കാസർകോട്: ട്രാഫിക് പിഴയായി പിരിച്ചെടുത്ത 2.96 ലക്ഷം രൂപ തട്ടിയെടുത്തെന്ന ആരോപണത്തിൽ മുൻ എസ്‌ഐ അരുൺ മോഹനെതിരെ വിജിലൻസ് കേസ്. ബേക്കൽ, മേൽപ്പറമ്പ്, വെള്ളരിക്കുണ്ട് പൊലീസ് സ്റ്റേഷനുകളിൽ ജോലി ചെയ്തിരുന്ന കാലയളവിലെ ക്രമക്കേടുകളുമായി ബന്ധപ്പെട്ടാണ് നടപടി.
പിഴ അടച്ചിട്ടും വാഹന ഉടമകളുടെ ഇ-ചെല്ലാനിൽ തുക കുടിശ്ശികയായി രേഖപ്പെടുത്തിയതായി കണ്ടെത്തിയതോടെയാണ് ക്രമക്കേട് പുറത്തുവന്നത്. പിഴയായി പിരിച്ചെടുത്ത തുകയുടെ കണക്കുകളിൽ തിരിമറി നടത്തിയെന്ന ആരോപണമാണ് ഉദ്യോഗസ്ഥനെതിരെ ഉയർന്നിരിക്കുന്നത്.
സംഭവവുമായി ബന്ധപ്പെട്ട് അരുൺ മോഹന്റെയും ബന്ധുക്കളുടെയും ബാങ്ക് അക്കൗണ്ടുകൾ വിജിലൻസ് പരിശോധിച്ചുവരികയാണ്. പണം കൈമാറ്റം ചെയ്തതുമായി ബന്ധപ്പെട്ട വിവരങ്ങളും അന്വേഷണത്തിന്റെ ഭാഗമായി പരിശോധിക്കുന്നുണ്ട്.
