മുംബൈ: തുടക്കം മുതൽ സംശയത്തിന്റെ നിഴലിലാണ് ബോളിവുഡ് നടൻ സെയ്ഫ് അലിഖാനും ആക്രമണവും മോഷണവുമെല്ലാം. ഇതിന് കുറച്ചുകൂടി ബലം നൽകുന്ന വിധം പുറത്തുവന്ന വിരലടയാള പരിശോധനാ ഫലവും. സംഭവസ്ഥലത്തുനിന്ന് 19 സെറ്റ് വിരലടയാളമാണ് പോലീസ് ശേഖരിച്ചതെങ്കിലും പ്രതി ഷെരീഫുൾ ഷെഹ്സാദിൻറേതുമായി ഇതൊന്നും പൊരുത്തപ്പെടുന്നില്ലെന്നാണ് ഫിംഗർ പ്രിന്റ് ബ്യൂറോ നൽകിയ റിപ്പോർട്ടിൽ പറയുന്നത്. ഇതോടെ പോലീസ് അറസ്റ്റ് ചെയ്തിരിക്കുന്നത് ശരിയായ പ്രതിയെ അല്ലയോയെന്ന ചോദ്യവും ഉയരുന്നു.
വീടിനുള്ളിൽ മോഷ്ടാവിനാൽ ആക്രമിക്കപ്പെട്ട് ഗുരുതരമായി പരുക്കേറ്റ സംഭവം തുടക്കം മുതൽ വിവാദങ്ങൾക്കും ആശയക്കുഴപ്പങ്ങൾക്കും വഴിവെച്ചിരുന്നു. പ്രതിയെ പിടികൂടിയപ്പോഴും തുടർന്നുള്ള പോലീസ് ഭാഷ്യങ്ങളിലും നിരവധി ചോദ്യങ്ങൾ അവശേഷിച്ചിരുന്നു. അതിസമ്പന്നൻമാർ താമസിക്കുന്ന പ്രദേശത്തെ അതിസുരക്ഷയുള്ള കെട്ടിടത്തിൽ എങ്ങനെ ഒരു സാധാരണ മോഷ്ടാവ് കടന്നു?, അതി സമ്പന്നർ താമസിക്കുന്ന അതിസുരക്ഷയുള്ള സ്ഥലത്ത് എങ്ങനെ ഒരു സാധാരണക്കാരന് കയറാനാകും? റൂമിലിട്ട് പൂട്ടിയ മോഷ്ടാവ് എങ്ങനെ യാഥൊരു പ്രശ്നവുമില്ലാതെ പുറത്തുചാടി എന്നു തുടങ്ങി ഏറ്റവുമൊടുവിൽ വിരലടയാളത്തിലെ പൊരുത്തക്കേടുകൾവരെ എത്തിനിൽക്കുന്നു ആ സംശയങ്ങൾ.
സംഭവത്തിൽ ബംഗ്ലാദേശ് പൗരൻ ഷെരിഫുൾ ഷെഹ്‌സാദിനെ പോലീസ് പിടികൂടിയെങ്കിലും പ്രതിയുടെ വിരലടയാള പരിശോധനാ ഫലം പുറത്തുവന്നതോടെയാണ് പുതിയ വിവാദം ഉടലെടുത്തിരിക്കുന്നത്. ഷെരീഫുളിനെ പിടികൂടും മുമ്പ് മറ്റൊരാളെ പോലീസ് കസ്റ്റഡിയിലെടുക്കുകയും ചോദ്യംചെയ്യുകയും ചെയ്തിരുന്നു. എന്നാൽ, അയാൾക്ക് സംഭവവുമായി ബന്ധമില്ലെന്ന് കണ്ടതോടെ വിട്ടയക്കുകയായിരുന്നു. ഛത്തീസ്ഘട്ട് സ്വദേശിയായ ആകാശ് കനോജയെന്നയാളെയും മുംബൈ പോലീസ് ചോദ്യം ചെയ്തിരുന്നു. ജഞാനേശ്വരി എക്സ്പ്രസ് ട്രെയിനിൽ യാത്രചെയ്യുന്നതിനിടെ ആർപിഎഫ് സംഘം പിടികൂടുകയും മുംബൈ പോലീസിന് കൈമാറുകയുമായിരുന്നു. പക്ഷെ, ഇയാൾക്കും സംഭവത്തിൽ പങ്കില്ലെന്നായിരുന്നു പോലീസിന്റെ കണ്ടെത്തൽ.
