ഓറഞ്ച് കഴിച്ചതിന് ശേഷം തോടിനി എവിടേക്കും വലിച്ചെറിയേണ്ടതില്ല. നിരവധി ഗുണങ്ങളാണ് ഓറഞ്ചിന്റെ തോടിൽ അടങ്ങിയിട്ടുള്ളത്. മുഖത്തിന്റെ ഭംഗികൂട്ടാനും ചെടികൾക്ക് വളമായുമൊക്കെ ഇത് ഉപയോഗിക്കാറുണ്ട്. എന്നാൽ വീട് വൃത്തിയാക്കാനും വീടിനുള്ളിൽ സുഗന്ധം പരത്താനുമൊക്കെ ഓറഞ്ച് തോടിന് സാധിക്കും. ഇങ്ങനെ ചെയ്ത് നോക്കൂ.
ഗാർബേജ് ഡിസ്പോസൽ വൃത്തിയാക്കാം
മാലിന്യങ്ങൾ സൂക്ഷിക്കുന്നത് കൊണ്ട് തന്നെ ഇതിൽ നിന്നും ദുർഗന്ധം ഉണ്ടാവാനുള്ള സാധ്യത വളരെ കൂടുതലാണ്. എന്നാൽ ഓറഞ്ചിന്റെ തോട് ഉപയോഗിച്ച് ദുർഗന്ധത്തെ എളുപ്പത്തിൽ അകറ്റാൻ സാധിക്കും.
ഫ്രിഡ്ജിൽ സുഗന്ധം പകരാം
ഗാർബേജ് ഡിസ്പോസലിൽ മാത്രമല്ല ഫ്രിഡ്ജിലെ ദുർഗന്ധം അകറ്റാനും ഓറഞ്ച് ഉപയോഗിക്കാവുന്നതാണ്. ഒരു പാത്രമെടുത്തതിന് ശേഷം അതിലേക്ക് ഓറഞ്ച് തോടിടാം. ഇത് ഫ്രിഡ്ജിൽ സൂക്ഷിച്ചാൽ ദുർഗന്ധത്തെ വലിച്ചെടുക്കുകയും നല്ല സുഗന്ധം പരത്തുകയും ചെയ്യുന്നു. അതേസമയം തോട് ഉണങ്ങി കഴിഞ്ഞാൽ പുതിയത് വയ്ക്കാൻ ശ്രദ്ധിക്കണം.
അഴുക്കിനെ വൃത്തിയാക്കാം
വീടിനുള്ളിലെ അഴുക്ക് വൃത്തിയാക്കാനും ഓറഞ്ച് തോട് ഉപയോഗിക്കാം. തോടിനൊപ്പം അല്പം വിനാഗിരി ചേർത്ത് നന്നായി ഉരച്ച് കഴുകിയാൽ ഏത് കറയും പമ്പകടക്കും.
മൈക്രോവേവ് വൃത്തിയാക്കാം
ഇത്തരം ഉപകരണങ്ങൾ എങ്ങനെ വൃത്തിയാക്കണമെന്ന് ആലോചിച്ച് ആശങ്കപ്പെടേണ്ടതില്ല. ഓറഞ്ച് തോട് ഉപയോഗിച്ച് മൈക്രോവേവ് വൃത്തിയാക്കാനും ദുർഗന്ധം അകറ്റാനും സാധിക്കും. മൈക്രോവേവ് സേഫ് ബൗളിൽ കുറച്ച് തോട് വെച്ച് നന്നായി ചൂടാക്കാം. ഇത് പറ്റിപ്പിടിച്ച കറയെ എളുപ്പത്തിൽ നീക്കം ചെയ്യാൻ സഹായിക്കുന്നു.
