തിരുവനന്തപുരം: ബൈക്ക് പാർക്ക് ചെയ്തതുമായി ബന്ധപ്പെട്ട തർക്കത്തിനിടെ പോലീസ് ഉദ്യോഗസ്ഥന് കുത്തേറ്റു. വലിയതുറ പോലീസ് സ്റ്റേഷനിലെ സിപിഓ ആയ മനു (38) വിനാണ് കുത്തേറ്റത്. വീട്ടിനുമുന്നിൽ പാർക്ക് ചെയ്തിരുന്ന ബൈക്ക് മാറ്റണമെന്ന് ആവശ്യപ്പെട്ടതിനെ തുടർന്നുണ്ടായ തർക്കമാണ് കത്തിക്കുത്തിൽ കലാശിച്ചത്.
കൊച്ചുള്ളൂരിലെ വീടിന് മുന്നിൽ വച്ചായിരുന്നു സംഭവം. ആക്രമണത്തിൽ ഗുരുതരമായി പരുക്കേറ്റ ഇയാളെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. നെഞ്ചിൽ രണ്ട് കുത്തേറ്റിട്ടുണ്ട്. മുഖത്തും വെട്ടേറ്റ പാടുണ്ട്. ഇതിനിടെ കുത്തിയ ആൾ രക്ഷപ്പെട്ടു. അതേസമയം ആരാണ് പോലീസുകാരനെ ആക്രമിച്ചത് എന്ന കാര്യത്തിൽ പോലീസിന് വ്യക്തമായ സൂചന ലഭിച്ചിട്ടില്ലെന്നാണ് വിവരം. എന്നാൽ, ഇയാളെ കണ്ടെത്തുന്നതിനായി മെഡിക്കൽ കോളേജ് പോലീസ് അന്വേഷണം ആരംഭിച്ചു.
