ന്യൂഡൽഹി: രാജ്യത്തെ എല്ലാവരും മാധ്യമപ്രവർത്തകരാകാൻ തുടങ്ങിയാൽ അത് മറ്റുള്ളവർക്ക് പ്രശ്നങ്ങൾ സൃഷ്ടിക്കുമെന്ന് സുപ്രീം കോടതി. പ്രതിഷേധങ്ങൾ റിപ്പോർട്ട് ചെയ്യുന്ന ഫ്രീലാൻസ് മാധ്യമപ്രവർത്തകർ, സ്വതന്ത്ര മാധ്യമപ്രവർത്തകർ, ഇൻഫ്ലുവൻസർമാർ, റീൽസ് നിർമാതാക്കൾ എന്നിവരുടെ അഭിപ്രായസ്വാതന്ത്ര്യവും സുരക്ഷയും സംബന്ധിച്ച പൊതുതാൽപ്പര്യ ഹർജികൾ പരിഗണിക്കവേയാണ് കോടതിയുടെ നിരീക്ഷണം.
ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ് മല്യ ബാഗ്ചി എന്നിവരടങ്ങിയ ബെഞ്ചാണ് ഹർജികൾ പരിഗണിച്ചത്. പ്രതിഷേധങ്ങൾ റിപ്പോർട്ട് ചെയ്യുന്ന സ്വതന്ത്ര, ഫ്രീലാൻസ് മാധ്യമപ്രവർത്തകരെ ഡൽഹി പൊലീസ് അംഗീകരിക്കുന്നില്ലെന്നും പ്രസ് ഇൻഫർമേഷൻ ബ്യൂറോയുടെ അക്രഡിറ്റേഷൻ നിർബന്ധമാക്കുന്നുവെന്നും മുതിർന്ന അഭിഭാഷക ഇന്ദിരാ ജെയ്‌സിങ് കോടതിയിൽ ചൂണ്ടിക്കാട്ടി. തൊഴിൽദാതാവിന്റെ തിരിച്ചറിയൽ കാർഡുള്ള മാധ്യമപ്രവർത്തകരുടെ ജോലിയിൽ പൊലീസ് ഇടപെടുന്നത് തടയാൻ ദേശീയതലത്തിൽ പ്രോട്ടോക്കോൾ വേണമെന്നും അവർ ആവശ്യപ്പെട്ടു.
എന്നാൽ, അഭിപ്രായസ്വാതന്ത്ര്യത്തിനുള്ള അവകാശത്തിന്റെ പേരിൽ രാജ്യത്തെ എല്ലാ പൗരന്മാർക്കും മാധ്യമപ്രവർത്തകരാകാൻ കഴിയുമോ എന്നത് വിശദമായി പരിശോധിക്കേണ്ട വിഷയമാണെന്ന് ചീഫ് ജസ്റ്റിസ് സൂര്യകാന്ത് പറഞ്ഞു. അംഗീകൃത മാധ്യമപ്രവർത്തകർ, രജിസ്റ്റർ ചെയ്ത മാധ്യമസ്ഥാപനങ്ങളിൽ ജോലി ചെയ്യുന്നവർ, ഫ്രീലാൻസ് മാധ്യമപ്രവർത്തകർ, ഇൻഫ്ലുവൻസർമാർ, റീൽസ് നിർമാതാക്കൾ എന്നിവർക്കെല്ലാം ഒരേ തരത്തിലുള്ള സുരക്ഷയാണോ നൽകേണ്ടതെന്ന കാര്യവും പരിശോധിക്കേണ്ടതുണ്ടെന്ന് കോടതി നിരീക്ഷിച്ചു.
ഡിജിറ്റൽ കാലഘട്ടത്തിൽ മൊബൈൽ ഫോൺ കൈവശമുള്ള ആർക്കും സ്വതന്ത്ര മാധ്യമപ്രവർത്തകനാണെന്ന് അവകാശപ്പെടാൻ കഴിയുമെന്ന് സോളിസിറ്റർ ജനറൽ തുഷാർ മേത്ത വാദിച്ചു. ചിലർ സംഭവങ്ങളെ സെൻസേഷണലൈസ് ചെയ്തും ഏകപക്ഷീയമായ വിവരങ്ങൾ അവതരിപ്പിച്ചും സോഷ്യൽ മീഡിയയിൽ പ്രശസ്തിയും വരുമാനവും നേടാൻ ശ്രമിക്കുന്നുണ്ടെന്നും അദ്ദേഹം പറഞ്ഞു.
അതേസമയം, ജോലിക്കിടെ വനിതാ മാധ്യമപ്രവർത്തകർ നേരിടുന്ന ലൈംഗികാതിക്രമങ്ങൾ പരിശോധിക്കാൻ കമ്മിറ്റി രൂപീകരിക്കണമെന്ന ആവശ്യവും സുപ്രീം കോടതി പരിഗണിക്കാമെന്ന് വ്യക്തമാക്കി. ഇക്കാര്യത്തിൽ കമ്മിറ്റിയിലേക്ക് പരിഗണിക്കാവുന്നവരുടെ പേരുകൾ നൽകാമെന്ന് ഇന്ദിരാ ജെയ്‌സിങ് കോടതിയെ അറിയിച്ചു.
