിഷയും അസിഫും ഹോംസ്റ്റേയിലെ പത്താം നമ്പർ മുറിയായിരുന്നു ബുക്ക് ചെയ്തിരുന്നത്. സമീപത്തെ ഒമ്പതാം നമ്പർ മുറി ഒഴിഞ്ഞുകിടന്നതിനാൽ അതും ഇവർ ഉപയോഗിച്ചിരുന്നതായി ജീവനക്കാർ പറഞ്ഞു. ഇരുവരും മുമ്പും ഈ ഹോംസ്റ്റേയിൽ എത്തിയിട്ടുണ്ടെന്നും ജീവനക്കാർ പോലീസിനോട് പറഞ്ഞിട്ടുണ്ട്.
അതേസമയം, നിമിഷ ഹിന്ദുവും അസിഫ് മുസ്ലിം യുവാവുമായതിനാൽ സംഭവത്തിന് പിന്നാലെ ചില സംഘടനകൾ പ്രതിഷേധവുമായി രംഗത്തെത്തി. സംഭവത്തെ ‘ലവ് ജിഹാദ്’ ആരോപണവുമായി ബന്ധിപ്പിച്ചായിരുന്നു ചിലരുടെ പ്രതിഷേധം. മുസ്ലിം പുരുഷന്മാർ ഹിന്ദു സ്ത്രീകളെ പ്രണയബന്ധത്തിൽ കുടുക്കി മതംമാറ്റുന്നതിന് ഗൂഢാലോചന നടത്തുന്നുവെന്ന വലതുപക്ഷ ഹിന്ദു സംഘടനകൾ പ്രചരിപ്പിക്കുന്ന ആരോപണമാണ് ‘ലവ് ജിഹാദ്’. എന്നാൽ നിമിഷയുടെ മരണവുമായി ബന്ധപ്പെട്ട ഇത്തരം ആരോപണങ്ങൾക്ക് അന്വേഷണത്തിലൂടെ സ്ഥിരീകരണം ലഭിച്ചിട്ടില്ല.
സംഭവത്തിൽ പ്രതിഷേധക്കാർ റോഡ് ഉപരോധിച്ചതിനെ തുടർന്ന് പോലീസ് സ്ഥലത്തെത്തി റോഡ് ഒഴിയണമെന്ന് ആവശ്യപ്പെട്ടു. പിന്നീട് ഉപരോധം പിൻവലിച്ചു. നിലവിൽ അസിഫിന്റെ ആത്മഹത്യാ വാദം പോലീസ് തള്ളിക്കളഞ്ഞിരിക്കുകയാണ്. നിമിഷയുടെ അവസാന ഫോൺവിളി സംബന്ധിച്ച കുടുംബത്തിന്റെ മൊഴി, ഹോംസ്റ്റേ ജീവനക്കാരൻ കേട്ടതായി പറയുന്ന പുരുഷ ശബ്ദം, യുവതിയെ മുറിയിൽ കണ്ടെത്തിയ സാഹചര്യം തുടങ്ങിയവയും പോലീസ് പരിശോധിച്ചുവരികയാണ്. പോസ്റ്റ്മോർട്ടം റിപ്പോർട്ടും മറ്റ് അന്വേഷണ വിവരങ്ങളും പുറത്തുവരുന്നതോടെ മരണത്തിന്റെ യഥാർഥ കാരണം സംബന്ധിച്ച് കൂടുതൽ വ്യക്തത ലഭിക്കുമെന്ന് പോലീസ് പറയുന്നു.
