തിരുവനന്തപുരം: തിരുവനന്തപുരത്ത് ട്രെയിനിലും റെയിൽവേ സ്റ്റേഷനിലുമായി യുവതിക്കുനേരെ ലൈംഗികാതിക്രമം. സംഭവത്തിൽ ആറ്റിങ്ങൽ സ്വദേശി വിജീഷിനെ റെയിൽവേ പോലീസ് കസ്റ്റഡിയിലെടുത്തു. ഇന്ന് പുലർച്ചെ മലബാർ എക്സ്പ്രസിലാണ് സംഭവം.
ട്രെയിനിൽ യാത്ര ചെയ്യുന്നതിനിടെ ആദ്യം യുവതിക്കുനേരെ ലൈംഗികാതിക്രമമുണ്ടായെന്നാണ് പരാതി. യാത്രക്കാർ ഇടപെട്ടതോടെ പ്രതി പിന്തിരിഞ്ഞു. എന്നാൽ, പേട്ട സ്റ്റേഷനിൽ ഇറങ്ങിയ യുവതിയെ വിജീഷ് പിന്തുടർന്ന് വീണ്ടും ആക്രമിക്കുകയായിരുന്നു. യുവതി ചോദ്യം ചെയ്തതോടെ പ്രതി അടിച്ചുവീഴ്ത്തിയെന്നും പരാതിയിലുണ്ട്.
സംഭവം ശ്രദ്ധയിൽപ്പെട്ട മറ്റു യാത്രക്കാർ പ്രതിയെ പിടികൂടി പോലീസിന് കൈമാറുകയായിരുന്നു. റെയിൽവേ പോലീസ് ഇയാളെ കസ്റ്റഡിയിലെടുത്ത് തുടർനടപടികൾ സ്വീകരിച്ചു.