ജനുവരി 16-ന് ആയിരുന്നു സെയഫ് അലിഖാൻ ആക്രമിക്കപ്പെട്ടത്. ഗുരുതരമായി പരിക്കേറ്റ നടൻറെ ശരീരത്തിൽ കത്തിയുടെ ഭാഗം നട്ടെല്ലിന് സമീപം തറഞ്ഞ നിലയിലായിരുന്നു. തുടർന്ന് ജനുവരി 19-നാണ് ബംഗ്ലാദേശി പൗരൻ ഷെരീഫുളിനെ പോലീസ് അറസ്റ്റ് ചെയ്തത്. എന്നാൽ, ഗുരുതരമായി പരുക്കേറ്റിട്ടും ദിവസങ്ങൾക്കുക്കുള്ളിൽ ആശുപത്രിയിൽനിന്ന് ഡിസ്ചാർജ് ആയി ആരാധകരെ അഭിവാദ്യം ചെയ്ത് വീട്ടിലേക്ക് വന്ന സെയ്ഫിന്റെ പരിക്കിനേക്കുറിച്ച് വലിയ ചർച്ചയും ഉയർന്നിരുന്നു. മാത്രമല്ല, ഇത്ര വലിയ സുരക്ഷയുണ്ടായിട്ടും വീട്ടിലേക്ക് അക്രമി കയറിയത് സംബന്ധിച്ച് പല സംശയങ്ങളും ഉയർന്നിരുന്നു.
സംഭവം നടക്കുന്ന സമയത്ത് സെയ്ഫിൻറെ ഭാര്യ കരീന കപൂർ, നടിയും സുഹൃത്തുമായ സോനം കപൂറിന്റെ പാർട്ടിയിൽ പങ്കെടുത്ത് വീട്ടിൽ തിരിച്ചെത്തിയതായിരുന്നു ഭാര്യ കരീനയെന്ന വിവരവും പുറത്തുവന്നിട്ടുണ്ട്. വളരെയേറെ മദ്യപിച്ചാണ് കരീന വീട്ടിലെത്തിയിരുന്നതെന്നാണ് ചില റിപ്പോർട്ടുകളിൽ പറയുന്നത്. ഇതാണ് കരീന സെയ്ഫിനൊപ്പം ആശുപത്രിയിലേക്കോ പോലീസ് സ്റ്റേഷനിലേക്കോ പോകാതിരുന്നതെന്നാണ് സൂചന. പോയിരുന്നെങ്കിൽ സാഹചര്യം ഏറെ വഷളാവുമായിരുന്നു. മദ്യപിച്ച നിലയിലുള്ള വീഡിയോയും ചിത്രങ്ങളും പുറത്തുവരും എന്ന ഭയത്തിലാണ് ആ സമയത്ത് പുറത്തേക്ക് പോകേണ്ടെന്ന് കരീന തീരുമാനിച്ചിരുന്നതെന്നും ടൈംസ് ഓഫ് ഇന്ത്യ റിപ്പോർട്ട് ചെയ്തിരുന്നു.
ഫോറൻസിക്ക് കണ്ടെത്തിയ 19 വിരലടയാളങ്ങളിൽ ഒന്നു പോലും പ്രതിയുടേതല്ല, സെയ്ഫിനെ കുത്തിപ്പരുക്കേൽപ്പിച്ച കേസിൽ വൻ ട്വിസ്റ്റ്, തുടർ പരിശോധനയ്ക്കായി കൂടുതൽ വിരലടയാളങ്ങൾ ശേഖരിച്ചു
അതോടൊപ്പം ഇത്രയും അതി സമ്പന്നർ താമസിക്കുന്ന ഒരു സ്ഥലത്ത് സംശയാസ്പദമായി ഒരാൾ വീട്ടിനുള്ളിലേക്ക് കയറുമ്പോൾ എന്തുകൊണ്ടു സെക്യൂരിറ്റി ഉദ്യോഗസ്ഥന്റെ പോലും ശ്രദ്ധയിൽപെട്ടില്ല എന്ന ചോദ്യമാണ് ഉയർന്ന് കേൾക്കുന്നത്. അത്രമാത്രം സുരക്ഷാ സന്നാഹങ്ങളോടെ താമസിക്കുന്ന ഒരു നടനാണ് സെയ്ഫ്. പഴയ നവാബ് പാരമ്പര്യത്തിലെ ഒടുവിലത്തെ കണ്ണി. പ്രധാനമന്ത്രിയെ അടക്കം നേരിട്ട് സന്ദർശിക്കാൻ അനുവാദമുള്ള നടൻ. ഒപ്പം ബോളിവുഡ് സിനിമയുടെ തലവര മാറ്റിയ കപൂർ ഫാമിലിയിലെ മരുമകൻ. അദ്ദേഹം പോലും സ്വന്തം വീട്ടിൽ വച്ച് ആക്രമിക്കപ്പെട്ടേക്കാമെന്ന തിരിച്ചറിവ് കൂടിയായിരുന്നു നിരവധി സംശയങ്ങൾക്കും ആശയക്കുഴപ്പത്തിനും ഇടനൽകിയത്.
