തൃശ്ശൂർ/മനിശ്ശീരി: പാലക്കാട് മനിശ്ശീരിയിൽ യു.എ.പി.എ കേസിൽ മഹാരാഷ്ട്ര സ്വദേശിയായ യുവാവ് അറസ്റ്റിൽ. തൃക്കങ്ങോട്ടെ വ്യാപാരസ്ഥാപനത്തിൽ ജോലി ചെയ്തിരുന്ന ഗുരുമൂർത്തി (27)യെയാണ് വ്യാഴാഴ്ച രാത്രി പ്രത്യേക അന്വേഷണസംഘം കസ്റ്റഡിയിലെടുത്തത്. തുടർന്ന് അറസ്റ്റ് രേഖപ്പെടുത്തി റിമാൻഡ് ചെയ്തു.
കൊച്ചിയിലെ സിനഗോഗ് കത്തിച്ച കേസിലെ പ്രതി എബിനുമായി ബന്ധപ്പെട്ടിരുന്ന സംഘടനകൾ ഉൾപ്പെടെയുള്ളവയുമായി ഗുരുമൂർത്തിക്ക് ബന്ധമുണ്ടെന്നാണ് അന്വേഷണസംഘത്തിന് ലഭിച്ച വിവരം. മഹാരാഷ്ട്രയിലും തമിഴ്‌നാട്ടിലും താമസിച്ചിരുന്ന ഇയാൾ മാസങ്ങൾക്കു മുൻപാണ് മനിശ്ശീരിയിലെത്തിയത്.
കേന്ദ്ര ആഭ്യന്തര മന്ത്രാലയത്തിൽനിന്ന് തൃശ്ശൂർ റേഞ്ച് ഐ.ജി. ഓഫീസിന് ലഭിച്ച വിവരത്തിന്റെ അടിസ്ഥാനത്തിലാണ് തൃക്കങ്ങോട്ടെ സ്വകാര്യ കെട്ടിടത്തിൽനിന്ന് ഇയാളെ പൊലീസ് കസ്റ്റഡിയിലെടുത്തത്. വെള്ളിയാഴ്ച ഉച്ചയ്ക്ക് അസിസ്റ്റന്റ് കമ്മിഷണർ ടി.ആർ. രാജേഷിന്റെ നേതൃത്വത്തിലുള്ള അന്വേഷണസംഘം ഗുരുമൂർത്തി താമസിച്ചിരുന്ന മുറിയിൽ പരിശോധന നടത്തി. കേസുമായി ബന്ധപ്പെട്ട ചില രേഖകൾ ഇവിടെനിന്ന് കണ്ടെത്തിയതായാണ് വിവരം.
തമിഴ് സംസാരിക്കുന്ന ഗുരുമൂർത്തി തമിഴ്‌നാട്ടിലാണ് ജനിച്ചതെങ്കിലും ചെറുപ്പത്തിൽത്തന്നെ മുംബൈയിലെത്തിയിരുന്നു. അതിനാലാണ് ആധാർ കാർഡ് ഉൾപ്പെടെയുള്ള രേഖകളിൽ മഹാരാഷ്ട്രയിലെ വിലാസം രേഖപ്പെടുത്തിയിട്ടുള്ളത്. ഇയാൾ താമസിച്ചിരുന്ന കെട്ടിടത്തിന് സമീപത്തുനിന്നുള്ള സി.സി.ടി.വി. ദൃശ്യങ്ങൾ പരിശോധിക്കുന്നതിനായി ഹാർഡ് ഡിസ്ക് ഉൾപ്പെടെയുള്ളവയും പൊലീസ് ശേഖരിച്ചിട്ടുണ്ട്.
