കണ്ണൂർ: കണ്ണൂർ സ്വദേശികളായ വ്ളോഗർമാർ വാഹനാപകടത്തിൽ മരിച്ച സംഭവത്തിൽ അന്വേഷണത്തിന്റെ മേൽനോട്ട ചുമതല റേഞ്ച് ഡിഐജി കെ. കാർത്തിക്കിന്. മരിച്ച അനൂപിന്റെയും ഷബീർ താണയുടെയും ബന്ധുക്കൾ അപകടത്തിൽ ദുരൂഹത സംശയമുന്നയിച്ചതിനെ തുടർന്നാണ് അന്വേഷണത്തിന് മേൽനോട്ട ചുമതല നൽകിയത്.
15-നായിരുന്നു അപകടം. മാഹി പള്ളി പെരുന്നാളിന്റെ റീൽസ് ചിത്രീകരിക്കാനായി പോയ അനൂപും ഷബീറും സഞ്ചരിച്ച സ്കൂട്ടറിൽ പിന്നിൽനിന്ന് കാർ ഇടിക്കുകയായിരുന്നു. നടാൽ ഊർപ്പഴശിക്കാവിന് സമീപമായിരുന്നു അപകടം.
കാർ ഓടിച്ചിരുന്ന മാഹി സ്വദേശി വിദു കൃഷ്ണ മദ്യലഹരിയിലായിരുന്നുവെന്നാണ് റിപ്പോർട്ടുകൾ. അപകടത്തിന്റെ സാഹചര്യങ്ങളും ബന്ധുക്കൾ ഉന്നയിച്ച സംശയങ്ങളും ഉൾപ്പെടെ പരിശോധിച്ചായിരിക്കും അന്വേഷണം മുന്നോട്ടുപോകുക.
