കൊല്ലം: കുണ്ടറയിൽ മധ്യവയസ്കനെ കൊലപ്പെടുത്തിയ കേസിൽ ഭാര്യ അറസ്റ്റിൽ. വെള്ളിമൺ സ്വദേശി രാജു (56) കൊല്ലപ്പെട്ട സംഭവത്തിലാണ് ഭാര്യ ലേഖ മേരിയെ കുണ്ടറ പൊലീസ് അറസ്റ്റ് ചെയ്തത്. സ്വത്ത് തർക്കമാണ് കൊലപാതകത്തിന് കാരണമായതെന്നാണ് പൊലീസ് പറയുന്നത്.
വെള്ളിയാഴ്ച പുലർച്ചെയാണ് രാജു വീട്ടിൽ കുഴഞ്ഞുവീണതായി ലേഖ മേരി നാട്ടുകാരെ അറിയിച്ചത്. തുടർന്ന് നാട്ടുകാരുടെ സഹായത്തോടെ രാജുവിനെ ആശുപത്രിയിലെത്തിച്ചു. എന്നാൽ പരിശോധനകൾക്ക് പിന്നാലെ മരണത്തിൽ സംശയം തോന്നിയതോടെ പോസ്റ്റ്മോർട്ടം നടത്തുകയായിരുന്നു.
പോസ്റ്റ്മോർട്ടം റിപ്പോർട്ടിലാണ് രാജുവിന്റെ മരണം കഴുത്ത് മുറുകിയതിനെ തുടർന്നാണെന്ന് വ്യക്തമായത്. ഇതോടെ കുണ്ടറ പൊലീസ് നടത്തിയ അന്വേഷണത്തിൽ ഭാര്യയെ കേന്ദ്രീകരിച്ച് അന്വേഷണം ശക്തമാക്കുകയായിരുന്നു. തുടർന്ന് ലേഖ മേരിയെ കസ്റ്റഡിയിലെടുത്ത് ചോദ്യം ചെയ്തു.
മണിക്കൂറുകൾ നീണ്ട ചോദ്യം ചെയ്യലിനൊടുവിൽ ലേഖ മേരി കുറ്റം സമ്മതിച്ചതായാണ് പൊലീസ് വ്യക്തമാക്കുന്നത്. ഭർത്താവിന്റെ കഴുത്തിൽ ബെൽറ്റ് മുറുക്കിയാണ് കൊലപ്പെടുത്തിയതെന്ന് ചോദ്യം ചെയ്യലിൽ പ്രതി വെളിപ്പെടുത്തിയതായും പൊലീസ് പറഞ്ഞു.
കൊലപാതകത്തിന് ശേഷം രാജു കുഴഞ്ഞുവീണതാണെന്ന് വരുത്തിത്തീർക്കാനാണ് ലേഖ മേരി ശ്രമിച്ചതെന്നും പൊലീസ് പറയുന്നു. സ്വത്ത് സംബന്ധിച്ച തർക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക അന്വേഷണത്തിലെ കണ്ടെത്തൽ.
കേസിൽ ലേഖ മേരിയുടെ അറസ്റ്റ് കുണ്ടറ പൊലീസ് രേഖപ്പെടുത്തി. കൊലപാതകത്തിലേക്ക് നയിച്ച സാഹചര്യങ്ങളും സംഭവത്തിൽ മറ്റാർക്കെങ്കിലും പങ്കുണ്ടോയെന്നും ഉൾപ്പെടെയുള്ള കാര്യങ്ങൾ പൊലീസ് അന്വേഷിച്ചുവരികയാണ്.