മാത്രമല്ല അത്രമേൽ ഗുരുതരമായി പരുക്കേറ്റിട്ടും വീട്ടിൽനിന്ന് സ്വയം ഇറങ്ങിവന്ന് ഓട്ടോയിൽ കയറി ആശുപത്രിയിലെത്തി ചികിത്സ നേടിയ നടനെ ലീലാവതി ആശുപത്രിയിൽ അടിയന്തര ശസ്ത്രക്രിയയടക്കമുള്ള ചികിത്സകൾ നടത്തിയാണ് ജീവിതത്തിലേക്ക് തിരിച്ചെത്തിയതെന്നാണ് പറയപ്പെടുന്നത്. അങ്ങനെ പരുക്കേറ്റ ഒരാളെ ആശുപത്രിയിലെത്തിക്കാനുള്ള സംവിധാനം പോലും ആ അപ്പാർട്ട്മെന്റിൽ ഇല്ലായിരുന്നോയെന്നാണ് സാധാരണക്കാരന്റെ സംശയം.
ഇതിനെല്ലാം പുറമേ, ശസ്ത്രക്രിയയ്ക്കു ശേഷം അഞ്ച് ദിവസത്തിനകം ആശുപത്രിയിൽനിന്ന് ഡിസ്ചാർജായത് സംശയത്തിനിടയാക്കിയിരുന്നു.നട്ടെല്ലുനും കഴുത്തിന്റെ പിൻഭാഗത്തും ഗുരുതരമായി കുത്തേറ്റെന്നു പറയുകയും അഞ്ചു ദിവസത്തിനുള്ളിൽ തുള്ളിച്ചാടി പുറത്തിറങ്ങുകയും ചെയ്യാൻ ഇതു സിനിമയല്ലല്ലോ…
അതേസമയം സെയ്ഫിനെതിരായ ആക്രമണവാർത്ത പിആർ പ്രമോഷനാണെന്നും പരുക്കേറ്റുവെന്നത് അഭിനയമാണെന്നുമടക്കമുള്ള വിമർശനങ്ങൾ ചില കോണുകളിൽനിന്ന് ഉയർന്നു. ഇത് വിവിധ രാഷ്ട്രീയ നേതാക്കളടക്കം ഏറ്റെടുക്കുകയും ട്രോളുകളായും മീമുകളായും സോഷ്യൽമീഡിയയിൽ വലിയതോതിൽ പ്രചരിക്കുകയും ചെയ്തു. ഉയർന്ന സംശയങ്ങൾക്കൊന്നും തൃപ്തികരമായ മറുപടി നൽകാൻ നടനുമായി ബന്ധപ്പെട്ടവർക്കോ, പോലീസിനോ സാധിക്കുന്നില്ലെന്നും അന്വേഷണം മുന്നോട്ടുപോകുംതോറും സംഭവത്തേക്കുറിച്ചുള്ള ദുരൂഹതകൾ ഏറുകയാണെന്നും പലരും ചൂണ്ടിക്കാട്ടുന്നു. ഇതിനിടെ സെയ്ഫിനെ ആക്രമിച്ച പ്രതിയുടെ കൂടുതൽ വിരലടയാളങ്ങൾ ശേഖരിച്ച് അയച്ചതായും റിപ്പോർട്ട്.
