കൊച്ചി: പ്രമുഖ ഇ- കൊമേഴ്‌സായ ആമസോണിന്റെ കളമശേരിയിലെ ഗോഡൗണിൽ ബ്യൂറോ ഓഫ് ഇന്ത്യൻ സ്റ്റാൻ ഡേഡ്‌സ് (ബിഐഎസ്) കൊച്ചി ബ്രാഞ്ച് പരിശോധന നടത്തി. ഇവിടെ ഗുണനിലവാരം കുറഞ്ഞ ഉത്പന്നങ്ങൾ വൻതോതിൽ ശേഖരിച്ചതായുള്ള രഹസ്യ വിവരത്തെ തുടർന്നായിരുന്നു പരിശോധന. ഇവിടെ നടത്തിയ പരിശോധനയിൽ ഇന്ത്യയിലും വിദേശത്തുമുള്ള ബ്രാൻഡുകളുടെ പേരിൽ നിർമിച്ച ഗാർഹിക ഇലക്ട്രോണിക് ഇലക്ട്രിക്കൽ ഉപകരണങ്ങൾ, അടുക്കള ഉപകരണങ്ങൾ, കളിപ്പാട്ടങ്ങൾ, പാദരക്ഷകൾ തുടങ്ങിയവ പിടിച്ചെടുത്തു.
ഐഎസ്‌ഐ മാർക്ക് വ്യാജമായി ഒട്ടിച്ചതും നിയമപ്രകാരമുള്ള ലേബലുകൾ ഒട്ടിക്കാത്തതുമായ ഉൽപന്നങ്ങൾ ഇവയിൽ പെടുന്നുവെന്നാണ് വിവരം.ബിഐഎസ് സർട്ടിഫിക്കേഷൻ മാർക്ക് വ്യാപകമായി ദുരുപയോഗിച്ചതായും പരിശോധനയിൽ കണ്ടെത്തിയിട്ടുണ്ട്. മാത്രമല്ല ഉത്പന്നങ്ങളിൽ ഒട്ടിച്ച ലേബലുകൾ എളുപ്പം പൊളിഞ്ഞുപോകുന്നതും മുദ്രകൾ ശരിയായി പതിയാത്തതുമായിരുന്നു.
അതേസമയം കുറ്റക്കാർക്കെതിരെ പ്രോസിക്യൂഷൻ നടപടികൾ ആരംഭിക്കും. 2 വർഷം വരെ തടവും നിലവാരമില്ലാത്ത ഉൽപന്നങ്ങളുടെ വിൽപനയിലൂടെ നേടിയ തുകയുടെ 10 മടങ്ങ് പിഴയും ഇടാക്കാവുന്ന കുറ്റമാണു പ്രതികൾക്കെതിരെ ചുമത്തുകയെന്നാണ് അറിയുന്നത്.
